1, 2. (a) Konta toʼok Jesus nia ai-knanoik kona-ba toʼos-uvas nia naʼin. (b) Oinsá mak istória neʼe hanorin ita kona-ba hahalok laran-luak no laran-diʼak?

IHA dadeer ida, toʼos-naʼin bá merkadu atu aluga ema serbisu iha ninia toʼos-uvas. Koʼalia tiha folin, ema sira-neʼe mós konkorda atu serbisu ba nia. Maibé tanba nia presiza tan ema barak atu serbisu, iha loron neʼe, nia fila bá-mai husi merkadu atu buka tan ema. Ba sira, nia mós oferese saláriu neʼebé sira kontente atu simu. Toʼo tiha kalan, nia bolu serbisu-naʼin hotu hamutuk atu selu sira. Nia laran-luak tebes tanba nia selu sira hanesan hotu maski balu foin serbisu deʼit ba oras ida. Maibé, sira neʼebé serbisu ona ba loron tomak komesa muramura. Toʼos-naʼin hatán fali ba sira: ‘Imi konkorda ona ho saláriu neʼe loos ka lae? Haʼu iha direitu atu halo buat neʼebé haʼu hakarak ho haʼu-nia rikusoin, loos ka lae? Ka imi laran-moras tanba haʼu hatudu laran-diʼak ka?’—Mateus 20:1-15.

² Jesus nia ai-knanoik fó-hanoin ita kona-ba Jeová nia hahalok furak ida neʼebé temi beibeik iha Bíblia, neʼe mak ninia hahalok “laran-diʼak neʼebé boot”. (Lee 2 Korinto 6:1.) Bíblia balu tradús liafuan neʼe nuʼudar “grasa”. Kona-ba liafuan neʼe nia signifika iha língua orijinál, matenek-naʼin ida dehan: “Liafuan neʼe atu fó ideia kona-ba prezente neʼebé fó ho hakarak rasik, buat  neʼebé ema la serve atu simu.” Kona-ba serbisu-naʼin sira-neʼe, sira la serve duni atu simu saláriu neʼebé hanesan, tanba sira serbisu deʼit ba oras ida. Neʼe hatudu duni katak toʼos-naʼin mak laran-diʼak tebes ba sira.

3, 4. Tanbasá no oinsá mak Jeová hatudu ona laran-diʼak neʼebé boot ba ema hotu?

³ Bíblia hatete katak Maromak nia laran-diʼak neʼebé boot mak prezente ida. (Éfeso 3:7) Tanbasá? Tanba tuir loloos, ita laiha kbiit atu halo tuir Jeová ho perfeitu, tan neʼe ita la serve atu simu ninia laran-diʼak. No Liurai Salomão mós hatete: “La iha ema loos iha rai neʼebé mak sempre halo buat diʼak no nunka halo sala.” (Eclesiastes [Pengkhotbah] 7:20) Apóstolu Paulo mós dehan: “Ema hotu halo sala ona no la bele hetan Maromak nia glória,” no “sala nia kolen mak mate”.—Roma 3:23; 6:23a.

⁴ Maibé, tanba Jeová hadomi tebes ema mak nia haruka “ninia Oan-Mane mesak” hodi mate ba ita. Ida-neʼe mak dalan boot liu hotu neʼebé nia hatudu ninia laran-diʼak neʼebé boot ba ita. (João 3:16) Hodi nuneʼe mak apóstolu Paulo dehan katak Jesus “agora hetan ona koroa glória no hahiʼi nian tanba nia hetan terus toʼo mate, atu nuneʼe liuhusi Maromak nia laran-diʼak neʼebé boot, nia bele koko mate ba ema hotu”. (Ebreu 2:9) Loos duni, “prezente neʼebé Maromak fó mak moris rohan-laek liuhusi Kristu Jesus ita Naʼi”.—Roma 6:23b.

5, 6. (a) Se sala mak ukun ita, neʼe sei lori rezultadu saida? (b) Tanbasá mak diʼak atu husik Jeová nia laran-diʼak neʼebé boot ukun ita?

⁵ Sala mai husi neʼebé? No tanbasá mak ita mate? Bíblia hatete: “Liuhusi ema ida nia sala mak mate ukun nuʼudar liurai.” Loos duni, ita mate tanba ita hotu mai husi Adão. (Roma 5:12, 14, 17) Maski nuneʼe, ita bele hili atu la husik sala ukun ka kontrola ita. Oinsá mak ita bele halo nuneʼe? Tau fiar ba Jesus nia sakrifísiu. Bainhira ita halo nuneʼe, tuir loloos ita husik Jeová nia laran-diʼak neʼebé boot mak ukun fali ita. Tan neʼe mak Bíblia hatete: “Kuandu ema nia sala sai barak, Maromak nia laran-diʼak sai barak liután. Tanbasá mak Maromak halo nuneʼe? Hanesan sala no mate ukun nuʼudar liurai, nuneʼe mós Maromak nia laran-diʼak sei ukun nuʼudar liurai ho hahalok loos, atu nuneʼe lori moris rohan-laek liuhusi ita Naʼi Jesus Kristu.”—Roma 5:20, 21.

