Maganu Ayeti? Maganu Suˈmi Ayeti? Maganu umisi, “Ani Yihowaati; suˈmiˈya konneeti” yiino. (Isayaasi 42:8, NW) Maganu suˈmi Qullaawu Maxaafi giddo, 7,000 meddi yaanno bayicho no. Ikkollana, batinye Qullaawu Maxaafi tiro giddo, Maganu suˈma “Kaaliiqa” woy “Mooticha” yaannohu maaragete suˈminni soorrinoonni; hatto assa gara diˈˈikkitino. Maganu jaalasi ikkattora hasiˈranno daafira, ‘suˈmasi woshshatto’ gede koyisinohe.—Faarso 105:1.

Yihowata Maaragete Suˈmuwa. Qullaawu Maxaafi Yihowa, “Magano,” “Woˈmanka Dandaannoha,” “Kalaqaancho,” “Anna,” “Mootichanna” “Woˈmunkura Aliidi Mooticha” yaanno. Qullaawu Maxaafi giddo noote batinye huuccattora, mannu Yihowata maaragete suˈmuwanna Yihowa yinanniha gillete suˈmasi horoonsiˈrino.—Daanieeli 9:4.

 Maganu Hiittooho? Maganu illete leellannokki ayyaanaati. (Yohaannisi 4:24) Qullaawu Maxaafi, “Magano lae egennino manchi dino” yaanno. (Yohaannisi 1:18, NW) Qoleno, Yihowa dadillarano hagiidharano dandaannota kulanno.—Lawishsha 11:20; Faarso 78:40, 41.

Dhagge Ikkitannota Maganu Akatta. Maganu baalunku gari manna mitte illenni laˈˈanno. (Soqqamaasinete Looso 10:34, 35) Isi, ‘maarannohonna hanqoho muddamannokkiho, mararaanchoho, hattono ammanamasinna bagamannokkihu baxillisi batiˈraho.’ (Fulo 34:6, 7) Ikkollana, roore dhagge ikkitannoti Maganu akatta shoolete.

Wolqa. Maganu ‘Woˈmankare Dandaannoha’ ikkino daafira, coyiˈrinore baala wonshannoti dannu nookki wolqa noosi.—Kalaqama 17:1.

Hayyo. Maganoho taalle nookki hayyo noosi. Qullaawu Maxaafi isi callu hayyicha ikkinota kulannohu iseraati.—Roomu Sokka 16:27.

Taashsho. Maganu woˈmante yannara gara ikkinore assanno. “Loosisi guutaho,” qoleno halaale diwiranno.—Marro 32:4.

Baxille. Qullaawu Maxaafi, “Maganu baxilleho” yaanno. (1 Yohaannisi 4:8) Maganu baxille leellishannoha calla ikkikkinni, isi umisi baxilleho. Maganu baalankare assannohu taalle nookki baxillisinniiti; tini ninke duucha doogganni kaaˈlitannonke.

Maganoho Mannu Ledo Noosi Jaalooma. Maganu iima heeˈrannoho baxillaancho Annankeeti. (Maatewoosi 6:9) Iso addaxxineemmoha ikkiro, jaallasi ikka dandiineemmo. (Faarso 25:14) Maganu huuccattotenni isiwa shinqeemmo gede koyisinonke; isinni Qullaawu Maxaafi, “Kiˈnere malannohu isootina, qarrisinoˈnere baala isi aana tuqqe” yaanno.—1 Pheexiroosi 5:7; Yaiqoobi 4:8.

Yesuusi Maganu Beettooti. Yesuusi baxxino kalaqamaati; korkaatuno Maganu xaaddotenni kalaqinohu iso callaati. Qullaawu Maxaafi Yesuusa Maganu Beetto yaannohu iseraati. (Yohaannisi 1:14) Yihowa bayira Beettosi Yesuusa kalaqi gedensaanni, wole kalaqama baala kalaqinohu Yesuusi widoonniiti.—Lawishsha 8:30, 31; Qolasiyaasi Sokka 1:15, 16.

 Yesuusi, ‘Ani Maganu Ledo Taaloho’ Yee Horo Diegennino. Hatteentenni isi, “Ani isiwiinni dayommoho’ hattono ‘isi soyinoeho’ yiino. (Yohaannisi 7:29) Yesuusi mitte yannara rosaanchosi ledo hasaawanni, “Anniˈyawanna Anniˈnewa, Maganiˈyawanna Maganiˈnewa” yee coyiˈrino. (Yohaannisi 20:17) Yesuusi reyita, Yihowa reyotenni kayisinosi; qoleno iima lowo silxaane uyinosi, hattono qiniitesiinni ofollanno gede assinosi.—Maatewoosi 28:18; Soqqamaasinete Looso 2:32, 33.

Yesuusi Kiristoosi Maganunniwa Shiqatto Gede Kaaˈlannohe

Yesuusi uullara dayinohu Annisi daafira rosiisankeraati. Yihowa umisi Yesuusi daafira coyiˈranni, “Baxeemmohu Beettiˈya konneeti; isi yaannota macciishshe” yiino. (Maarqoosi 9:7) Yesuusi geeshsha Magano afinohu mittuno dino. Yesuusi togo yiino: “Beetto agurranna woy Beettu xawise kulinosiha agurranna Anna afannohu mittuno dino.”—Luqaasi 10:22.

Yesuusi Annisi akatta guutu garinni leellishino. Yesuusi Annisi akatta guutu garinni leellishino daafira, “Ane afinohu annaˈyano afino” yiino. (Yohaannisi 14:9) Yesuusi coyiˈrinorinninna assinorinni Annisi baxille leellishe, manna Maganunniwa shiqanno gede kaaˈlino. Isi togo yiino: “Doogono, halaaluno, heeshshono aneeti. Ane widoonni ikka hoogiro, ayino Anniˈyawa daannohu dino.” (Yohaannisi 14:6) Isi lede togo yiino: “Magano Anna ayyaanunninna halaalunni magansidhannorira yanna dagganni no; . . . Maganu Annu hasiˈrannorino hattoonni magansidhannoreeti.” (Yohaannisi 4:23) Yihowa, isi daafira halaale afa hasiˈrannoha ate gedee manna hasiˈranni no!