Su tempong nẹ̌kawing i rua nakoạ keluarga wuhu. I rua tantu tatapẹ̌ maadatẹ̌ su matimadẹ̌, katewe su tempong bọu nẹ̌kawing, kawingu harusẹ̌ kahumotongange pandungang. Tawe gampang su matatimadẹ̌ měnarima hal᷊ẹ̌ ene. Katewe, prinsip u Binohẹ Susi makatul᷊ung si rua su tempong buhudeng nẹ̌kawing, kụ lai měndiagạ pẹ̌darame dingangu gaghurang mantu arau anạu sěngkatau.

APA NIUL᷊Ị U BINOHẸ SUSI: ”Pěngadatẹ̌ si amangu ringangu si ninangu.” (Efesus 6:2) Maning seng bọu nẹ̌kawing, harusẹ̌ tatapẹ̌ pěngadatẹ̌ su matimadẹ̌. Kawingu lai piạ gaghurange kụ lai harusẹ̌ lẹ̌adatenge. Kakěndagẹ̌ ene ”tawe sumasingking” arau matanudẹ̌. Hakị u ene, abe matanudẹ̌ mạeng kawingu mapandung su matimade.—1 Korintus 13:4; Galatia 5:26.

APA HARUSẸ̌ KOATENG:

• Abe pẹ̌bera ”Keluarganu tawe měngẹ̌ngarěgang iạ” arau ”Mamạ u mạdiri kěbị apang takụ koateng”

• Pẹ̌tiněna bọu pěndang u kawingu

APA NIUL᷊Ị U BINOHẸ SUSI: ”Ual᷊ingu ene tau esẹ maněn-tang i amange ringangi ninange, kụ mẹ̌těngkasěmbaụ dingangu kawinge kụ irẹ̌dua e makoạ sěmbaụ.” (Pěndariadi 2:24) Su tempong i kamene bọu nẹ̌kawing, matatimadẹ̌ mẹ̌pěndang i sire bědang piạ tanggung jawab su anạe, hakị u ene i sire mapulu měngatorẹ̌ pẹ̌kakawing i kamene.

I rua sěngkawingang harusẹ̌ měkoạ putusang, sarang sude batase su matimadẹ̌, kụ paul᷊ị pakapia putusang ene si sire. Katewe, su tempong maul᷊ị abe kasarẹ̌. (Baweran Salomo 15:1) Naung masanạ, mapia dingangu masabarẹ̌, ene makatul᷊ung si rua mědal᷊ahapị mapia dingangu gaghurang mantu, kụ lai ”pěnodẹko kakěndagu ringangu pẹ̌tatul᷊ung sěmbaụ dingangu wal᷊inẹ.”—Efesus 4:2.

APA HARUSẸ̌ KOATENG:

• Mạeng i rua nakapěndang matatimadẹ̌ seng něngatorẹ̌ pẹ̌kakawing i rua, pẹ̌bisara pakapia hal᷊ẹ̌ ene dingangu kawingu

• Koạko putusang kere apa i rua tumatěngo hal᷊ẹ̌ ene