Basikubala Balabuzya . . .

Sena kuli musyobo wabantu Leza ngwayanda kapati kwiinda uumbi?

▪ Peepe, taciti oobo. Ibbaibbele lyaamba kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Milimo 10:34, 35.

Mbwazibona zyintu Leza mukaambo aaka kuliindene kapati ambobayeeya bantu batalondokede. Bantu basyoma kuti musyobo umwi (kanji-kanji wabo) ulisumpukide kwiinda uumbi. Kusalulula kuli boobu kutondezya mbwayeeya Charles Darwin, iwakalemba kuti: Kumbele aamazuba, . . . misyobo yabantu iisumpukide iyoolangilwa kujayigwa, akusyaala amisyobo iili aalunya.” Cuusisya ncakuti, bantu banji bapenzyegwa abaabo bamisyobo balo ibalibona kuti mbabotu kwiinda bamwi.

Sena kuli bumboni butondezya kuti musyobo umwi ulisumpukide kwiinda uumbi? Mucikozyanyo, sena kuli bumboni mbobajisi basayaansi bwaamba kuti misyobo imwi ilisumpukide mpoonya imwi ilaansi? Haabupampu mumakani aatusinga (genes) waku Oxford, Bryan Sykes wakaamba kuti: “Kunyina nsinga zitondezya musyobo. . . . Lyoonse ndilabuzyigwa kuti naa kuli DNA ya Chigiliki naa kasinga kamusyobo waku Italy, pele mubwini kunyina pe. . . . Tuliswaangene kapati.”

Buvwuntauzi oobu buleendelana ancotubala mu Magwalo. Bbaibbele liyiisya kuti Leza wakalenga buyo mwaalumi omwe amukaintu omwe kwalo bantu boonse nkobakazwida. (Matalikilo 3:20; Milimo 17:26) Aboobo mumeso aa Leza, misyobo yoonse yabantu ileelene.

Jehova kunyina nalanga mubala wacikanda camuntu naa mbwalibonya kumeso. Muciindi caboobo, ubikkila maano kucintu ciyandika kapati—moyo wesu, naa muntu wamukati. Waamba kuti “Muntu ulabona busyu buyo, pele Jehova ulabona moyo.” (1 Samuele 16:7) Kuyeeya kaambo aaka kulakonzya kutukulwaizya kapati. Munzila nzi?

Kunyina makani amubala wesu, bunji bwesu tatucikkomanini ciwa cesu pele tujisi buyo nguzu zisyoonto zyakucicinca mbocibede. Nokuba boobo, tulakonzya kucinca zyintu ziyandika kapati—mizeezo yesu alimwi ambotulimvwa mumoyo wesu. (Bakolose 3:9-11) Ikuti naa tulalilingula cakusinizya, tulakonzya kulimvwa kuti tulabayinda bamwi aasyoonto buyo, naa ambweni bantu bamisyobo iimbi balatwiinda. Mbwaanga mizeezo iili boobu tayeendelani akuyeeya kwa Leza, tweelede kubeleka canguzu kugwisya kuyeeya kuliboobu mumoyo wesu.—Intembauzyo 139:23, 24.

Mbotuyaabusoleka kulibona alimwi akubona bamwi mbuli mbwababona Jehova, tulakonzya kusyoma kuti unootugwasya. Ijwi lyakwe lituyeezya kuti: “Nkaambo Jehova, meso aakwe alalanga-langa moonse munyika, kuti aliyumye kukugwasya abo balulama mumoyo kumeso aakwe.” (2 Makani 16:9) Aaya masimpe kufwumbwa musyobo nkotuzulilwa.