Auala e Ono e Taulau Ai

O LE taulau moni, o le maua lea o se olaga e sili ona lelei, ona o le faatatauina o tapulaa a le Atua e tusa o lona finagalo mo i tatou. Ua faatusa e le Tusi Paia le tagata e faia faapea, “e faapei o le laau ua totō i tafatafa ane o vaitafe, e fua mai ona fua i ona lava tau; e lē toʻulu foʻi ona lau; e manuia foʻi mea uma na te faia.”—Salamo 1:3.

Ioe, e ui ina tatou lē lelei atoatoa ma sesē i nisi taimi, ae e mafai ona tatou taulau i o tatou olaga! Pe manaia lea faamoemoe i lau faalogo? E ono ni manatu e faavae mai le Tusi Paia o loo taʻua i lalo, e aogā ina ia e ausia ai lea sini ma faamaonia ai, o aʻoaʻoga o loo i le Tusi Paia, o le poto moni lea mai le Atua.—Iakopo 3:17.

1 Ia Saʻo le Vaaiga i Tupe

“Auā o le manaʻo tele i tupe o le pogai lea o mea leaga eseese uma, ma o le manaʻo tele i ai, ua . . . tuia ai i latou e i latou lava i le tele o tigā.” (1 Timoteo 6:10) Mātau mai, e lē o tupe le faafitauli, auā e aogā tupe i le tausiga o i tatou ma o tatou aiga, ae o le faafitauli, o le manaʻo tele i tupe. O le manaʻo tele o tagata i tupe ua pulea ai i latou e tupe, ma ua atua i ai.

E pei ona tatou faitau ai i le mataupu muamua i le faasologa o nei mataupu, o ē saʻili i tupe ona e manatu e taulau ai, ua pei o loo taumafai e puʻe se ata lafoia. E lē gata ina lē taulau, ae tele ai foʻi ma tigā. O se faataʻitaʻiga, ua avea le pupū tele o nisi i le saʻilia o ʻoa ma mea ua lē amanaʻia ai o latou aiga ma uō. Ae ua lē lelei le moe a nisi ona o le pupū i galuega, po o le popole naʻuā. Ua faapea mai le Failauga 5:12: “E lelei le moe o lē faigaluega, pe itiiti pe tele ana mea e ʻai; a o le maumea o le mauʻoa e lē mafai ai ona moe o ia.”—Hebrew Names Version.

O ē e pulea e tupe, e oo i ai tigā, ma ua faasesēina i le manatu o le auala lea e maua ai le fiafia. Na taʻua e Iesu Keriso le “malosi taufaasesē o le ʻoa.” (Mareko 4:19) O lona uiga, e foliga mai o le a maua le fiafia ona o ʻoa, ae e leai. Ae e na o le manaʻo tele i ʻoa, e maua ai. “O lē ua manaʻo i tupe, e lē malie o ia i tupe,” e tusa o le Failauga 5:10.—The New English Bible.

O lona uiga, o lē manaʻo tele i tupe, ua faatigā ai e ia o ia lava ma e oo atu ai i faanoanoaga, lē fiafia, pe solitulafono ai foʻi. (Faataoto 28:20) E maua le fiafia ma le taulau i uiga e iai le lima foaʻi, loto faamagalo, amio mamā, alofa, ma iai se faiā lelei ma le Atua.

2 Ati Aʻe le Uiga o le Limafoaʻi

“E sili le fiafia e maua i le foaʻi atu i lo o le talia mai.” (Galuega 20:35) E maua le fiafia pe a foaʻi atu mai lea taimi i lea taimi, a o le tagata e iai le uiga o le limafoaʻi e lagona pea e ia le fiafia. E tele auala e faaalia ai le limafoaʻi. O se auala lelei e faia ai faapea ma sili foʻi ona talisapaia e isi, o le faia lea o se taimi e mafuta ai ma isi ma fai mea mo i latou.

Ina ua māeʻa ni saʻiliʻiliga i uiga e pei o le limafoaʻi, le fiafia, ma le soifua mālōlōina, na taʻua e Stephen G. Post e faapea, e iai le sootaga o le limafoaʻi, le lē manatu faapito ma le fesoasoani i isi, ma le ola umi ma lagona sologa lelei, ma e faaleleia ai le malosi o le tino ma le mafaufau, ae faaitiitia ai lagona mafatia.

