Sai diro yaano 2020nni batinye kalaqamu dano kalaqantino; qoleno alamete doyichora Koroonu fayya (COVID-19) ubbino. Yihowa Farciˈraasine togoo qarri gawajjinore kaaˈlitinohu hiittoonniiti?

 Saihu 2020hu soqqanshote diro, a Aliidi Bisiti Qineessaanote Komite 28 miliyoone doolaare b fushshine kalaqamu dano gawajjitinore kaaˈlinanni gede fajjitino. Konni garinni 200 saˈanno dano gawajjitinore kaaˈla dandiinoonni; kalaqantino dano giddo gama, Koroonu fayyaati, addi addi hombobalatteeti, Afirikaho fulino lolahooti, Venizuweelaho ubbino hudeetinna Zimbaawete gobba gantino moolleeti. Fushshotenni afiˈnoonni woxe sagalete, waaho, gallanni minira, uduunneho, hattono xagichoho baantoonni; qoleno, minenna addi addi uduunne fiinannire hirate, hattono minna gatamarate horoonsiˈnoonni. Hanni irdaatu loosi giddo gama laˈno.

 Koroonu Dhibba. Koroonu fayya alame woˈmate aana roduuwinkera manninatensanna hedonsa gawajjitino hattono miinju qarri amadannonsa gede assitino. Insa kaaˈlate alamete doyichora 800 saˈannota Irdaatu Komite qixxeessinoonni. Tini komite roduuwaho hasiisannori maatiro buuxxe, rakke Qineessaanote Komitera kultanno; konni garinni Qineessaanote Komite hiittoo kaaˈlo hasiissannoro afa dandiitanno.

 Sai diro Irdaatu Komite batinyu roduuwi sagale, waa, fayyimma agadhate kaaˈlannorenna xagicho afiˈranno gede kaaˈlitino. Mitu qooxeessira, Irdaatu Komite songote cimeeyye ledo kaaˈlante roduuwu gashshootu aanno irdaata afidhanno gede assitino.

 Yihowa Farciˈraasine ikkinokki manni irdaatu loosonke wodanchino. Lawishshaho, Zaambiyaho Naakonde awuraajji gashshaanchi Fiildi Simiwiinga yinanni manchi togo yiino: “Lowo geeshsha qarrame noo manna kaaˈlo hasiissannonsa yannara kaaˈlitinoonni daafira galanteemmoˈne.”

 Angoolaho Sagalete Anje Qarrissino. Koroonu fayyanni kainohunni Angoolaho sagalete anje qarrissino; sagale hidhinanni waagino giira kaxxino. Batinyu roduuwinkera sagale hidha lowo qarra ikkitinonsa.

 Biraazilenniti sinu biiro Angoolaho heedhanno roduuwira sagale sokkannonsa gede xaˈminoonni. Fushshinoonni woxe danchu garinni horoonsiˈra dandiinanni gede, roduuwu sagale ma garinni hirre sonkiro woyyannoro seekkite xiinxallituhu gedensaanni, coccolo ikkikkinni mitteenni hirtino. Hakko daafira, mitte mittente sagale waagi hodhishshunku ledo mereerimunni 22 doolaare calla ikkino; mittu mittunku uduunnichi giddo noo sagale lawishshaho, ruuze, baaqeelunna sagalete zayite 20 kg ikkitanno. Xaa geeshsha 33,544 kaartoone ikkitanno sagale sonkoonni; tini sagale xaphoomunni 654 meetiriki toone ikkitanno. Tenne sagale hakko qooxeessira noo sagale ledo gamba assineenna 50,000 saˈˈanno manni afiˈra dandiino.

 Irdaata uyinoonninsa roduuwi mayitino? Alekisaandire yinannihu Angoolaho xeertiˈre noo qooxeessira heeˈranno rodii togo yiino: “Tini Yihowa baxannoetanna callaˈya ikkoommokkita leellishshanno tajeeti yee hedeemmo. Yihowa dirijjite giddo waagu nooe!” Maariza yinanniti qaaqquulle callase lossidhanno rodoo togo yitino: “Yihowa raareˈya macciishshino. Isonna dirijjitesi galaxxeemmansa!”

 Zimbaawete Gobbara Moolle Ubbeenna Kaaˈlinoonni Kaaˈlo. Saihu 2020hu soqqanshote diri giddo, Zimbaawete gobba buutote moolle gantino; hakko daafira lowo miliyoone ikkanno manni baasa hudiˈrino. Zimbaawete gobbara heedhannori batinye Yihowa Farciˈraasinerano gari sagale dinonsa.

 Roduuwanke kaaˈlate onte Irdaatu Komite qixxeessinoonni. Lowo xibbe ikkitanno halashshaano sagale usuranna hogowa kaaˈlitino; qoleno mitootu makeennansanni c sagale massinanni gede assite kaaˈlitino. Saihu 2020hu soqqanshote diri giddo, 22,700 saˈˈanno mannira sagale shiqishate 691,561 doolaare fushshinoonni!

 Irdaata uyini woyite, mitu roduuwira mine noonsari tae noonsa. Sagale uyininsata roduuwu Yihowa guwisidhino. Mitootu isinni Maganu Mangiste faarso faarsitino.

 Mittu qooxeessira lame gunnootu roduuwinke, mitte mangistennita ikkitinokki dirijjite (NGO) mannaho irdaata uyitanno gara hasaabbara qixxeessitino gambooshshe marino. Ikkollana, hasaawu sunu sununni poletiku widira hige soorrami; hakko daafira, kuri roduuwi irdaata adhate yee insa yitinore assa giwe agure haˈri. Insa kae haˈri woyite mannu qacifatinonsa; qoleno, “Sagale afiˈneemmo yitinella ninkewa dagginoonte!” yiinonsa. Ikkirono, lame lamala gedensaanni, hatti dirijjite nafa irdaata uyitukkinni, roduuwinke marte lamente roduuwira irdaata uyitinonsa!

 Irdaatu loosi Zimbaawete gobbarano mannu Yihowa daafira macciishshanno gede assino. Lawishshaho, hanni shiimu qachira heedhannote Piriska woˈnaalsha laˈno. Moolle ubbe qarra kalaqqinoha ikkirono, mannu uulla loosiˈranno woggara nafa Piriska Roowenna Arbe ganyite soqqansho fultanno. Qooxeessisera heeˈranno manni ise qacifatanni togo yaanno: “Sabbakeemma yitayi maatekki hudeteyi shaattaraati.” Piriska kayinni togo yite qoltanno: “Yihowa soqqamaanosi horonta tuge diegennino.” Hakkiinni mulenni Yihowa dirijjite irdaata uyitinose. Mitu qachise manni tenne lae dhagge assiˈre Piriska togo yiino: “Maganu horo dituginohe; hakko daafira ninkeno isi daafira lende afa hasiˈneemmo.” Xa qachisera heeˈrannohu lamalu manni raadoonetenni sayinsanniha songote gambooshshe macciishshanno.

 Goofimarchu roore gambise dayi kiiro, kalaqamu dano lexxitanni hadhannoti egennantinote. (Maatewoosi 24:3, 7) Shaqqillunni, donate.dan124.com aana kulloonnite addi addi doogganni fushshitinanni fushshora lowo geeshsha galanteemmoˈne. Fushshitinanni fushsho, qarramino mannira hasiisannonsare hasiisannonsa yannara aate kaaˈlitanno.