ITYOUGH 06
Akaauma Yange Hii Nena?
‘Ka her [Aôndo] imbor i uma i lu ye.’ (Pasalmi 36:9) U na kwagh u Bibilo i ôr ne jighjigh kpa? Ior mbagen ka ve kaa ér akaauma yange gba duen tsô. Aluer ka nahan mimi yô, tese ér yange se gba duen abu tsô. Kpa aluer ka Yehova Aôndo yange gba akaauma yô, tese ér a gba a ka sha ityôkyaa. a Nenge er Bibilo i pase er akaauma yange hii, man er i doo u se na jighjigh a kwagh ne yô.
1. Sha man tar yange ve hii nena?
Bibilo kaa ér: “Sha hiihii Aôndo gba Sha man tar.” (Genese 1:1) Mbasainsi kpishi lumun ér shighe ngu u sha man tar yange ve hii yô. Aôndo yange gba ve nena? Yange gba sha man asan man tar kua ityar igen i akaauma a lu ker ga yô, sha tahav nav mbu a eren tom a mi la—ka icighan jijingi na je la.—Genese 1:2.
2. Er nan ve Aôndo yange gba tara?
Yehova Aôndo yange ‘gba tar ér u̱ lu gbilin ga, A gba u sha er ior ve̱ tema sha u’ yô. (Yesaia 45:18) Yange gba tar ér u lu ijiir i dedoo sha ci u uumace, shi u lu a akaa a i gbe u uumace vea lu a mi ve, vea za hemen u lun uma gbem sha won la. (Ôr Yesaia 40:28; 42:5.) Mbasainsi kaa ér tar u se tem shimi ne u doo ashe tsung, shi ngu kposo a ityar igen la cii. Ka u tseegh u lu a akaa a aa wase uumace vea za hemen u lun ye.
3. Er nan ve uumace ve lu kposo a annyameva?
Yehova yange gbe tar kera yô, maa gba akaauma a a lu shin u ne cii. Yange hii gban imendenev kua annyamev. Maa “Aôndo gba or sha inja i mlu Na.” (Ôr Genese 1:27.) Se uumace se mba kposo a annyamev, sha ci u Aôndo gba se sha inja i mlu na, nahan se mba a dooshima shi se soo ifer ga, er un nahan. Shi a gba se sha gbenda u se fatyô u henen ijô yô, kua sha gbenda u sea nenge a kwagh u doonashe yô i doo se, shi sea ungwa ityogholov yô i saan se iyol. Shi se fatyô u civir Aôndo u a gbe se la, kpa annyamev yô, ka nahan ga.
HEN KWAGH I ZA SHIMI
Hen sha akaa a a tese ér yange i gba a gba akaauma, shi kwagh u igbetar u Bibilo i ôr la ka mimi yô. Fa kwagh u aeren a uumace ve lu a mi la a tese or u Aôndo a lu yô.
4. I gba a gba akaauma
Uumace ka vea kenger ma kwaghuma, vea hide a er u ve yô, ior ve wuese. Kpa gema ka an i gbe u a wuese nan sha akaauma laa? Nenge VIDIO i i lu heen ne, maa lam nen sha mpin ne.
-
Ka nyi akaa nahan uumace ve var a lu er akaauma a ve nenge ken a ve var la nahana?
Hanma ya cii ka or ka nan er mhen shi nan maa ye. Kpa gema ka an nan er mhen shi nan gbe akaauma? Ôr Mbaheberu 3:4, maa lam nen sha mbampin mban:
-
Ka akaauma er nyi nahan, u nenge gbenda u i gbe a la i doo u we?
-
Doo u se na jighjigh ser sha man tar, kua akaa a a lu ken a ve la cii, i gba a gbaa? Sha ci u nyi?
U fa kpa?
U fatyô u zuan a ngeren man uvidio mba sha kwagh u igbetar mba i duen a mi sha jw.org sha itinekwagh i “I Gba a Gbaa?” man itinekwagh i “Er Mbagenev Ve Pase Mnenge Ve sha Kwagh u Mhii u Uma Yô” la.