⁶ Maski ita sei sala-naʼin nafatin, maibé ita la presiza atu husik sala domina ita-nia moris. Se ita mak halo sala ruma, husu Jeová atu fó perdua ba ita. Neʼe mak buat neʼebé apóstolu Paulo fó avizu, nia dehan: “Sala labele sai nuʼudar imi-nia naʼi, tanba imi laʼós iha ukun-fuan nia okos, maibé imi simu ona Maromak nia laran-diʼak neʼebé boot.” (Roma 6:14) Maibé, oinsá mak Jeová nia laran-diʼak neʼebé boot bele ajuda ita? Paulo esplika: “Maromak hatudu sai ona ninia laran-diʼak neʼebé boot.  . . No ninia laran-diʼak neʼe hanorin ita atu la simu hahalok neʼebé la tuir ninia hakarak, no atu la simu hakarak mundu nian, maibé atu moris ho hanoin neʼebé loos no hahalok loos no serbí Maromak ho laran-metin iha mundu ohin neʼe nian.”—Tito 2:11, 12.

7, 8. Oinsá mak Maromak hatudu ninia laran-diʼak neʼebé boot iha “dalan oioin”? (Haree foto iha pájina 21.)

⁷ Apóstolu Pedro dehan: “Tuir prezente neʼebé ema ida-idak simu, uza ida-neʼe atu serbí malu nuʼudar atan diʼak neʼebé simu ona Maromak nia laran-diʼak neʼebé boot, neʼebé nia hatudu ona iha dalan oioin.” (1 Pedro 4:10) Oinsá mak Maromak hatudu ninia laran-diʼak neʼebé boot iha dalan oioin?  Porezemplu, bainhira ita hasoru susar ruma iha ita-nia moris, Jeová sei ajuda ita atu bele tahan susar sira-neʼe. (1 Pedro 1:6) No nia sempre fó buat neʼebé ita presiza iha tempu neʼebé ita hasoru hela susar naran deʼit.

⁸ Apóstolu João mós hatete: “Nia nakonu ho laran-diʼak neʼebé boot no lia-loos, tan neʼe mak ita hotu simu beibeik laran-diʼak neʼe.” (João 1:16) Tanba Jeová hatudu ninia laran-diʼak iha dalan oioin mak ita mós simu bensaun oioin husi nia. Bensaun hanesan saida deʼit?

9. Oinsá mak Jeová nia laran-diʼak neʼebé boot ajuda ita, no oinsá mak ita bele hatudu agradese ba ninia laran-diʼak neʼe?

⁹ Jeová fó perdua ba ita-nia sala. Jeová fó perdua ita tanba ninia laran-diʼak neʼebé boot. Maibé ita mós tenke arrepende ita-nia sala no kontinua luta makaʼas hasoru ita-nia hakarak aat sira atu bele simu Jeová nia perdua. (Lee 1 João 1:8, 9.) Maromak nia laran-sadiʼa neʼe halo ita agradese tebes ba nia no book ita atu fó glória ba nia. Bainhira apóstolu Paulo hakerek karta ba ema kose-mina, nia esplika ba sira nuneʼe: “[Jeová] halo ita livre husi nakukun nia ukun no lori ita ba ninia Oan doben nia ukun. Liuhusi ninia Oan mak ita sai livre tanba ninia sakrifísiu, katak ita hetan ona perdua ba ita-nia sala sira.” (Koloso 1:13, 14) Jeová nia perdua mós loke odamatan ba bensaun seluk tan.

10. Maromak nia laran-diʼak neʼebé boot fó oportunidade diʼak saida ba ita?

¹⁰ Iha relasaun neʼebé diʼak ho Jeová. Tanba ita la perfeitu, ita moris mai sai ona Jeová nia inimigu. Maibé apóstolu Paulo dehan: “Kuandu ita sei sai hela Maromak nia inimigu, ita hadame malu fali ho Maromak liuhusi ninia Oan-Mane nia mate.” (Roma 5:10) Loos duni, Jesus nia sakrifísiu hadame fali ita ho Maromak no sai Maromak nia belun. Bainhira apóstolu Paulo esplika ba ema kose-mina kona-ba neʼe, nia hatete katak neʼe iha ligasaun ho Maromak nia laran-diʼak neʼebé boot. Nia dehan: “Maromak haree ona ita nuʼudar ema loos tanba fiar, tan neʼe mai ita hela nafatin iha dame ho Maromak liuhusi ita Naʼi Jesus Kristu. No hodi tau fiar ba Jesus, ita hetan ona dalan atu simu Maromak nia laran-diʼak neʼebé boot, no ita simu daudaun ida-neʼe.” (Roma 5:1, 2) Relasaun diʼak ho Maromak mak bensaun ida duni!

