Onkoleessa 24, 2022 Ameerikaho Teksaasi, shiimu Yuuwaldi katamira biso shorodhi assannori kalaqamino. Ze Niwu Yoorki Taymisi gaazeexi kulanno garinni, “Roobi Umi Dirimi Rosi Mine . . . mittu qawwe qodhino manchi 19 qaaqquullenna lame rosiisaano shiino.”

 Hige ma assinanni, yannankera togoohu shagaggiˈnanni coyi duucha hige ikkanno. Yuu-essi-ee Tudey yinanni gaazeexi odeessino garinni, Ameerikaho calla “sai diro rosu minna hoowe giddo 249 hinge qawwe gannoonni; 1970 kawa kageeshshi geya qawwe ganne cancinshoonnihu wolu diri dino.”

 Togoohu macca gibbanno coyi ikkannohu mayiraati? Togooha busha coye cincine heeˈra dandiineemmohu hiittoonniiti? Finqille heedhannokki yanna dagganno yine hexxa dandiineemmo? Qullaawu Maxaafi kuri xaˈmuwara dawaro qolanno.

•    Qullaawu Maxaafi ninke heeˈnoommo diro “goofimarchu barra” yaanno; qoleno konni dirira batinyu manni “baxillu nookkiha” hattono “mararro afiˈrinokkiha” ikkannota kulanno; hatto yaano mannu biso shorodhi assannorenna macca gibbannore assanno yaate. Togoo akati noonsa mannooti “bunshete aana bunshe leddanno.” (2 Ximootewoosi 3:1-5, 13) Tenne daafira ledde afate, “Yannankera Noo Manni Ikkitonna Akati Daafira Qullaawu Maxaafi Giddo Masaalloonnini?” yaanno birxicho nabbawi.

 Batinyu manni, ‘Maganu togoohu bushu coyi ikkannota hoolannokkihu isi mayiraati?’ yee huluullamanno. Qullaawu Maxaafi tenne xaˈmora qolanno dawaro afate, “Danchu Mannirano Bushu Coyi Iillanno—Mayira?” yaanno birxicho nabbawi.

•    “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiˈneemmo cincanna jawaante hexxo uyitannonke.”—Roomu Sokka 15:4.

 Qullaawu Maxaafi biddishshi tenne kakkachu manni batiˈrino alame cincite heeˈratto gede kaaˈlannohe. “Finqille Baˈanno Yanna Dagga Ikka?” yaanno birxicho afidhinote Baqqi Yiiyye! yinanni metseetera wole kaaˈlitanno mashalaqqe afiˈratto.

 Annuwunna amuuwu qaaqquullinsa odoote kullanna laˈˈannonna macciishshanno coyinni bararraaqannokki gede kaaˈla dandiitanno gara afate, “Yaachishshanno Odoonna Oosoˈne” yaanno birxicho nabbawi.

•    “[Maganu] gadadaamma shettotewiinni fushshannonsa.”—Faarso 72:14.

•    “Bisensa heellakkote, urdensa haantote soorritanno. Gashshootu gashshootu aana ola dikayisanno. Kunni kaˈa olu roso rosannohu diheeˈranno.”—Mikiyaasi 4:3.

 Maganu mannu ooso assa dandiitinokkire assaraati. Isi gordu Mangistesi widoonni olu uduunne baalankanna finqille baalanta hunanno. Maganu Mangiste assitannore ledde afate, “Maganu Mangiste Hunda ‘Keeru Woˈmanno’” yaanno birxicho nabbawi.