Na re ka kgodiseha hore ditshepiso tsohle tsa Modimo di tla fela di phethahale? Jesu yena o ne a kgodisehile, mme o ile a ruta le batho hore le bona ba kgodisehe. Hlokomela papiso ena eo Jesu a ileng a fana ka yona Thutong ya hae ya Thabeng, e hlahang ho Matheu 5:18 e reng: “Etswe kannete ke re ho lona lehodimo le lefatshe di ne di tla feta kapele ho e na le hore ho hang tlhaku e le nngwe e nyenyane ka ho fetisisa e tlohe Molaong mme dintho tsohle di sa etsahale..”

Alfabete e nyenyane ka ho fetisisa ya Seheberu e leng י (yod), ke yona ya ho qala ho ditlhaku tse nne tsa Seheberu tse emelang lebitso la Modimo le ikgethang e leng Jehova. * Bangodi le Bafarisi ba ne ba nka “alfabete” e nngwe le e nngwe e na le bohlokwa bo tshwanang le ba mantswe le di alfabete tse molaong wa Modimo.

Jesu o ne a bolela hore lehodimo le lefatshe, di ne di ka feta haeba ho ka ba le ntho e ngotsweng Molaong e sa phethahaleng. Le ha ho le jwalo, Bibele e re tshepisa hore lehodimo le lefatshe di ke ke tsa senngwa le ka mohla. (Pesaleme ya 78:69) Ka mantswe a mang, sena se re bontsha hore ho ne ho se Molao le o le mong o neng o ke ke wa phethahala.

Na Jehova Modimo o nka dintho tsohle e le tsa bohlokwa? Ka sebele ho jwalo. Nka ka mohlala: Baiseraele ba ne bolelletswe hore ba se ke ba roba le ha e le lesapo le le leng la konyana ya Paseka. (Exoda 12:46) Mohlomong ba ne ba sa utlwisise lebaka leo ba neng ba sa lokela ho etsa sena ka lona. Empa Jehova Modimo o ne a nka ho etsa sena e le habohlokwa, ka ha o ne a tseba hore ke boprofeta ba hore ha Mesia a bolawa thupeng ya tlhokofatso, ha ho lesapo le ha e le lefe la hae le neng le tla rojwa.​—Pesaleme ya 34:20; Johanne 19:31-33.

Kahoo mantswe a ho Matheu a re fa kgodiseho e feletseng ya hore ditshepiso tsohle tsa Modimo di tla phethahala ho bata kapa ho tjhesa.