“Alfanna Omeega” Ayeti Woy Maati?

FANI

Qullaawu Maxaafi mayyaanno?

“Alfanna Omeega” yinoonnihu Woˈmanka Dandaanno Magano Yihowaati. Kuni suˈmi Qullaawu Maxaafi giddo sase bayicho no.—Yohaannisi Ajuuja 1:8; 21:6; 22:13, NW. a

Maganu isonooto “Alfanna Omeega” yiinohu mayiraati?

Alfanna omeega Giriikete Afiira uminna jeefote fidallaati; Ajuujate maxaafano mitteenni amadinoha duucha woyite Haaro Gondooro yinanniha Qullaawu Maxaafi gafa borreessinoonnihu Giriikete Afiinniiti. Tini fidalla Giriikete Afiira hanafotenna jeefote noore ikkitino daafira, Yihowa callu umihanna jeefonniha ikkinota kulate lawishsha ikkitino. (Yohaannisi Ajuuja 21:6) Yihowa hundanni Woˈmanka Dandaanno Maganooti; albillitteno hegerera Woˈmanka Dandaanno Magani isooti. “Hegere hegerera” Maganu iso callaati.—Faarso 90:2.

“Albihunna gedensihu” yinoonnihu ayeti?

Qullaawu Maxaafi giddo Magano Yihowano Beettosi Yesuusano hatto yinoonni; tironsa kayinni addi addiiti. Hanni lame lawishsha laˈno.

Isayaasi 44:6 aana Yihowa togo yiino: “Albihuno gedensihuno aneeti; ane agurranna wolu Magani dino.” Konni qummeeshshi aana Yihowa hegerera isi callu halaalaancho Magano ikkinotanna iso agurranna wolu nookkita xawise coyiˈrino. (Marro 4:35, 39) Konni daafira, konni qummeeshshi aana “albihuno gedensihuno” yaanno qaali “Alfanna Omeega” yaate gedeeti.
Yohaannisi Ajuuja 1:17, 18; 2:8 aana, “Albihunna [alfa ikkikkinni, prootoosi] gedensihu [omeega ikkikkinni, eskihatoosi]” yaanno qaali no. Konni qummeeshshi aana kuni suˈmi, reyinohunna gedensoonni reyotenni kainohu daafira kulannoha ikkinota qooxeessaho noo hedo leellishshanno. Hakko daafira, kuni qummeeshshi Maganu daafira kulannoha diˈˈikkino; korkaatuno Maganu horonta reye diegennino. (Imbaaqoomi 1:12 b) Yesuusi kayinni reyino; hattono reyotenni kaino. (Soqqamaasinete Looso 3:13-15) Reyannokkiha ayyaanu biso uddiˈre reyotenni kaihu gedensaanni iimira haˈrinohu umihu (albihu) isooti; xa hakko “hegere heeshshoha” ikke heeˈranno. (Yohaannisi Ajuuja 1:18; Qolasiyaasi Sokka 1:18) Hakkunni gedensaanni wolootu reyotenni kaˈannohu isi widoonniiti. (Yohaannisi 6:40, 44) Konni daafira, Yihowa umisi reyotenni kayisinohu gedensihu (jeefonnihu) isooti. (Soqqamaasinete Looso 10:40) Tenne hendiro, Yesuusi ‘albihanna gedensiha’ yaamamasi garankolla.

Yohaannisi Ajuuja 22:13 Yesuusi “Alfanna Omeega” ikkinota kultannoni?

Dikultanno. Yohaannisi Ajuuja 22:13 aana coyiˈranni noohu ayetiro bande dikulloonni; tenne fooliishsho aana coyidhanni noori haammataho. Wiiliyami Barkileyi yinanni Pirofeeserichi Ajuujate maxaafiha konne gafa lainohunni coyiˈranni togo yiino: “Hedo borreessinoonnihu taru tarunni diˈˈikkino; . . . coyiˈranni noohu ayetiro bade afano qarraho.” (Ze Rivileeshiini ofi Jooni, Gafa 2, Woyyeessine Qixxeessinoonniha, qoola 223) Konni daafira, Yohaannisi Ajuuja 22:13 aana “Alfanna Omeega” yinoonnihu, Ajuujate maxaafira wole bayicho kulloonniha Magano Yihowa umosi ikkinoti egennantinote.

a Kuni suˈmi Kingi Jemisi Verzhini yinannite Qullaawu Maxaafi tirora shoolki bayicho yaano Yohaannisi Ajuuja 1:11te aanano no. Ikkollana, dirinkera noote rooriidi Qullaawu Maxaafi tirora konni qummeeshshi aana konne suˈma diworroonni; korkaatuno kuni suˈmi angatenni galchinoonnite hundite Giriikete Afii borro aana hakko bayicho nookkihuranna gedensoonni lendoonniha ikkino daafiraati.

b Sidaamu Afiinni qixxeessinoonnite Qullaawu Maxaafi tirora kuni qummeeshshi togo yaanno: “Kaaliiqa Maganoˈya, ati biˈre hundinni kayisse nootto qullaawaatinna hegerera heeˈrattoho. Ninkeno direyineemmo.” Ikkollana, “Ninkeno direyineemmo” yite borreessitinori qullaawa borro galchitinoreeti; umo borreessini woyite qummeeshshu Maganu daafira kulanni, “Ati direyatto” yaanno.