Ka Bibeleng lentswe “moya” ke phetolelo ya lentswe la Seheberu, neʹphesh le ya Segerike, psy·kgeʹ. Lentswe la Seheberu le bolela “Sebopuwa se hemang” mme la Segerike le bolela “ntho e phelang.”  a Ka hoo, moya ke sebopuwa, eseng ntho e ka hare ho sona e pholohang ha mmele o shwa. Hlokomela ka moo Bibele e bontshang ka teng hore moya wa motho ke motho ka boyena:

•   Ha Jehova Modimo a ne a bopa motho wa pele, e leng Adama, Bibele e re ‘motho e ile ya eba moya o phelang.’ (Genese 2:7, Bibele ya Sesotho) Adama ha aa ka a fuwa moya​—e ile ya eba moya o phelang, kapa motho.

•   Bibele e re moya o ka sebetsa, wa lakatsa dijo, wa ja, wa mamela melao le ho tshwara setopo. (Levitike 5:2; 7:20; 23:30; Deuteronoma 12:20; Baroma 13:1) Dintho tseo tsohle di ka etswa ke motho.

Na moya o wa shwa?

 E, moya o wa shwa. Ditemana tse ngata tsa Bibele di re moya o wa shwa. Mehlala e seng mekae ke ena:

•   “Moya o etsang sebe ke wona o tla shwa.”​—Ezekiele 18:4, 20, Bibele ya Sesotho.

•   Iseraele ya boholoholo, kotlo ya sebe se seholo e ne e le hore “moya o kgaolwe.” (Exoda 12:15, 19; Levitike 7:20, 21, 27; 19:8, King James Version) Motho ya entseng sebe seo o ne a “bolawa.”​—Exoda 31:14, King James Version.

•   Ditemana tse ding tsa Bibele di sebedisa lentswe ‘moya o shweleng’ ha di bua ka setopo sa motho. (Levitike 21:11; Numere 6:6) Le hoja diphetolelo tse ngata tsa Bibele di sebedisa mantswe a reng “mmele o shweleng” kapa “motho ya shweleng” ditemaneng tseo, Seheberu se sebedisa lentswe neʹphesh, kapa “moya.”

“Moya” o bolela “bophelo”

 Ka Bibeleng, lentswe “moya” le boetse le bolela “bophelo.” Ka mohlala, Jobo 33:22 e sebedisa lentswe la Seheberu “moya” (neʹphesh) ha e bua ka “bophelo.” Ka ho tshwanang, Bibele e bontsha hore moya wa motho kapa bophelo, bo ka ba kotsing kapa ba lahleha.​—Exoda 4:19; Baahlodi 9:17; Bafilipi 2:30.

 Tsela eo lentswe “moya” le sebediswang ka yona, e re thusa ho utlwisisa ditemana tseo ho tsona ho thweng moya “o wa tswa.” (Genese 35:18; King James Version) Mokgabo puo ona o bontsha hore bophelo ba motho bo a fela. Diphetolelo tse ding di hlalosa polelo ena e ho Genese 35:18 ka ho re, “o ile a phefumoloha la ho qetela.”​—Good News Translation; New Jerusalem Bible.

Tumelo ya hore moya ha o shwe e tswa hokae?

 Madumedi a Bokreste a dumelang hore moya ha o shwe, ha aa nka tumelo ena ka Bibeleng empa a e nkile filosofing ya boholoholo ya Bagerike. Encyclopædia Britannica e re: “Ha Bibele e bua ka moya e re o amana le ho hema mme ha e bontshe ho na le phapang pakeng tsa moya le mmele. Maikutlo a Bakreste a hore ho na le phapang e kgolo pakeng tsa moya le mmele, a tswa ho Bagerike ba boholoholo.”

 Modimo ha a dumelle hore dithuto tsa hae di kopanngwe le difilosofi tsa batho, tse kang ho dumela hore moya ha o shwe. Ho e na le hoo, Bibele e ya lemosa: ‘Hlokomelang hore ho se ke ha eba le e mong ya tla le nka jwalo ka phofu ya hae ka filosofi le thetso ya lefeela ho ya ka neano ya batho.’​—Bakolose 2:8; Bibele​—Phetolelo e Ntjha.