I TAIMI o le Tusi Paia, e vaai e le auauna pule le aiga po o meatotino a le isi tagata. O le upu Eperu ma le upu Eleni ua faaliliuina ai le “auauna pule,” e faasino atu i nisi taimi i se ovasia po o se tagata e pule i le aiga.

A o fai Iosefa le atalii o Iakopo ma pologa i Aikupito, na avea o ia ma auauna pule i le aiga o lona matai. O le mea moni, na avatu e le matai Aikupito “le pule o ana mea uma i lima o Iosefa.” (Kene. 39:2-6) Mulimuli ane, ina ua fai Iosefa ma se tasi o pule aloaʻia i Aikupito, na ia tofia ai se auauna pule e vaaia lona aiga.​—Kene. 44:4.

I taimi o Iesu, o tagata e ona fanua, e masani ona nonofo i aai e mamao ese mai i a latou faatoʻaga. O lea, na tofia e i latou e ona fanua auauna pule, e vaaia i aso taʻitasi galuega a tagata faigaluega e galueaʻiina fanua.

O ai na agavaa e avea o se auauna pule? Na taʻua e Columella o se tusitala Roma i le uluaʻi senituri, e faatatau i se pologa e tofia e avea ma ovasia po o se auauna pule, “o se tasi e iai le poto masani i galuega i le faatoʻaga.” O se tasi foʻi “e lē faatalalē i le faatinoina o lana pule ma e lē sauā.” Na ia faapea atili mai: “Ae o le mea e sili ona tāua mo se auauna pule, e lē tatau ona ia manatu e na te iloa mea uma, ae e naunau e fia iloa mea fou.”

O loo faaaogā i le Tusi Paia faaaʻoaʻoga ma galuega a se auauna pule, e faaata mai ai nisi o mea o loo tutupu i le faapotopotoga Kerisiano. O se faaaʻoaʻoga, na faalaeiau e le aposetolo o Peteru Kerisiano e faaaogā o latou tomai mai i le Atua, “e auauna ai le tasi i le isi e pei o auauna pule lelei o le agalelei faifua o le Atua.”​—1 Pete. 4:10.

Na faaaogā e Iesu le faaaʻoaʻoga o se auauna pule i lana talafaatusa i le Luka 16:1-8. E lē gata i lenā, i le valoaga e faatatau i le faailoga o le avea o Iesu ma Tupu, na ia faamautinoa atu ai i ona soo o le a ia tofiaina le “pologa faamaoni ma le faautauta” po o le “auauna pule e faamaoni.” O le galuega autū a le auauna pule, o le saunia lea o meaʻai faaleagaga mo soo o Keriso i le taimi o le iʻuga. (Mata. 24:45-47; Luka 12:42) E tatou te matuā talisapaia le mauaina o lomiga ua saunia e le auauna pule faamaoni, ma ua mafai ona maua i le lalolagi atoa.