E lē gata i lea, o ē e limafoaʻi i mea ua latou maua, e lē matitiva ai. Ua fai mai le Faataoto 11:25: “E faatamaoaigaina le tagata limafoaʻi, ma o lē faasūsū i isi, e faasūsūina o ia.” (New  International Version) Ua ōgatusa na upu ma le manatu e faapea, o ē foaʻi mai le loto, ae lē faatalitalia se taui, e talisapaia ma alofagia i latou e isi, aemaise lava le Atua.—Eperu 13:16.

3 Faamagalo ma le Lotoatoa

“Ia faaauau ona . . . fefaamagaloaʻi ma le lotoatoa pe afai ua faia e se tasi se mea e tigā ai le isi. E pei ona finagalo malie Ieova e faamagalo iā te outou, ia faapea foʻi ona outou fai.” (Kolose 3:13) Ua tele ina leai se loto faamagalo o tagata i nei aso, ma lē faaalia le alofa ae faasili iā i latou le taui ma sui. Ma o le iʻuga, ua faafetaui le ita i le ita, ma le sauā i le sauā.

Ae e lē faapea ua uma ai i ina le faafitauli. Na taʻua i le pepa, The Gazette, i Montreal i Kanata: “E silia ma le 4,600 tagata i le va o le 18 ma le 30 tausaga na faia ai se saʻiliʻiliga ma iloa ai, o le tele o le ita ma le lē fiafia, faapea ma uiga lē alofa e iai i se tagata” o le tele foʻi lea o le afāina o ona māmā. O le mea moni, e sili ona leaga aafiaga o ia uiga leaga, i lo aafiaga o le tagata ulaula! Ioe, e aogā le uiga faamagalo e faaleleia ai faiā ma isi, ma e aogā foʻi i le soifua mālōlōina!

E faapefea ona e matuā faamagalo atu i isi? Ia e tagaʻi totoʻa iā te oe lava. Pe e lē moni ea e iai taimi e te faatigā ai i isi? Ma ina ua latou faamagalo iā te oe, pe e te leʻi talisapaia lo latou faia faapea? O lea la, pe e lē o se mea tatau foʻi la lou matuā faamagalo i isi? (Mataio 18:21-35) E tāua foʻi le ati aʻe o lou pulea o oe lava. A oso aʻe lou ita, ia fai se auala ina ia e toʻa ai. Ma ia e iloa, e lē o se vaivaiga lou pulea o oe lava. Ua fai mai le Faataoto 16:32: “E sili ona lelei o lē ua gesegese i le ita i lē ua malosi.” O le faaupuga lea, e ‘sili ona lelei i lē ua malosi,’ e taʻu mai ai, ua mafai e lea tagata ona pulea o ia lava.

4 Usitaʻia Tapulaa a le Atua

“E mamā poloaʻiga a Ieova, e malamalama ai mata.” (Salamo 19:8) I se faaupuga faigofie, o tapulaa a le Atua e tatou te lelei ai i le tino, mafaufau, ma faalogona. Ma e puipuia ai foʻi i tatou mai mea e afāina ai e iai fualaau faasāina, le onā, amio lē mamā, ma le matamata i ata ma tusi o feusuaʻiga lē mamā. (2 Korinito 7:1; Kolose 3:5) O āuga leaga o  nei mea, e iai le solitulafono, mativa, lē faamoemoeina, malepe o aiga, faafitauli tau i le mafaufau ma faalogona, faamaʻi, ma vave ai ona oti.

Ae o ē usitaʻi i tapulaa a le Atua, e latou te maua mafutaga mamā ma lelei, faapea le fiafia ma le filemu o le mafaufau. I le Isaia 48:17, 18, ua fetalai mai le Atua, o ia “o loo aʻoaʻo iā te oe i mea e aogā, o loo taʻitaʻiina oe i le ala e te ui ai.” Ma ua ia faaopoopo mai: “E! ana uaʻi mai ou taliga i aʻu poloaʻiga, po ua tusa ma se vaitafe lou manuia; ma lau amiotonu, e tusa lea ma peau o le sami.” Ioe, o le finagalo o Lē na faia i tatou ia tatou maua le mea e sili ona lelei. Ma ia tatou ‘ui i le ala’ e maua ai le taulau manuia moni.

