Qullaawu Maxaafi, Maganu halcho mannu ‘foorretewiinni xeertiˈranno gede’ ikkinota kulanno. (1 Teselonqe 4:3) Soorro, labbaahu labbaahu ledonna meyati meyate ledo foora, hattono adhaminokkiri labbaahunna meyaati assitannoha siimu xaadooshshe Qullaawu Maxaafi “foorrete” yaanno.

•  Maganu labbaahunna meyaati adhamara hasiˈrannohu mayiraati?

•  Sumuu yee heeˈra dandaannoronna teˈee laˈˈate yee adhamara albaanni mitteenni heeˈranno mannina?

•  Hagiirru noota dancha maate kalaqiˈra dandiinannihu hiittoonniiti?

•   Adhanna adhama xintinohu Maganoho. Maganu umi labbaahanna meyata kalaqe xaadisi woyite adhanna adhama xintino. (Kalaqama 2:22-24) Isi hedo, labbaahunna meyati mimmitoho qaale eˈˈe adhamikki mitteenni heeˈrara diˈˈikkitino.

•   Mannu oosora woyyannore afinohu Maganoho. Maganu adhanna adhama geedonnita ikkitara hasiˈranno; labbaahunna meyati konni garinni adhamansa maate woˈmate kaaˈlitanno, hattono agarooshshe ikkitanno. Hanni mitto lawishsha laˈno. Mitto mini uduunnicho gari garisinni xaadinse horoonsiˈrate hakkonne uduunnicho seekkino ogeessi aanno biddishsha harunsa hasiissannonte gede, Maganu aannonke biddishshino hagiirsiissannota dancha maate kalaqiˈrate kaaˈlannonke. Maganu seera harunsitannori woˈmanka woyite horo afidhanno.—Isayaasi 48:17, 18.

•   Adhammikkinni siimu xaadooshshe assa buutote qarra abbitara dandiitanno. Lawishshaho, hasiˈnoonnikki godowi gatara, siimu xaadooshshinni saˈˈanno dhibba abbitara, hattono wodanu yaaddo naqqara dandiitanno.

•   Maganu, labbaahunna meyati siimu xaadooshshinni siranno gede dandoo uyinonsa. Heeshsho Maganu albaanni qullaawate; sirate dandoono muxxe eltooti. Maganu isi fushshinoha adhatenna adhamate seera ayirrinse tenne elto naandeemmota leellinshammora hasiˈranno.—Ibiraawoota 13:4.

 Adhanna adhama seekkitannoti, adhammara albaanni mitteenni heeˈnanni “woˈnaala” diˈˈikkitino. Hatteentenni, adhanna adhama seekkannohu minaanninna minaama mimmitoho ammaname heeˈrate murciˈrinorenna qarransa qeelate mitteenni kaaˈlame loosannore ikkirooti. a Adhamansa mimmito cuˈmire heeˈranno gede kaaˈlitannonsa.—Maatewoosi 19:6.

 Guuta galte woy maate dino. Ikkirono, minaanninna minaama Qullaawu Maxaafi amaale harunsannoha ikkiro, hagiirru noota dancha maate kalaqiˈra dandaanno. Hanni mito lawishsha laˈno:

•   Umikki hasattonni roore galtekki hasatto balaxisiisi.—1 Qorontoosi 7:3-5; Filiphisiyusi Sokka 2:3, 4.

•   Mimmito baxxe, hattono ayirrisse.—Efesooni Sokka 5:25, 33.

•   Coyiˈratto coye eemadhi.—Lawishsha 12:18.

•   Cinca ikki; qoleno keeshshittokki gatona yii.—Qolasiyaasi Sokka 3:13, 14.