Ua Fesili Mai Talavou

Pe Ou te Alu e Taʻu Laʻu Uō?

“O le faigatā ia. Ona e lelei le ma faigāuō.”—Simi. *

“E leʻi fia talanoa mai aʻu uō iā te aʻu. E leai ma se isi na fiafia mai talu ai loʻu taʻuina o le mea na tupu.”—Ana.

UA FAI mai le Tusi Paia: “O i ai le tagata alofa e sili ona pipii mai i lo le uso.” (Faataoto 18:24) Pe e iai sau uō faapena? O lona uiga la ua e maua se mea e sili ona lelei.

Ae ā pe afai o lau uō o se Kerisiano, ae ua ia faia se mea sesē? O se faataʻitaʻiga, atonu ua faia e ia feusuaʻiga lē mamā, pe ulaula, pe inu ʻava ae e leʻi faatagaina, faaaogā fualaau faasāina, pe faia se isi amio sesē. (1 Korinito 6:9, 10; 1 Timoteo 1:9, 10) O le ā lau mea a fai? Pe talanoa i lau uō? Pe taʻu i ou mātua? Pe taʻu i mātua o lau uō? Pe taʻu i toeaina o le faapotopotoga? * Ae afai e taʻu, o le ā o le a tupu i le lua faauōga? Pei e sili ai le aua le taʻuina?

E Taʻu pe Leai?

E leai se isi e sao mai le faia o se mea sesē. Ioe, ua faapea mai le Tusi Paia: “Ua agasala tagata uma lava, ma ua lē ausia le mamalu o le Atua.” (Roma 3:23) Peitaʻi ane, ua faia e nisi ni agasala matuiā. Ae o isi ua latou ‘uia se laasaga sesē’ ma afai ae lē faasaʻoina, e ono tupu ai se faalavelave. (Kalatia 6:1) Ia mātau mai se mea moni na tupu.

▪ Na iloa e Susana, o se talavou Kerisiano, ua fai e lana uō, o se isi foʻi Kerisiano, ia se vaega tau i fesootaʻiga i le Initaneti e iai ata faatosina ma pese e taʻu ai feusuaʻiga.

O le ā sou manatu?: O le ā lau mea e fai pe ana faapea o oe o Susana? Pe iai sau mea e fai i lea mea? Pe e te faapea ifo, e pule lava lau uō i ana faamatalaga i le Initaneti? Afai e talanoa atu Susana iā te oe mo se fesoasoani, o le ā lau fautuaga e fai i ai?

․․․․․

Le filifiliga a Susana: Sa mafaufau Susana i le mataupu, ma filifili ai e lelei ona talanoa i mātua o lana uō. Fai mai o ia, “O le faigatā  ia ona ou talanoa i ai ona e lelei foʻi le matou masaniga. Na teʻi lava ua maligi ai ma oʻu loimata ona o le faigatā o le mataupu.”

O le ā sou manatu? Pe na saʻo le mea na fai e Susana? Pe, na sili ai le aua le pisa?

O vala nei o le a aogā iā te oe e te manatunatu i ai:

O le ā e faia e se uō moni? Ua faapea mai le Faataoto 17:17: “E alofa le uō i aso uma lava; a e fanau le uso mo le aso vale.” O lē e faia se mea e solia ai taʻiala a le Tusi Paia, e tusa ua maua o ia i le “aso vale,” pe faia ma lona iloa pe leai foʻi. E lē o se mea lelei le fia “amiotonu naʻuā” pe afai o nai faaletonu laiti, ae i le isi itu, e lē o oe o se uō moni pe afai e te faalēano ae ua fai e lau uō amioga e lē faa-Kerisiano. (Failauga 7:16) E lē tatau lava ona tuu ai pea e te lē ano i ai.—Levitiko 5:1.

Ae ā pe ana faapea o oe lea na faia le mea sesē? Ia e fesili ifo: ‘Pe afai o aʻu o se matua ma o loo fai faamatalaga faatosina a laʻu tama i le Initaneti, faamata ou te manaʻo ia taʻu mai e se isi iā te aʻu? O le ā soʻu lagona pe afai ua iloa e le uō a laʻu tama le mea ua tupu, ae lē taʻu maia iā te aʻu?’

Ae faapefea taʻiala a le Atua? O le mea e tatau ona fai, e ao lava ona taʻu. E ao ona mulimuli i taʻiala tau amio a le Atua ua faatulaga mai i le Tusi Paia. O le a faafiafiaina le finagalo o Lē na faia oe pe afai e te lagolagoina le mea saʻo. (Faataoto 27:11) Ma o le a e fiafia foʻi ona ua e iloa na e faia le mea e lelei ai lau uō.—Esekielu 33:8.

O “Ona Pō e Tautala Ai”

Ua faapea mai le Tusi Paia, e iai “ona pō e faalologo ai, ma ona pō e tautala ai.” (Failauga 3:7) E masani i fanau iti ona lē iloa tonu le mea e ao fai pe a tupu mai se mea. Afai ua fai e lana uō se mea sesē, atonu e manatu e faapea: ‘Ou te lē taʻua i ona mātua ina neʻi fasi o ia’ pe, ‘Ou te lē taʻuina ina neʻi ita o ia iā te aʻu.’ E lē faigatā le filifiliga pe ana faapea e na o le pau ia o vala e popole i ai, ma o le taimi la lea e aogā ai le “faalologo,” e lē taʻuina i se isi le mea na tupu.