11. Oinsá mak ema kose-mina lori “bibi seluk” sai ema loos?

¹¹ Sai ema neʼebé loos iha Maromak nia haree. Profeta Daniel fó-hatene nanis katak iha tempu ikus sira, ema kose-mina ka “sira neʼebé iha matenek” sei “lori ema barak atu sai ema loos”. (Lee Daniel 12:3.) ^[1] Oinsá mak ema kose-mina lori ema sai loos? Sira halo nuneʼe liuhusi haklaken no hanorin Maromak nia Ukun-Fuan ba “bibi seluk” hodi ema sira-neʼe bele sai loos iha Jeová nia matan. (João 10:16) Maibé buat hotu neʼe só bele kumpre deʼit liuhusi Jeová nia laran-diʼak neʼebé boot. Tan neʼe mak apóstolu Paulo dehan: “Maromak haree sira nuʼudar ema loos tanba folin neʼebé Kristu Jesus selu ona atu salva sira. Neʼe mak prezente ida neʼebé Maromak fó tanba [Maromak nia] laran-diʼak neʼebé boot.”—Roma 3:23, 24.

12. Oinsá mak orasaun iha ligasaun ho Maromak nia laran-diʼak neʼebé boot?

¹² Ita bele hakbesik ba Jeová liuhusi orasaun. Tanba Jeová nia laran-diʼak neʼebé boot mak ita bele halo orasaun ba nia. Apóstolu Paulo bolu Jeová nia kadunan mak “kadunan laran-diʼak nian” no nia konvida ita atu “koʼalia ba Maromak hodi la taʼuk”. (Ebreu 4:16a) Ita bele halo orasaun ba Jeová liuhusi Jesus iha tempu naran deʼit. Apóstolu Paulo dehan: “Ita bele koʼalia ho aten-brani no hakbesik ba Maromak ho fiar-metin, tanba ita tau fiar ba Kristu.”  (Éfeso 3:12) Loos duni, tanba Jeová nia laran-diʼak neʼebé boot mak ita iha priviléjiu atu bele koʼalia ba nia iha tempu naran deʼit.

13. Oinsá mak Maromak nia laran-diʼak neʼebé boot bele fó ajuda ba ita iha “tempu neʼebé loos”?

¹³ Hetan ajuda iha tempu neʼebé loos. Apóstolu Paulo fó laran-manas ba ita atu halo orasaun ba Jeová iha tempu naran deʼit “atu nuneʼe ita bele simu laran-sadiʼa no hetan ajuda iha tempu neʼebé loos liuhusi Maromak nia laran-diʼak neʼebé boot”. (Ebreu 4:16b) Iha tempu neʼebé terus no susar koko ita-nia moris, ita bele husu makaʼas ba Jeová atu ajuda ita. Tuir loloos Jeová la presiza atu rona ba ita-nia orasaun, maibé tanba nia iha laran-sadiʼa, nia hatán ita-nia orasaun. Dala barak nia uza irmaun-irmán mak atu fó ajuda ba ita, “atu nuneʼe ita bele sai aten-brani liu no dehan: ‘Jeová mak haʼu-nia ajuda-naʼin; haʼu sei nunka taʼuk. Saida mak ema bele halo ba haʼu?’”—Ebreu 13:6.

14. Oinsá mak Jeová nia laran-diʼak neʼebé boot fó kmaan ba ita?

¹⁴ Fó ita laran neʼebé kmaan. Bensaun ida tan neʼebé mai husi Jeová mak bainhira ita sente laran-tun, nia fó kmaan ba ita. (Salmo [Mazmur] 51:17) Iha tempu neʼebé ema fó terus ba kristaun sira iha Tesalónika, apóstolu Paulo hakerek karta ba sira dehan: “Ami harohan katak Naʼi Jesus Kristu rasik no mós ita-nia Aman Maromak, neʼebé hadomi ita no fó kmaan ba ita nafatin no fó ita esperansa furak liuhusi laran-diʼak neʼebé boot, sei fó kmaan ba imi-nia laran no hametin imi.” (2 Tesalónika 2:16, 17) Hodi hatene katak Jeová tau matan ba ita ho domin, neʼe halo ita sente kmaan tebes, loos ka lae?