“Jighilii yô, hanma ya cii ka or ka nan maa ye, kpa un u a maa akaa cii la ka Aôndo”
5. Kwagh u Bibilo i ôr sha kwagh u igbetar la ka mimi
Ken Genese ityough 1 la, Bibilo pase er tar kua akaauma a a lu sha u la cii yange hii yô. U nenge wer kwagh u Bibilo i ôr la ka mimi, shin ka mimi ga? Nenge VIDIO i i lu heen ne, maa lam nen sha mbampin mba ve dondo ne.
-
Bibilo tese ér yange i gba tar kua akaauma a a lu shin u ne cii ken ayange ataratar, a iyange i môm ka i lu ahwa 24 nee?
-
U nenge wer kwagh u igbetar u Bibilo i ôr la ka mimi shi ka sha injaa? U nenge nahan sha ci u nyi, shin u nenge nahan ga sha ci u nyi?
Ôr Genese 1:1, maa lam nen sha mpin ne:
-
Mbasainsi kaa ér shighe ngu u sha man tar yange ve hii yô. Kwagh u ve ôr la zua sha kwagh u u sember ôron ken Bibilo ne nena?
Ior mbagenev ka ve soo u fan aluer akaauma cii due ken ankwaghuma u ndahar tsung, u Aôndo hii gban yô. Ôr Genese 1:21, 25, 27, maa lam nen sha mbampin mban:
-
Bibilo tese ér Aôndo yange hii eren ankwaghuma u ndahar tsung, maa de un gema kure kure hingir ishu, man annyamev mbagen kua uumacee? Shin i tese ér sha hiihii la je Aôndo gba akaauma cii “anza” kposo kposo? b
6. Aôndo gba uumace mba kposo a akaauma agen cii
Se mba kposo a annyamev mba Yehova a gbe cii. Ôr Genese 1:26, maa lam nen sha mpin ne:
-
Er i gbe se sha inja i mlu u Aôndo yô, ieren yase i tesen mbagenev dooshima shi zungwen ior mhôônom la tese ér ka aeren a nyi Aôndo a lu a mini?
IOR MBAGENEV KA VE KAA ÉR: “Kwagh u igbetar u Bibilo i ôr la ka kwaghhir.”
-
We u kaa wer nyi? U ôr nahan sha ci u nyi?
KA NYI U HENE?
Yehova gba sha man tar kua akaauma cii.
Mbampin mba umbur kwagh u i hen yô
-
Bibilo tese ér sha man tar yange ve hii nena?
-
Aôndo yange er akaauma anza kposo kposo due ken ankwaghuma u ndahar tsung, shin yange gba hanma kwagh lu er se nengen a mi nahana?
-
Uumace kaha kposo a akaauma agen cii nena?
SEER HENEN KWAGH
Nenge akaauma a mlu u a a tese ér i gba a gba a yô.
“Ka Nyi Se Fatyô u Henen ken Akaauma?” (Awake!, Setemba 2006)
Nenge er ter nana fatyô u pasen wan u nan kwagh u igbetar u Bibilo i ôr la yô.
Nenge aluer ityesen i i kaa ér akaauma cii gba duen tsô la ka i mimi, shin ka kwagh u Bibilo i tese la a lu u mimi yô.
“Aôndo Yange Er Akaauma Cii Due ken Ankwaghuma Ugene?” (Ngeren u sha Intanet)
Nenge, aluer ikyuhe i tse i i dugh ken avande shin kwaghtôvon u mbasainsi tese ér i gba a gba akaauma, shin a gba duen iyol i a tsô yô.
Mhii u Akaauma—Mbampin Utaan mba I Doo u Se Pine Yô (antakeda)
a Se va lam sha kwagh u a lu awashima u Aôndo sha ci u uumace la ken ityough 25.
b Ken Bibilo yô, ka i ter ishember i “inja” la shighe u i lu ôron kwagh u akaauma kposo kposo a a we lun inja i môm yô.
Kwagh Ugen u Alaghga Shi Una Doo U Yô
MBAMPIN MBA IOR VE PIN HANMA SHIGHE LA
Mbashiada mba Yehova Ka Ve Hen Bibilo a Ior Nena?
Bibilo i Mbashiada mba Yehova ve henen a ior gbilin ne, u fatyô u teman kwaghhenen ne a hanma Bibilo i u soo cii. U fatyô u lôhôn or u hen tsombor wou shin ma ijende you we nana va ne hen Bibilo imôngo.
