Ncolyaamba Bbaibbele

Ino Leza Uli Buti?

IBBAIBBELE lyaamba kuti: “Leza ngo-Muuya, eno abamukomba balyeelede kumukomba mumuuya amubwini.” Aaka kaambo kapandulula bwini mbwabede Leza—muuya! (Johane 4:19-24) Nokuba boobo, Ibbaibbele lyaamba kuti uli mbuli muntu. Izyina lyakwe ngu Jehova.—Intembauzyo 83:18.

Bamwi bantu babala Bbaibbele tabamuzyi bwini mbwabede Leza. Mbwaanga Leza muuya alimwi talibonyi, ino nkaambo nzi zibalo zinji zyamu Bbaibbele ncozyaamba mbuli kuti Leza uli ameso, matwi, mpemo, moyo, maanza, minwe amaulu? * Bamwi balakonzya kwaamba kuti Leza uli amubili mbuli wamuntu akaambo kakuti Ibbaibbele lyaamba kuti imuntu wakalengwa mucinkozya cakwe. Ikuti naa bacibikkila maano ncolyaamba Bbaibbele inga cabagwasya kuzyiba bwini mbwabede.—Matalikilo 1:26.

Nkaambo nzi Leza Ncaambwa Kuti Uli Mbuli Muntu?

Ikutegwa bantu bazyibe mbwabede Leza, basikulemba Bbaibbele ibakasololelwa amuuya wakwe, bakali kwaamba Singuzuzyoonse mbubwenya mbobakonzya kwaamba muntu. Ikwaamba Leza mbuli mbotwaamba muntu citondezya buyo bantu mbobalezya kupandulula bwini mbwabede Jehova Leza. Ncibakali kuyanda kapati nkupandulula bwini mbwabede Leza munzila njibakonzya kumvwa bantu. Eeci tacaambi kuti mbutweelede kumubona oobu Leza akaambo kakuti Ibbaibbele muzibalo zimwi limwaamba kuti “nindomba,” “ndizuba” akuti “nintobo.”—Deuteronomo 32:4; Intembauzyo 84:11.

Mbubwenya buyo, kutegwa Ibbaibbele litondezye kuti bantu balijisi bube buli mbuli bwa Jehova, lyaamba kuti muntu wakalengwa mucinkozya ca Leza. Masimpe, eeci tacaambi kuti bantu myuuya naa kuti Leza uli amubili mbuli wabantu.

Sena Leza Musankwa naa Mukaintu?

Mbubwenya mbotuteelede kuyeeya kuti Leza ulijisi zizo zini buya mbuli zyabantu  kweelana ambolyaamba Bbaibbele, tatweelede kuyeeya kuti Leza musankwa naa mukaintu. Eeci citondezya mbobalezya bantu kupandulula bwini mbwabede Jehova Leza Singuzuzyoonse. Ibusankwa naa busimbi bubonwa buyo kuzyintu ziyoya anyika.

Ibbaibbele libelesya bbala lyakuti ‘Taata’ kutegwa litugwasye kubona kuti Mulengi wesu ulatuyanda alimwi ulatukwabilila mbubwenya mbobacita bataata. (Matayo 6:9) Eeci taceelede kutupa kuyeeya kuti Leza azilenge zyakwe zyamuuya zili kujulu mbasankwa naa mbakaintu. Ibbaibbele lyaamba kuti aabo basalidwe kuya kulela aa Kristo kujulu mu Bwami bwakwe tabalangilwi kucinca kuba bantu alimwi pe baakupegwa bulemu akuba bana bamuuya ba Leza. Mwaapostolo Paulo wakabayeekezya kuti, “taakwe mwaalumi nanka mwanakazi” mumasena mobana kubelekela baakupegwa bulemu akuba bana bamuuya ba Leza. Alimwi munzila yamaambilambali baambwa kuti “[mba]nabwiinga” ba Mwanambelele, Jesu Kristo. Zyoonse eezyi zitugwasya kubona kuti Leza kubikkilizya a Mwanaakwe simuzyalwa alikke, Jesu, alimwi azilenge zimwi zyamuuya tazijisi zizo zini buya mbuli zyabantu.—Ba-Galatiya 3:26, 28; Ciyubunuzyo 21:9; 1 Johane 3:1, 2.

Basikulemba Bbaibbele bakatondezya kuti Leza uli mbuli musankwa mukulemba kwabo akaambo kakubona mulimo ngwacita musankwa. Bakabona kuti imusankwa uuccilila njiisyo zya Leza ulakonzya kweelanisyigwa a Jehova mbwayanda bana bakwe bamunyika.—Malaki 3:17; Matayo 5:45; Luka 11:11-13.

Ibube bwa Leza Bupati

Nokuba kuti Leza muuya alimwi ngo Mwami mupati wakujulu, ulababikkila maano bantu alimwi ulabandika ambabo. Nokuba kuti Leza muuya, eeci tacibalesyi bantu babombe myoyo kuti baluzyibe luyando lwakwe, inguzu, busongo abululami bwakwe. Bube oobu bupandulula bwini mbwabede alimwi bulabonwa muzyintu nzyaakalenga.—Ba-Roma 1:19-21.

Nokuba boobo, ibube bwa Leza bupati nduyando. Iluyando lwakwe lulalibonya muzyintu zyoonse nzyacita cakuti waambwa kuti nduyando. (1 Johane 4:8) Ibube oobu bulabikkilizya akuba aluzyalo, kulekelela akuba sicamba. (Kulonga 34:6; Intembauzyo 103:8-14; Isaya 55:7; Ba-Roma 5:8) Masimpe, Jehova Leza ulatuyanda alimwi uyanda kuti tube balongwe bakwe.—Johane 4:23.

Bupanduluzi buyungizidwe

SENA KULI NOMWAKABUZYIDE KUTI?

▪ Ino Leza ngwani zyina lyakwe?—Intembauzyo 83:18.

▪ Ino ncinzi cikonzya kutugwasya kubona bube bwa Leza?—Ba-Roma 1:19-21.

▪ Ino mbube nzi bwa Leza bupati?—1 Johane 4:8.