Arfaasa 27, 2023 alamete deerrinni Naazi Gashshooti yannara shinoonni Ayihudoota qaagate qaaggote ayyaana ayirrinsanni. Mitu 75 dirira albaanni ikkitinoti tini biso shorodhi assitanno goofo, Maganu Ayihudete manna togo beebba assiˈnanna sammi yiinohu mayiraatikka yite hedatto gede assitahera dandiitanno.

•   Qullaawu Maxaafi tenne hajo daafira mayyaannoro ledde afate, “Naazi Gashshooti Lowo Manna Gudinohu Mayiraati? Maganu Tenne Hoolinokkihu Mayiraati?” yaanno birxicho nabbawi.

 Naazi Gashshooti yannara lowo Ayihudoota beebba assiˈnoonni. Lowo miliyoone ikkitannore shinoonni. Hattee yannara Ayihudootano agurranna wole mannano beebba assiˈnoonni hattono shinoonni. Kuri giddo gamu Yihowa Farciˈraasineeti; insa ammanansanni kainohunni beebba assiˈnoonninsa.

•   Ledde afate, “Naazi Gashshooti Yannara Yihowa Farciˈraasine Ma Assinoonni?” yaanno birxicho nabbawi.

 Batinyu manni lowoha Ayihudete manna gundi gede xaano hattoo goofo dagga ikka yee yaadanno. Maganoho galatu galona, Qullaawu Maxaafi albillitte togoo goofo heedhannokki yanna daggannota kulanno.

•   “Kiˈnera hedeemmore ani egennoommo; hedoˈyano hexxonna albillittete ikkitannoˈne gede, keerunnite ikkinnina bunshennita diˈˈikkitino.”—Ermiyaasi 29:11.

 Maganu Yihowa a bunshe coˈo asse hunanno woyitenna bunshe abbitino gawajjo dhaawanno woyite tini hexxo woˈmitanno. Isi muli yannara:

•   Woloota gawajjannoha busha manna gudanno.—Lawishsha 2:22.

•   Qarrantenna shette saˈinore baala hursanno.—Yohaannisi Ajuuja 21:4.

•   Reyitinore uullate aana reyotenni kayisanno.—Yohaannisi 5:28, 29.

 Qullaawu Maxaafi kulannota sheshifachishshanno hexxo addaxxa dandaatto. Addaxxa dandaattohu mayiraatiro ledde afate, Qullaawa Maxaafa woxe baaxxittokki ninke ledo xiinxalli.