யோபு 28:1-28
28 பின்பு அவர்,
“வெள்ளியைத் தோண்டி எடுக்க ஒரு இடம் இருக்கிறது.தங்கத்தைப் புடமிடவும் ஒரு இடம் இருக்கிறது.+
2 மனுஷன் மண்ணிலிருந்து இரும்பை எடுக்கிறான்.பாறையிலிருந்து செம்பை உருக்கி எடுக்கிறான்.+
3 அதற்காக நிலத்துக்கு அடியிலுள்ள இருட்டையும் வெளிச்சமாக்குகிறான்.கும்மிருட்டுக்குள் எவ்வளவு தூரம் இறங்க முடியுமோ அவ்வளவு தூரம் இறங்குகிறான்.விலைமதிப்புள்ள பொருள்களைத் தேடுகிறான்.
4 ஜனங்கள் குடியிருக்கிற இடத்தைவிட்டு ரொம்பத் தூரத்தில் சுரங்கம் தோண்டுகிறான்.மனுஷ நடமாட்டமே இல்லாமல்போன இடத்தில் தோண்டுகிறான்.சிலர் கயிற்றில் தொங்கிக்கொண்டு கீழே இறங்கி வேலை செய்கிறார்கள்.
5 நிலத்துக்கு மேல் பயிர் விளைகிறது.நிலத்துக்கு அடியிலோ, தீ வைத்ததுபோல் எல்லாம் தாறுமாறாகிறது.*
6 அங்கே இருக்கிற பாறைகளில் நீலமணிக் கல் கிடைக்கிறது.அங்கே இருக்கிற மண்ணில் தங்கம் கலந்திருக்கிறது.
7 அந்தச் சுரங்கப் பாதை எந்தக் கழுகின் கண்ணுக்கும் தெரியாது.கறுப்புப் பருந்தும் அதைப் பார்த்தது கிடையாது.
8 கொடிய மிருகங்கள் அங்கே நடமாடியதில்லை.இளம் சிங்கம் அங்கே சுற்றித் திரிந்ததில்லை.
9 கெட்டியான பாறையை மனுஷன் உடைக்கிறான்.மலைகளைப் புரட்டிப் போடுகிறான்.
10 பாறையில் வாய்க்கால்களை வெட்டுகிறான்.+விலைமதிப்புள்ள பொருள்களைப் பார்க்கிறான்.
11 நிலத்தடி நீரோடைகளுக்கு அணை போடுகிறான்.மறைந்து கிடப்பதை வெளிச்சத்துக்குக் கொண்டுவருகிறான்.
12 ஆனால், ஞானத்தை எங்கே போய்க் கண்டுபிடிப்பது?+புத்தி* இருக்கிற இடத்தை எங்கே போய்த் தேடுவது?+
13 அதன் மதிப்பு எந்த மனுஷனுக்கும் தெரியாது.+இந்த உலகத்தில் எங்கேயும் அதைக் கண்டுபிடிக்க முடியாது.
14 ‘அது எனக்குள்ளே இல்லை’ என்று ஆழ்கடல் சொல்கிறது.
‘அது என்னிடம் இல்லை’ என்று பெருங்கடலும் சொல்கிறது.+
15 சுத்தமான தங்கத்தைக் கொடுத்து அதை வாங்க முடியாது.எவ்வளவு வெள்ளி கொடுத்தாலும் அது கிடைக்காது.+
16 ஓப்பீரின்* தங்கத்தைக் கொடுத்து அதை வாங்க முடியாது.+அபூர்வமாகக் கிடைக்கிற கோமேதகத்தையும் நீலமணிக் கல்லையும் கொடுத்தால்கூட அது கிடைக்காது.
17 தங்கமும் விலை உயர்ந்த கண்ணாடியும் அதன் பக்கத்தில் வர முடியாது.சொக்கத்தங்கத்தில் செய்த பாத்திரத்தைக் கொடுத்தாலும் அது கிடைக்காது.+
18 பவளமும் படிகக்கல்லும் அதன் பக்கத்தில் நெருங்க முடியாது.+பை நிறைய இருக்கிற முத்துக்களைவிட ஞானம் ரொம்பவே மதிப்புள்ளது.
19 எத்தியோப்பியாவின்* புஷ்பராகக் கல்லும்+ அதற்குச் சமமாகாது.சுத்தமான தங்கத்தைக் கொடுத்தாலும் அதை வாங்க முடியாது.
20 அப்படியென்றால், ஞானம் எங்கேதான் இருக்கிறது?புத்தி* எங்கிருந்துதான் கிடைக்கிறது?+
21 எல்லா உயிர்களின் கண்ணுக்கும் அது மறைவாக இருக்கிறது.+வானத்தில் பறக்கிற பறவைகளாலும் அதைப் பார்க்க முடியாது.
22 ‘அதைப் பற்றி ஏதோ கொஞ்சம் கேள்விப்பட்டிருக்கிறோம்’என்று கல்லறையும்* சாவும் சொல்கின்றன.
23 அதை எப்படிக் கண்டுபிடிக்கலாம் என்று கடவுளுக்கு மட்டும்தான் தெரியும்.அது எங்கே இருக்கிறது என்று அவருக்கு மட்டும்தான் தெரியும்.+
24 அவருடைய கண் பூமி முழுவதையும் பார்க்கிறது.வானத்துக்குக் கீழே இருக்கிற எல்லாவற்றையும் அவர் கவனிக்கிறார்.+
25 அவர் காற்றுக்குப் பலத்தைக் கொடுத்தபோது,+தண்ணீரை அளந்து வைத்தபோது,+
26 மழைக்குச் சட்டம் போட்டபோது,+மழைமேகத்துக்கும் இடிமுழக்கத்துக்கும் வழியை உண்டாக்கியபோது,+
27 அவர் ஞானத்தைப் பார்த்தார், அதை விளக்கிக் காட்டினார்.அதை நிலைநிறுத்தினார், அதைச் சீர்தூக்கிப் பார்த்தார்.
28 அவர் மனுஷனிடம்,
‘யெகோவாவுக்குப் பயப்படுவதுதான் ஞானம்.+கெட்ட காரியங்களை விட்டு விலகுவதுதான் புத்திக்கு* அடையாளம்’+ என்று சொன்னார்” என்றார்.
அடிக்குறிப்புகள்
^ அநேகமாக, சுரங்க வேலையைக் குறிக்கலாம்.
^ வே.வா., “புரிந்துகொள்ளுதல்.”
^ ஓப்பீர் என்ற இடம், உயர்தரமான தங்கத்துக்குப் பேர்போனது.
^ எபிரெயுவில், “கூஷின்.”
^ வே.வா., “புரிந்துகொள்ளுதல்.”
^ நே.மொ., “அழிவும்.”
^ வே.வா., “புரிந்துகொள்ளுதலுக்கு.”