Ae a o faasolo ina e matua, ua faasolo foʻi ina e tagata matua i ou manatu. Ua e iloa ua faalētonu lau uō ma o loo ia manaʻomia se fesoasoani, ae e mafai ona e suʻe maia se fesoasoani mo ia. I se isi faaupuga faigofie, o le ā lau mea e fai pe afai ua e iloa ua fai e lau uō se mea sesē ma soli ai tulafono ma taʻiala a le Tusi Paia?

Muamua lava, ia e mautinoa pe saʻo le mea na e faalogo i ai. Atonu ua na o ni tala e lē moni. (Faataoto 14:15) Na taʻua e se talavou e igoa iā Katie se mea na tupu e faapea: “Na fai e se isi e ma te uō ni tala pepelo e uiga iā te aʻu, ma na talitonu i ai tagata e matou te uō lelei. Na ou popole ona, ailoga a toe talitonu se isi iā te aʻu!” Na valoia e le Tusi Paia e faapea, “e lē aoai [Iesu] e tusa ma le faafofoga o ona taliga,” pe, e tusa ma le faaliliuga Contemporary English Version, “e lē . . . fia faalogo [Iesu] i talasalatua.” (Isaia 11:3) O le ā se lesona mo i tatou? Aua le vave ona e talitonu i mea uma e te faalogo i ai. Ia vaai pe moni. Seʻi mātau mai se mea moni na tupu.

▪ Na taʻua i le amataga o le mataupu e faapea, na faalogo Simi na faaaogā e lana uō fualaau faasāina i le patī.

O le ā sou manatu?: O le ā lau mea e fai pe  ana o oe o Simi? E faapefea ona e iloa pe moni le tala?

․․․․․

Le filifiliga a Simi. Muamua lava, na pei Simi o se tagata e na te lē iloa se tala pe iloa foʻi le mea na tupu. Ona fai mai lea o ia, “Ae ua faalavelave mai lava loʻu loto fuatiaifo. Na ou lagona, e tatau lava ona ou talanoa i laʻu uō.”

O le ā sou manatu? O le ā se aogā o lou talanoa muamua i lē ua faia se mea e lē tatau i se Kerisiano ona faia?

․․․․․

Afai e faigatā ona e talanoa i ai, faamata o le ā se isi mea e mafai ona e faia?

․․․․․

Na ioe le uō a Simi, e saʻo na ia faaaogā fualaau faasāina i le patī. Ae na ia talosaga ane iā Simi e aua le taʻuina i se isi. Peitaʻi ane, na manaʻo lava Simi e fai le mea saʻo. Ma na manaʻo foʻi ia faia e lana uō le mea saʻo. O lea la, na fai o ia i lana uō o le a tuu atu se vaiaso e alu ai e talanoa i le ʻautoeaina. A lē alu, o le a alu loa Simi e talanoa i le ʻautoeaina.

Pe na fetaui le mea na faia e Simi? I le ā le itu?

․․․․․

E leʻi fia talanoa le uō a Simi i toeaina, ma na oo atu loa Simi e talanoa iā i latou. Mulimuli ane, na toe saʻo le vaaiga a le uō a Simi. Ma na mafai ona fesoasoani toeaina iā te ia ina ia salamō ma ia toe iai se faiā lelei ma Ieova.

O Lona Uiga, o Oe e Faitatala?

Atonu o le a e faapea ifo: ‘E taʻu aʻu o le faitatala pe a ou alu e taʻu laʻu uō. Pe lē sili ai ona ou faatagā lē iloa le mea ua tupu?’ Afai ae oo se mea faapena iā te oe, o le ā lau mea e fai?

Muamua lava, o le mea faigofie le nanā po o le lē pisa i le mea ua tupu, ae e lē o se alofa moni. Ia e faamalosi e taʻu le mea sesē ua fai e lau uō. Tatalo i le Atua e tusa o lea mataupu. Talosaga atu mo le poto ma le lototele e fai ai le mea tonu. O le a fesoasoani mai o ia iā te oe.—Filipi 4:6.

Lona lua, ia e mafaufau i aogā o lou taʻuina i toeaina. O se faataʻitaʻiga, seʻi faapea o lea e lua te feʻaʻei ma lau uō i se aʻega maualuga, ae teʻi ua see o ia ma paʻū i lalo, ma ua ia manaʻomia ai lava se fesoasoani. Ae faapefea pe afai e mā lau uō e lē manaʻo e te fesoasoani atu, ae o le a taumafai lava ia e toe aʻe atu i luga? Po o le a tuu lava e faitalia o ia, ma tupu ai lava ma le faalētonu?

E faapena le tulaga o se uō e sipa ese mai le ala faa-Kerisiano. Atonu e iā te ia le manatu e mafai lava e ia ona toe faaleleia le la faiā ma Ieova. Ae e sesē lea manatu. Atonu e lagona e lau uō le mā ona o le mea ua tupu. Ae o le a aogā lou oo atu e suʻe se fesoasoani ina ia faasaoina le ola o lau uō!—Iakopo 5:15.

O lea la, aua le matamuli e tautala i le saʻo pe afai ua fai e lau uō se mea sesē. O lou fesoasoani atu iā te ia, e faaalia ai lou faamaoni iā Ieova le Atua ma lou faamaoni foʻi i lau uō, ma atonu e iai se aso e na te faafetaia ai lau mea na fai ona o lou alofa.

[Faaopoopoga i lalo]

MEA E MAFAUFAU I AI

▪ Ua faapefea ona iloa lou faamaoni i lau uō ona ua e taʻu lana mea sesē na faia?

▪ O ai tagata i le Tusi Paia na tofotofoina lo latou faamaoni i a latou uō? O ā lesona ua e aʻoaʻoina mai iā i latou?

[Ata i le itulau 29]

Pe afai ua paʻū ese lau uō mai le ala faa-Kerisiano, ia e fesoasoani iā te ia