Watoto wetu ulimwenguni pote wanajitahidi sana kudumisha ratiba nzuri ya kiroho kwa kutafuta njia za kuhubiri na kuwatia moyo waabudu wenzao katika kipindi hiki cha ugonjwa wa virusi vya corona.

Nchini New Zealand, watu wamekuwa wakiweka vifaa vya kuchezea, midoli, na picha dirishani ili watoto wazione wanapotembea katika ujirani. Watoto wameona kwamba hiyo ni nafasi ya kuhubiri, kwa hiyo katika makutaniko kadhaa wamekuwa wakitayarisha picha za Caleb na Sofia zilizo na maandishi “Nitazame kwenye jw.org.”

Emilia, msichana mwenye umri wa miaka tisa nchini Uswisi ambaye ana mfumo wa kinga uliodhoofika, aliwaandikia barua wakazi wote katika kituo cha kuwatunzia wagonjwa kama yeye kwa sababu wote hawaruhusiwi kutembelewa. Katika barua hizo, Emilia alitia ndani picha alizochora za Noa na safina. Alieleza kwamba wakati fulani Noa na familia yake walikuwa pia wametengwa, lakini kutengwa kwao kuliwalinda. Aliwatia moyo wakazi wa kituo hicho “wakae ndani, kama Noa.” Baada ya ugonjwa huu kwisha, Emilia anataka kuwatembelea wakazi wote.

Baadhi ya watu waliopokea barua za Emilia walimjibu kwa shukrani, naye alifaulu kuwaandikia barua nyingine. Mwandishi mmoja wa habari alisikia kumhusu Emilia na akaandika kumhusu katika gazeti la habari.

Dada wawili wanaoishi jijini Ontario, Kanada, wanaoitwa Peyton na Ella Kempf, wanadumisha mawasiliano na wengine kutanikoni wakati wa ugonjwa huu. Baba yao anayeitwa Jared, anaeleza hivi: “Wakati wa ibada ya familia, watoto wetu walitusaidia kuandika orodha ya kila mtu tuliyetaka kuwasiliana naye.” Mama yao anayeitwa Jessica, anasema hivi: “Tunataka kuwafundisha binti zetu kwamba ni muhimu kuhakikisha kwamba ndugu na dada zetu pamoja na familia na marafiki wanajua kwamba hatujawasahau.”

Vivyo hivyo, Stella mwenye umri wa miaka tisa pamoja na mama yake wanaoishi Colorado, Marekani, walikazia fikira kuwasiliana na ndugu na dada wenye umri mkubwa katika kutaniko lao. Walitayarisha orodha na kuwasiliana na kila mmoja wao kupitia simu.

Ndugu wawili, Jonathan McKampson mwenye umri wa miaka 12 na Sean McKampson mwenye umri wa miaka 12, wanatumikia katika kutaniko la Kichina lililoko Arizona wakiwa pamoja na wazazi wao. Wanaendelea kuhubiri kwa kuandika barua katika Kichina kila asubuhi kabla ya shule. Kwa sababu bado wanajifunza lugha, wanahitaji muda na jitihada nyingi ili kumaliza kuandika barua hizo. Lakini wameazimia kuendelea kushiriki ujumbe wa Biblia pamoja na watu wanaozungumza Kichina.

Watoto sita, walio na umri kati ya miaka 2 hadi 15, walikuwa na kawaida ya kutembelea kituo cha kuwatunzia watu wenye umri mkubwa magharibi mwa Michigan wakiwa pamoja na mama yao na dada mmoja painia. Hata hivyo, kwa sababu ya ugonjwa wa virusi vya corona, wenye mamlaka waliwazuia watu wote kutembelea kituo hicho. Sasa, wazazi wanatuma rekodi za watoto hao wakiimba nyimbo za Ufalme au wakiwasomea wakazi wa kituo hicho maandiko. Mfanyakazi mmoja wa kituo hicho alimwambia baba ya watoto hao kwamba video moja kati ya hizo ilimtuliza mmoja wa wakazi wa kituo hicho ambaye alikuwa ameshuka moyo baada ya kutazama ripoti za habari kuhusu vifo vinavyosababishwa na virusi vya corona.

Tuna uhakika kwamba Yehova anathamini jitihada za watoto hao wanapoonyesha upendo kwa jirani na kumsifu Yehova kwa ubunifu wao katika huduma.—Zaburi 148:12, 13.