5 Ia Alofa ma le Lē Manatu Faapito

“O le alofa e atiaʻe ai.” (1 Korinito 8:1) Pe mafai ona e ola e aunoa ma le alofa? Paga se olaga e leai se uiga, toe leai se fiafia o le a iai! Na faagaeeina le aposetolo Kerisiano o Paulo e faapea: “Afai foʻi . . . e leai soʻu alofa [i isi], ua ou lē aogā. . . . e leai [foʻi] se aogā iā te aʻu.”—1 Korinito 13:2, 3.

O le alofa lea e taʻua i le mau, e lē o le alofa i le va o itupā, e ui e aogā foʻi lea alofa. Ae o loo faasino i le alofa e faavae i taʻiala a le Atua. * (Mataio 22:37-39) E lē gata i lea, e iloa lea alofa ona o galuega ma mea e fai. E tusa o upu a Paulo, o lea alofa, e onosaʻi ma agalelei. E lē fuā, pe gugutu, pe faamaualuga. Ae e saʻili le lelei o isi, ma e lē itaitagofie, ae e loto faamagalo. E ati aʻe ai isi. Ma e fesoasoani iā i tatou ina ia taulau ai a tatou feutagaʻiga ma isi, aemaise lava o tatou aiga.—1 Korinito 13:4-8.

E iloa le alofa o mātua i fanau ona e latou te māfana iā i latou ma avatu taʻiala manino mai le Tusi Paia e faatatau i amio. O fanau e ola aʻe i se aiga faapena, e latou te lagona le saogalemu ma le maopoopo o o latou aiga, ma e latou te lagona e alofagia ma talisapaia i latou.—Efeso 5:33–6:4; Kolose 3:20.

O Siaki, o ia o se talavou mai Amerika na ola aʻe i se aiga e mulimuli i taʻiala mai le Tusi. Ina ua tuua e ia lona aiga, na tusi o ia i ona mātua, ma e faapea se vaega o lana tusi: “O se mea ou te taumafai lava e fai, o le usitaʻi lea i le poloaʻiga [a le Tusi Paia]: ‘Ia e āva i lou tamā ma lou tinā . . . ina ia manuia ai oe.’ (Teuteronome 5:16) Ua lelei loʻu olaga ona o loʻu usitaʻi i na upu. Ma ua ou malamalama lelei ai, ua ou lelei ona o ā oulua taumafaiga filigā ma le alofa. Faafetai tele mo ā oulua galuega i le lagolagoina ma le tausia o aʻu.” Afai o oe o se matua, faamata o le ā sou lagona pe a e maua se tusi faapena? Pe e te lē lagona ai ea le matuā faafiafiaina?

O le alofa e faavae i taʻiala, e “fiafia i le mea moni,” po o upu moni mai le Tusi Paia. (1 Korinito 13:6; Ioane 17:17) O se faaaʻoaʻoga: Ua filifili se ulugalii o loo faalētonu le la faaipoipoga e faitau faatasi i upu a Iesu i le  Mareko 10:9: “O ē ua faatasia e le Atua, aua neʻi tuueseeseina e se tagata.” Ua tatau loa ona suʻesuʻe ifo i o la loto. Pe moni lo la “fiafia i le mea moni”? Pe e vaai i le la faaipoipoga e pei ona silasila i ai le Atua, o se mea e paia, ma ia faia faapena? Pe e taumafai ma le alofa ina ia faaleleia o la faafitauli? O le a taulau le la faaipoipoga pe a faia faapea, ma olioli ai i a la taumafaiga.

6 Ia Naunau i Mea Faaleagaga

“E fiafia o ē naunau i mea faaleagaga.” (Mataio 5:3) E eseese tagata ma manu, ona e mafai e tagata ona malamalama i mea faaleagaga. O le māfuaaga lea ua tatou fia iloa ai tali o nei fesili: O le ā le fuafuaga na fai ai le tagata? Pe iai se Isi na faia mea uma? O le ā e tupu pe a tatou feoti? O le ā lo tatou lumanaʻi?

Ua faitau miliona tagata o loo saʻili i le mea moni, ua latou mauaina tali o nei fesili mai le Tusi Paia. O se faataʻitaʻiga, e iai le sootaga o le fesili mulimuli ma le finagalo o le Atua mo tagata. O le ā lona finagalo? Ia avea le lalolagi ma parataiso e faavavau e ola ai tagata e alolofa i le Atua ma usitaʻi i ana tapulaa. Ua fai mai le Salamo 37:29: “E fai lava le nuu mo tagata amiotonu, e nonofo ai pea i latou.”

