Ndoshta të tërheq ideja të ndryshosh menjëherë çdo gjë në jetë. Mendon me vete: «Këtë javë do të lë duhanin, nuk do të shaj më, do të fle më herët, do t’i futem fizkulturës, do të filloj të ha shëndetshëm dhe do t’u telefonoj gjyshërve.» Por, nëse përpiqesh t’i arrish të gjitha synimet njëherësh, me siguri nuk do të arrish asnjërin.

Njeriu modest është realist. E pranon që koha, energjia dhe të ardhurat e tij kanë kufij. Prandaj, në vend që të ndryshojë çdo gjë njëherësh, i bën ndryshimet pak nga pak.

Përpiqu t’i ndryshosh zakonet duke vënë synime realiste. Hapat e mëposhtëm mund të të ndihmojnë.

1. Bëj një listë të zakoneve të mira që do të doje të zhvilloje dhe një listë të zakoneve të këqija që do të doje të hiqje. Mos u kurse; shkruaji të gjitha ato që të vijnë në mendje.

2. Vendos përparësitë në çdo listë, duke u vënë numra sipas rëndësisë që kanë për ty.

3. Zgjidh disa zakone nga secila listë, qoftë një ose dy, dhe përqendrohu tek ato. Pastaj kalo te një ose dy zakone të tjera.

Përshpejtoji ndryshimet, duke zëvendësuar një zakon të keq me një të mirë. Për shembull, nëse në listën e zakoneve të këqija është shikimi pa karar i televizorit dhe në listën e zakoneve të mira është koha që duhet të kalosh me të afërmit, mund të vendosësh: «Në vend që të ndez televizorin sa herë kthehem nga puna, do të komunikoj me një mik ose të afërm.»