Angela, oa Suriname, o ile a etela lehae la likhutsana le pel’a moo a lulang. Mookameli oa lehae leo e ne e le morali’abo rōna ea seng a sa kopanele tšebeletsong, kahoo o ile a re Angela a bolelle bana bao litaba tse molemo. Angela o ile a buisana le bana ba 85 ’me a ba bontša livideo tse ho jw.org. Hamorao, o ile a khannela ba bangata thuto. Bo-pula-maliboho ba babeli ba ile ba mo  thusa ’me e mong le e mong a ruta sehlopha sa hae. Morali eo oabo rōna ea seng a sa kopanele tšebeletsong o ile a re o ruta bana bao lipina ebile o ba balla lipale tsa Bibele bosiu. O ile a re o labalabela ho ea libokeng, empa a ke ke a siea bana bao ba 85 ba le bang. Ka lebaka leo, ho ile ha etsoa litokisetso tsa hore kaofela ba ee Holong ea Muso. Kaha lehae leo la likhutsana le ne le le haufi le Holo ea ’Muso, barab’abo rōna ba ne ba ba khahlametsa. Hona joale morali’abo rōna hammoho le bana bao ba 85 ba tla libokeng kamehla.

Ha Gabriel ea lilemo li tšeletseng a le tseleng e tsoang kopanong Paraguay, o ile a nahanisisa ka bohlokoa ba ho bolela litaba tse molemo tsa ’Muso. Eaba oa hopola hore a ka rata ho ba le ntate-moholo oa hae Paradeiseng. Empa ntate-moholo oa hae o ne a sa rate ’nete ’me a hanyetsa mosali oa hae le bana ba hae bao e leng Lipaki.

Ka lona letsatsi leo, Gabriel o ile a kōpa batsoali ba hae hore ba mo thuse ho letsetsa ntate-moholo le nkhono oa hae ba neng ba lula Argentina. Gabriel o ile a hlalosetsa ntate-moholo oa hae hore na ke hobane’ng ha e le habohlokoa hore a ithute Bibele ’me a mo kōpa ka ho toba a re: “Ntate-moholo, na u ka rata ho ithuta Bibele le ’na?” Monna-moholo o ile a lumela. Gabriel o ile a mo kōpa hore ba ithute bukana ea Mamela Molimo ’me U Phele ka ho sa Feleng. Ba ile ba ithuta bukana eo ka likhoeli tse ’maloa. Kaha Gabriel le ntate-moholo oa hae ba ne ba sa tsebe ho bala hantle, ba ne ba itlhakisa pele. Gabriel o ne a lokisetsa ’me a apara hempe le thae kamehla ha a khanna thuto.

 Hamorao nkhono le ntate-moholo ba ile ba etela lelapa labo Gabriel ka libeke tse ’maloa. Ntate-moholo o ne a e-ea le bona libokeng ha ba ntse ba ba etetse. Ha ntate-moholo a khutlela Argentina, o ile a tsoela pele ho ithuta le mor’abo rōna oa Argentina ’me a hatela pele ho fihlela e ba mohoeletsi ea sa kolobetsoang. Hona joale nkhono le ntate-moholo ba rapela ’moho kamehla. Gabriel le eena o hatetse pele, ’me ke mohoeletsi ea sa kolobetsoang. Ntate-moholo o ikemiselitse ho bontša boinehelo ba hae ho Jehova ka ho kolobetsoa.

Ha Jennifer oa Brazil, a ntse a aba pampitšana ea Na Ruri Bafu ba ka Boela ba Phela? o ile a kokota monyako oa ’mè e mong ea neng a potlaketse ho ea lepatong la motsoalle oa hae. Jennifer o ile a mo bolella hore o batla ho  mo fa pampitšana e bontšang hore re tla boela re bone baratuoa ba rōna ba shoeleng. ’Mè eo o ile a makatsoa ke sehlooho sa pampitšana, empa a e nka. Ha morali’abo rōna a mo botsa hore na a ka rata ho nka lipampitšana tse ling hore a li fe beng ka mofu, o ile a lumela ’me a kōpa tse robong.

Hamorao ha Jennifer a khutlela, ’mè eo o ile a re: “Ke ile ka elelloa hona letsatsing leo re neng re qala ho kopana ka lona hore ha rea kopana ka tšohanyetso. U ne u rometsoe ke Molimo ho tla nkhothatsa.” ’Mè eo o ne a fane ka lipampitšana tsohle tse robong. Mong ka mofu ea neng a rera lepatong o ile a balla batho ba tlileng lepatong pampitšana eohle. Batho bohle ba ile ba e ananela haholo ’me ba leboha ka molaetsa oa eona o khothatsang. ’Mè eo o ile a lumela ho khanneloa thuto ea Bibele.

Litho tse tharo tsa lelapa la Bethele la Haiti li ne li palame tekesi e mebala-bala e bitsoang tap-tap. Li ile tsa pakela bapalami ba bang ha li ntse li le leetong la lihora tse peli le metsotso e mashome a mararo, ’me tsa tsamaisa limakasine tse 50 hammoho le lipampitšana tse 30. E mong oa bona e leng Gurvitch, o ile a balla mopalami e mong makasine ea Tsoha! Mohlankana ea bitsoang Pépé o ne a mametse ’me hang-hang a kenella moqoqong. O ile a kōpa ho khanneloa thuto ea Bibele, athe o lula tšimong ea phutheho eo Gurvitch a kopanelang ho eona. Ho tloha ka January 2014 ha Gurvitch a ne a qala ho kopana le eena, Pépé o ’nile a ba teng hoo e ka bang libokeng le likopanong tsohle. O buisana le batho ba bang ka tumelo ea hae e ncha, ’me o batla ho ba mohoeletsi ea sa kolobetsoang haufinyane.