MAKANI AAYEEME AMUTWE UULI ACIVWUMBYO | MAKANI AAMBA MBOLYAKAFWUTUKA—BBAIBBELE
Bbaibbele Lyakafwutuka Kukunyonyooka
NTENDA YAKALIKO: Ntumbu alimwi azipaya nzyezintu nzyobakali kubelesya kapati balembi ba Bbaibbele alimwi abasikukkopolola. * (2 Timoteyo 4:13) Ino zibelesyo eezyi zyakakubikka buti muntenda kufwutuka kwa Bbaibbele?
Ntumbu ilafwambaana kuyauka, kujujuka, alimwi akuuba-uba. Basyaazibwene bamwi baku Egepita ba Richard Parkinson alimwi aba Stephen Quirke, bakaamba kuti: “Ntumbu zilakonzya kunyonyooka kusikila zyazazauka akuba mbuli kasuko. Ciindi noziyobodwe, zilakonzya kuvwunda naa kubola akaambo kamudumu, alimwi akuligwa ambeba naa tuuka, kwaambisya lumoma, ikuti zyazikkwa ansi.” Ntumbu zimwi nozyakajanwa, zyakabikkwa azuba kwaciindi cilamfwu naa mumudumu, calo cakapa kuti ziindile buya kufwambaana kunyonyooka.
Cipaya nciyumu kwiinda ntumbu, pele acalo cilakonzya kunyonyooka ikuti naa tiicabambwa kabotu naa kubikkwa mubusena bupya kapati naa butontola kapati, mumudumu naa kubalwa zuba kwaciindi cilamfwu. * Cipaya acalo cilaligwa atuuka. Nkakaambo kaako malembe aakaindi manji ncaatakafwutukila kusikila sunu. Ikuti Bbaibbele nolyakanyonyooka, mulumbe wandilyo awalo nowakaloba.
BBAIBBELE MBOLYAKAFWUTUKA: Mulawo waba Juda wakali kukulwaizya mwami umwi aumwi ‘kulilembela Mulawo mubbuku lyakwe,’ nkokuti mabbuku aakusaanguna osanwe aamu Bbaibbele. (Deuteronomo 17:18) Kuyungizya waawo, basyaazibwene mumakani aakukkopolola bakakkopolola malembe manji cakuti kuzikusika mumwaanda wamyaka wakusaanguna C.E., Magwalo akali kujanika muzikombelo mu Israyeli yoonse nokuba ku Makedoniya! (Luka 4:16, 17; Milimo 17:11) Ino malembe amwi aakaindi kapati akafwutuka buti kusikila sunu?
Malembe aakuvwunga aaitwa kuti Dead Sea Scrolls akaliko kwamyaanda yamyaka munongo zyakali mumampangala mwakanyina mudumu
Syaazibwene umwi mulwiiyo lwa Cizuminano Cipya wazina lyakuti Philip W. Comfort wakaamba kuti: “Ba Juda bakajisi cilengwa cakubikka mabbuku aakuvwunga aakajisi Magwalo munongo kutegwa atanyonyooki.” Kulibonya kuti abalo Banakristo bakazumanana acilengwa ncoona eeci. Aboobo malembe aamwi aa Bbaibbele akali kujanika munongo, mutumaluumu tusyoonto, mumpangala alimwi amumasena aamwi mutakwe mudumu.
CAKACITIKA: Zibeela zinji zyamalembe aa Bbaibbele—zijisi myaka iinda ku 2,000—zyafwutuka kusikila sunu. Kunyina bbuku limbi lyakaindi lijisi malembe manji aakkala kwaciindi cilamfwu boobu.
^ par. 3 Ntumbu ncibelesyo cakulembela cipangwa kuzwa kuzisyango zikomenena mumaanzi izyazina ndemunya eeli.
^ par. 5 Mucikozyanyo, kkopi yakasainwa mumulawo iyiitwa kuti U.S. Declaration of Independence cakalembedwe acipaya. Pele kakutanainda amyaka iili 250, cakajujuka kapati cakuti cilakatazya akubala.
Andiza Inga Mwaakkomanina Ayaaya
NGAZI YAMULINDIZI
Cintu Ciyandisi Cajanwa Mumafwuse
Kabeela ka Makani Mabotu ka Johane kaku Rylands nkakabeela kakaindi kwiinda malembe aaliko aa Bunakristo aa Chigiriki oonse aakajanwa.
NGAZI YAMULINDIZI
