HO NA LE LINTHO tse ngata tseo batho ba li buang ka bophelo le lefu. Ba bang ba nahana hore ba tla tsoela pele ba phela ka mor’a hore ba shoe, mohlomong sebakeng se seng kapa e se e le batho ba bang kapa phoofolo e itseng. Empa ba bang ba nahana hore ha motho a shoa ho felile ka eena.

Mohlomong ho na le seo u seng u ntse u se lumela ka taba ena. Kaha batho ba bua lintho tse ngata tse fapaneng ka hore na ho etsahala’ng ha re shoa, na ho na le motho ea ka re bolellang seo ehlileng e leng ’nete? Kapa na ho na le moo re ka fumanang likarabo tsa lipotso tsa rona mabapi le hore na hantle-ntle ho etsahala’ng ka rona ha re shoa?

E se e le lilemo tse makholo joale baruti ba likereke tse sa tšoaneng ba ruta hore ha motho a shoa moea oa hae o tsoela pele o phela. Hoo e batlang e le likereke tsohle e-bang ke tsa Bokreste, Mahindu, Bajuda, Mamosleme, le tse ling, li ruta hore moea oa motho o tsoela pele o phela ha eena a shoa. Ka lehlakoreng le leng, Mabuddha ’ona a lumela hore ho na le boemo boo motho a ka bang ho bona a ntse a le lefatšeng, ’me boemo boo bo tšoantšoa le ho ba khotsong, ho ba paradeiseng kapa ho phela hamonate leholimong. A boetse a lumela hore ka mor’a hore motho a shoe, a ka tsoaloa hape e le motho e mong.

Ka lebaka la lithuto tse joalo, batho ba bangata lefatšeng ba lumela hore ha motho a shoa o tsoela pele ho phela karolong e ’ngoe ea lefatšeng. Ba bangata ba re lefu ke karolo ea bophelo, ke kahoo ba reng ke thato ea Molimo. Empa Bibele eona e re’ng ka taba ee? U ka ’na oa makatsoa ke karabo ea eona sehloohong se latelang.