15. Maromak nia laran-diʼak neʼebé boot lori esperansa saida ba ita?

¹⁵ Iha esperansa atu moris ba nafatin. Tuir loloos nuʼudar ema sala-naʼin, ita laiha esperansa. (Lee Salmo [Mazmur] 49:7, 8.) ^[2] Maibé Jeová fó esperansa furak ida ba ita. Esperansa neʼe mak saida? Jesus hatete: “Haʼu-nia Aman hakarak katak ema hotu neʼebé haree Oan-Mane no hatudu fiar ba nia tenke hetan moris rohan-laek.” (João  6:40) Loos duni, dalan neʼebé Jeová hatudu ninia laran-diʼak neʼebé boot mak fó esperansa ba ita atu bele moris ba nafatin. Tan neʼe mak apóstolu Paulo hatete: “Maromak hatudu sai ona ninia laran-diʼak neʼebé boot, hodi lori salvasaun ba ema oioin.”—Tito 2:11.

16. Oinsá mak ema kristaun balu iha tempu uluk uza sala Maromak nia laran-diʼak?

¹⁶ Ita hetan bensaun barak tanba Jeová nia laran-diʼak neʼebé boot, maibé neʼe la dehan katak ita bele uza sala ninia laran-diʼak neʼe hodi halo fali sala. Iha apóstolu sira-nia tempu, iha ema kristaun balu mak koko atu “uza sala Maromak nia laran-diʼak hodi halo hahalok neʼebé la iha moe”. (Judas 4) Ema sira-neʼe hanoin katak sira bele halo sala deʼit no depois mak husu Jeová atu fó perdua. Aat liután mak sira mós koko atu dada ema seluk hodi halo sala hamutuk ho sira. Hanesan neʼe mós ohin loron, ema neʼebé halo buat sira-neʼe “la hatudu respeitu ba Maromak nia espíritu neʼebé nia uza atu fó laran-diʼak neʼebé boot”.—Ebreu 10:29.

17. Apóstolu Pedro fó konsellu makaʼas saida?

¹⁷ Ohin loron, Satanás mós bosok ona ema kristaun balu hodi hanoin katak sira bele halo sala deʼit tanba Jeová sei fó perdua ba sira. Jeová fó duni perdua ba ema neʼebé arrepende an, maibé nia mós hakarak ita atu luta makaʼas hasoru ita-nia hakarak aat sira. Nia leno apóstolu Pedro hodi hakerek, dehan: “Maibé kona-ba imi, maluk doben sira, imi hatene nanis ona kona-ba neʼe, entaun kuidadu imi-nia an bá, atu nuneʼe ema aat sira neʼebé kontra lei sei la lori lakon imi tuir sira-nia sala no imi lakon imi-nia laran-metin. Maibé, kontinua simu laran-diʼak boot no matenek loloos husi ita Naʼi no Salvadór Jesus Kristu.”—2 Pedro 3:17, 18.

18. Tanba Jeová hatudu ona ninia laran-diʼak neʼebé boot mai ita, tan neʼe ita iha responsabilidade atu halo fali saida?

¹⁸ Ita agradese tebes ba Maromak nia laran-diʼak neʼebé nia hatudu ba ita. Tan neʼe mak ita mós hakarak uza fali kbiit oioin neʼebé ita iha atu hahiʼi nia no atu ajuda ema seluk. Oinsá mak ita bele halo nuneʼe? Apóstolu Paulo dehan: “Tanba Maromak nia laran-diʼak neʼebé boot, nia fó ba ita kbiit oioin atu halo serbisu espesiál. . . . Se ita simu knaar atu serbí ema seluk, mai ita serbí bá; ka ema neʼebé hanorin, halo serbisu hanorin bá; ka ema neʼebé fó laran-manas, fó laran-manas bá, . . . ema neʼebé hatudu laran-sadiʼa, halo ida-neʼe ho laran-kontente.” (Roma 12:6-8) Tanba Jeová hatudu ona ninia laran-diʼak neʼebé boot mai ita, tan neʼe mak ita mós iha responsabilidade atu hakaʼas an hodi haklaken, hanorin Bíblia ba ema, fó laran-manas ba irmaun-irmán sira, no fó perdua ba ema neʼebé halo sala kontra ita.

19. Ita sei koʼalia kona-ba responsabilidade saida iha lisaun tuirmai?

¹⁹ Simu Maromak Jeová nia laran-diʼak neʼebé boot mak bensaun ida ba ita. Tan neʼe ita tenke hakaʼas an atu “fó sasin ho loloos kona-ba liafuan diʼak husi Maromak nia laran-diʼak neʼebé boot”. (Apóstolu 20:24) Iha lisaun tuirmai ita sei koʼalia kona-ba oinsá atu kaer didiʼak responsabilidade neʼe.