Rosie o re: “Ke ne ke sala ke eme le monna wa mateneng ka ho dula ke nahana ka dintho di hana ho fela.” Ke ditemana dife tsa Bibele tse mo thusitseng? E nngwe ya tsona ke Matheu 6:34: “Le ka mohla le se ke la tshwenyeha ka letsatsi le hlahlamang, etswe letsatsi le hlahlamang le tla ba le matshwenyeho a lona. Letsatsi ka leng le lekanwa ke bobe ba lona.” Rosie o re mantswe ao a Jesu, a mo thusitse ho kgaotsa ho nna a ngongoreha ka se ka nnang sa mo etsahalla ka moso. O phaella ka hore: “Ke leka ho rarolla mathata ao ke kopanang le ona letsatsi le letsatsi, ke tlohetse ho ingamangama ka dintho tse so etsahale le tseo ke se nang bonnete ba hore di tla ke di etsahale.”

Yasmine le yena ka tsela e tshwanang o ne a tshwenyaha ho feta tekano. O di beha tjena: “Ke ne ke na le ho qeta matsatsi a mmalwa ntse ke lla, ebile ke hlobaela le masiu. Ke ne ke utlwa hore jwale tjee, ke tla shwa ke ho nna ke tshwenyeha ho tlola.” Yena o thusitswe ke lengolo lefe? O re o thusitswe ke 1 Petrose 5:7 e reng: ‘Lahlelang matshwenyeho ohle a lona ho [Modimo], hobane o a le tsotella.’ Yasmine o re: “Ha nako e ntse e ya, ke ile ka dula ke rapela Jehova mme a arabela dithapelo tsa ka. Ke ile ka utlwa ebile hore etlo! yaka ho na le boima bo tlositsweng mahetleng aka mona. Ke nnete hore ka nako tse ding ntse ke na le ho tshwenyeha tjena, empa bonyane ke se ke tseba hore na ke etseng.”

Isabella o re: “Ke nahana hore ha e le hantle ho dieha ho etsa dintho, ke lefutso hobane esita le Ntate waka o jwalo. Ke tlohela ho etsa dintho tsa bohlokwa bakeng sa hore feela ke ikgatholle kapa ke shebelle TV. Ona ke mokgwa o kotsi le o mobe hobane o etsa hore motho a be le kgatello ya maikutlo hape a se ke a etsa mosebetsi o motle.” Molaomotheo o mo thusitseng ke o fumanwang ho 2 Timothea 2:15, e reng: “Etsa sohle se matleng a hao ho itlhahisa o amoheleha ho Modimo, mosebetsi eo ho seng letho leo a ka hlajwang ke dihlong ka lona.” Isabella o re: “Ke ne ke sa batle hore Jehova a hlajwe ke dihlong ha a sheba mosebetsi waka ka lebaka la ho dieha ho o etsa.” Ka nnete Isabella o ntlafaditse haholo feela.

Kelsey le yena o ne a na le mathata a tshwanang, o re: “Ke ne ke tlohela ho etsa projeke eitseng ho fihlela motsotsong wa ho qetela. O ne o tla fumana ke lla, ke hlobaela bosiu ke bile ke ba le kgatello ya maikutlo. Ka nnete boo e ne e se bophelo bo ntoketseng.” Kelsey yena o thusitswe ke Liproverbia 13:16 e reng: “E mong le e mong ya masene o tla sebetsa ka tsebo, empa ya hlokang kelello o tla hasanya bowatla hohle.” Ha a hlalosa kamoo ho nahanisisa ka lengolo leo ho mo thusitseng kateng, o re: “Le nthusitse ho bona hore ke bohlale ho rera dintho esale pele le ho bona hore na di tla sebetsa. Hona jwale ke na le bukanyana ya ho ngolla dintho tseo ke batlang ho di finyella eo ke e behang deskeng yaka. Sena se nthusitse hore ke tlohele ho etsa dintho ho fihlela motsotsong wa ho qetela.”

Kirsten o re: “Monna waka o ile a ntshiya le bana ba bane.” Ebe Kirsten yena o thusitswe ke Lengolo lefe? Ke Liproverbia 17:17 e reng: “Motswalle wa nnete o lerato ka dinako tsohle, mme ke morabo motho ya tswaletsweng ha ho na le mahlomola.” Kirsten o ile a batla thuso ho badumedimmoho le yena. O ile a fumana thuso ya mofuta ofe? “Metswalle eo ke ileng ka e fumana ho badumedimmoho le nna, e ile ya mphallela ka ditsela tse ngata. E meng e ne e nthekela korosari ha e meng e ne e ntshiela malomo monyako. Kgafetsa batho ba ne ba ye ba re thuse dinakong tseo re neng re fallela dibakeng tse sa tshwaneng. Motho e mong o ile a ba a nthusa le ho fumana mosebetsi. Metswalle yaka e ne e dula e le teng ha ke e hloka.”

Delphine eo re buileng ka yena dihloohong tse fetileng le yena ka tsela e tshwanang o ile a jowa ke bodutu ka nako eitseng. Ka mora hore a lahlehelwe ke tsohle o re: “Ke ne ke ikutlwa hore jwale ke motwaitwai o se nang mang wee.” Pesaleme ya 68:6 ke yona e ileng ya mo thusa ka ha e re: “Modimo o etsa hore batho ba metwaitwai ba dule ka tlung.” O tswela pele ka hore: “Ke ne ke utlwisisa hore temana ena ha e bue ka ntlo ya sebele. Ho e na le hoo, e bua ka hore Jehova Modimo o re fa lehae la tshwantshetso ka hara batho ba mo rapelang, e leng moo motho a ka ikutlwang a sireletsehile a bile a ratwa. Empa ke ne ke tseba hore ke lokela ho ba motswalle wa Jehova pele ke etsa setswalle le batho ba mo rapelang. Kahoo, Pesaleme ya 37:4 e ile ya nthusa boemong bona. E re: ‘Hape o ithabele ka ho phethehileng ho Jehova, o tla o fa tseo pelo ya hao e di kopang.’”

O phethela ka hore: “Ke ile ka hlokomela hore ke ne ke itlhokela feela ho itshwarelletsa ka Jehova. Ke motswalle ya molemo ka ho fetisisa eo motho a ka bang le yena. Yaba ka mora moo, ke ngola lethathamo la dintho tseo nka di etsang e le hore ke ithabise le barapedimmoho, e leng metswalle ya sebele. Ke ile ka ithuta ho iphapanyetsa diphoso tseo ba bang ba di etsang mme ka sheba dintho tse ntle feela ho bona.”

Ke nnete hore esita le batho ba sebeletsang Modimo le bona ha ba a phethahala. Dipaki Tsa Jehova le tsona di ntse di na le mathata jwalo ka motho e mong le e mong. Empa re thabela ho tseba hore Bibele e kgothalletsa batho hore ba thuse ba bang nako le nako ha monyetla o hlaha. Ke bohlale ho etsa metswalle e jwalo. Le ha ho le jwalo, na ebe melaomotheo ya Bibele e ka thusa hape le mathateng a ke keng a rarolleha, jwalo ka malwetse a sa foleng le ho utlwa bohloko ka lebaka la ntho e re hlahetseng e sa tloheng kelellong?