Ua manino la, o le finagalo o Lē na faia i tatou, ia lē gata mai le manuia tatou te maua i tausaga e 70 pe 80. A ia manuia e faavavau! Ia e aʻoaʻoina nei loa e faatatau i Lē na faia oe. Na fetalai Iesu: “Ina ia maua le ola e faavavau, e tatau ona latou iloa lelei oe, le Atua moni e toʻatasi, atoa ma Iesu Keriso, o lē na e auina mai.” (Ioane 17:3) A e iloa lelei le Atua ma faatatauina lea poto i lou olaga, ona e iloa ai lea: “O le faamanuia a Ieova, o lea e faatamaoaiga aʻi; na te le faaopoopo i ai se tigā.”—Faataoto 10:22.

[Faaopoopoga i lalo]

[Pusa i le itulau 23]

O NISI TAʻIALA E TAULAU AI

▪ Ia e mataʻu i le Atua. “O le mataʻu iā Ieova, o le amataga o le poto lea.” —Faataoto 9:10.

▪ Filifili lelei au uō. “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.”—Faataoto 13:20.

▪ Soia le soona ʻai ma soona inu. “Auā o lē inu tele ma ʻai tele e faamativaina o ia.”—Faataoto 23:21.

▪ Aua le taui ma sui. “Aua le taui atu le leaga i le leaga i se tasi.”—Roma 12:17.

▪ Ia Toʻaga. “Afai e lē fia galue se tasi, aua neʻi ʻai o ia.”—2 Tesalonia 3:10.

▪ Faatatau le Tulafono Faaauro. “O mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

▪ Ia pulea lou laulaufaiva. “O lē e naunau i le ola ma iloa aso lelei, ia pulea lona laulaufaiva mai le tautala i mea leaga.”—1 Peteru 3:10.

[Pusa/Ata i le itulau 24]

O LE ALOFA O SE VAILAAU AOGĀ

Ua tusi faapea Dean Ornish, o se alii fomaʻi ma o se tusitala: “O lagona alofa ma faalogona māfana, e mafai ona malosi ai pe maʻi ai foʻi, e lagona ai le faanoanoa po o le fiafia, ma e ala mai ai le mafatia pe toe malosi ai foʻi. Ana faapea e iai se vailaau e aogā faapenā, e avatu e fomaʻi uma i a latou maʻi. Afai ae lē aveina e le fomaʻi i ana maʻi, e tusa ua solitulafono o ia.”

[Pusa/Ata i le itulau 25]

SA LEAGA AE UA TAULAU

Na alu Milanko i le taua, ina ua pa le taua i lona atunuu i Balkans i Europa. O ona uiga toa na taʻu ai o ia o Rambo, ona o le igoa lenā o le tama autū o se ata lauiloa. Peitaʻi ane, na oo ina lē fiafia Milanko i le vaegaau ona o le piʻopiʻo ma le pepelo o tagata. Na tusi mai o ia e faapea, “O inā la na amata ai loa ona ou faaaogā le ʻava malosi, ulaula, faaaogā fualaau faasāina, pelē tupe, ma fai feusuaʻiga lē mamā. Na tumu loʻu olaga i le leaga, ae ou te lē iloa pe faapefea ona faalelei.”

Na faitau e Milanko le Tusi Paia i lea taimi faigatā o lona olaga. Mulimuli ane, a o asiasi atu i se alii e la te tauusoga, na vaai ai i se Olomatamata, o le mekasini e lomia e Molimau a Ieova. Na fiafia o ia i mea na faitau ai ma e leʻi umi ae latou suʻesuʻeina le Tusi Paia ma Molimau a Ieova. Na maua e ia le fiafia ma le taulau ona o upu moni o le Tusi Paia. Ua fai mai o ia, “Na faamalosia ai aʻu, ma ua tuu uma ai aʻu masaniga leaga ae faaleleia oʻu uiga, ma papatisoina e avea ma Molimau a Ieova. Ua lē o toe taʻuina aʻu o Rambo e tagata matou te masani, ae ua valaau aʻu i loʻu igoa sa iai a o ou laʻitiiti, ona o oʻu uiga agamalu.”