Bíblia haruka ita atu la simu raan. Neʼe katak ita labele hatama raan tomak ka raan nia komponente prinsipál haat iha ita-nia isin, porezemplu liuhusi han ka transfuzaun raan. Haree toʼok eskritura tuirmai:

•   Génesis 9:4. Depois Rai-Nabeen, Maromak fó lisensa ba Noé no ninia família atu han animál nia naʼan maibé bandu sira labele han raan. Maromak dehan ba Noé: “Naʼan hamutuk ho ninia raan, katak ninia moris, imi keta han ida-neʼe.” Mandamentu neʼe aplika ba ema hotu husi tempu neʼebá, tanba ema hotu mai husi Noé nia jerasaun.

•   Levítico 17:14. “Imi labele han raan husi kriatura hotu tanba kriatura hotu nia moris mak iha ninia raan. Ema neʼebé han raan tenke hetan kastigu-mate.” Tuir Maromak nia haree, kriatura hotu nia moris mak iha ninia raan, no neʼe mak Maromak nian. Maski mandamentu neʼe ba nasaun Izraél deʼit, maibé neʼe hatudu katak mandamentu atu labele han raan mak sériu tebes tuir Maromak nia haree.

•   Apóstolu 15:20. “Hasees an . . . husi raan.” Maromak mós fó mandamentu neʼe ba ema Kristaun, hanesan nia fó ba Noé iha tempu uluk. Istória hatudu katak ema Kristaun iha tempu antigu la han raan no la uza raan nuʼudar tratamentu médiku.

Tanbasá Maromak haruka ita atu hasees an husi raan?

 Iha evidénsia neʼebé hatudu katak transfuzaun raan bele lori perigu ba ema nia saúde, maibé razaun tanbasá Maromak haruka ita atu hasees an husi raan mak tanba raan reprezenta buat neʼebé sagradu ba nia.—Levítico 17:11; Koloso 1:20.