Organizasaun Testemuña ba Jeová iha tempu modernu neʼe hahú maizumenus iha tinan 1870. Iha momentu neʼebá, estudante Bíblia sira neʼebé hela iha Pittsburgh, Pennsylvania, iha Estadus Unidus Amérika, komesa halo grupu kiʼik ida atu buka-hatene lia-loos husi Bíblia. Sira kompara igreja sira-nia hanorin ho buat neʼebé loloos Bíblia hanorin. Sira komesa fó sai iha jornál no iha livru sira buat neʼebé sira aprende ona, no sira mós halo jornál ida neʼebé ohin loron bolu Livru Haklaken—Fó sai Maromak Jeová nia Ukun.

 Iha grupu kiʼik husi estudante Bíblia sira-neʼe, iha mane ida naran Charles Taze Russell. Maski Russell mak dirije edukasaun Bíblia nian no sai editór primeiru ba Livru Haklaken, maibé nia laʼós ema neʼebé harii relijiaun foun ida. Russell ho ninia maluk sira neʼebé iha tempu neʼebá hanaran an nuʼudar Estudante Bíblia, sira-nia hakarak mak atu habelar Jesus Kristu nia hanorin no halaʼo atividade kristaun nian hodi banati-tuir kongregasaun kristaun iha apóstolu sira-nia tempu. Tanba Jesus mak hun ba relijiaun kristaun, ami fiar katak nia mak ida neʼebé harii ami-nia organizasaun.—Koloso 1:18-20.