“Tini tenne ikkituro, ayyarete gade anganni fultanni hadhanno. Wayi jajjabba katamma egemmanno. Iibbillu lowo geeshsha lexxanno. Waajjishshanno hombobalatte kaˈanno. Moolle batidhanno. Mitte miliyoone ikkannohu murotenna saadate sirchi baˈˈanno. Kuni qalle coyiˈnoonnire woy naggishsha diˈˈikkino. Sayinsete egennaammi, wolqa horoonsiˈnanni gara [Energy Policies] soorra hoongiro, togoori ikkannota coyidhino.”—Buusantino Mangistubba Dirijjitehu qaru borreessaanchi Antooniyo Gutireezi Dotteessa 4, 2022nni ayyarete gade soorro daafira rippoorte shiqinshi yannara coyiˈrinore.

 “Sayinsete egennaammi, muli yannara ayyarete gade soorro, Yunayitidi Isteetete noota 423 meddi yitannota jajjabba paarke gawajjitara dandiitannota kulte qorowisiissino; hakko iso iibbillu lexxe kuri paarke gawajjara dandaanno. Albillitte Qullaawu Maxaafi giddo borreessineenna nabbambeemmo gedee dano kalaqantara dandiitanno; lawishshaho, giiranna lolahu, jajjabba kaade daaqa, baarunna iibbillu jilbi lexxa.”—“Yelowuistooni Paarke Lolahi Dagganni Noo Dano Leellishanno,” Ze Niwu Yoorki Taymisi, Ella 15, 2022.

 Qarqaru daafamara malu no? Nooha ikkiro, konne qarra tirara dandaannohu ayeti? Hanni Qullaawu Maxaafi tenne daafira mayyaannoro laˈno.

 Qullaawu Maxaafi Maganu “baatto huntannore” hunannota kulanno. (Yohaannisi Ajuuja 11:18) Konni qummeeshshinni sase coye huwanteemmo:

1.  1. Mannu ooso assooti baatto gawajjara dandaanno.

2.  2. Baatto beco baˈino gedeenni diheedhanno.

3.  3. Konne qarra tirannohu manna ikkikkinni Maganoho.

 Qullaawu Maxaafi, “baatto hegerera heedhanno” yaanno. (Rosiisaancho 1:4, NW) Baatto horonta mullicho diˈˈikkitanno.

•   “Keeraano baatto ragidhanno; ise aanano hegerera heedhanno.”—Faarso 37:29.

 Baatto biˈre kalaqantu wari gede ikkite woˈmunni woˈma haarooˈmitanno.

•   “Molo baatto hagiidhitanno; halalli baattorano daraaro fultanno.”—Isayaasi 35:1.