Peepe. Ikuti tweezyanisya malembe aakaindi, tujana kuti Bbaibbele kunyina nolyacincwa nokuba kuti kwamyaka minji lyalikukkopololwa akulembululwa kubelesya zintu zinyonyooka.

 Kuli malembe aakaindi aamu Bbaibbele manji aakajanwa. Akati kamalembe aaya, aamwi aliindene ikutondezya kuti kwakali bulubizi nokwakali kukkopololwa Bbaibbele. Kwiindana ooku takuli kupati alimwi takunyonganyi bupanduluzi. Nokuba boobo, kuli kwiindana kumwi ikwajanwa ikutondezya kuti basikukkopolola bakacinca zintu acaali kutegwa banyonganye mulumbe wamu Bbaibbele. Amulange-lange zikozyanyo zyobilo:

1.   Mulugwalo lwa 1 Johane 5:7, ma Bbaibbele aamwi aakaindi ajisi mabala aakuti: “kujulu, Taata, Ijwi alimwi Amuuya Uusalala: kupandulula cintu comwe.” Nokuba boobo, malembe aasyomeka atondezya kuti majwi aali boobu taajaniki mumalembe aakusanguna. Pele akazoobikkwa buya. a Aboobo, muma Bbaibbele aasyomeka aamazubaano majwi aaya taako.

2.   Izina lya Leza limugeme lilalibonya ziindi zinji mumalembe aakaindi aa Bbaibbele. Pele basanduluzi bamwi ba Bbaibbele balaligusya zina eeli akubikka mabala aabulemu mbuli aakuti “Mwami” naa “Leza” mubusena bwandilyo.

 Mazuba aano, kuli malembe manji kapati aaliko cakuti ncuuba-uba kujana bulubizi mubusanduluzi. b Ino kweezyanisya malembe aaya kwatondezya buti kuti Bbaibbele tiilyacincwa?

•   Kaamba kujatikizya malembe aa Magwalo aa Chihebrayo (kanji-kanji aaitwa kuti “Cizuminano Cakaindi”) syaazibwene William H. Green wakaamba kuti: “Cakutadooneka, kunyina bbuku limbi lyakaindi lyakalembululwa munzila iiluzi mbuli Bbaibbele.”

•   Ikujatikizya Magwalo aa Banakristo aa Chigiriki, naa “Cizuminano Cipya,” syaazibwene mumakani aa Bbaibbele F. F. Bruce wakalemba kuti: “Bumboni ibutondezya kuti magwalo aa Cizuminano Cipya ngamasimpe mbunji kapati kwiinda bumboni bwamalembe manji aabasyaazibwene, cakunga kunyina uukonzya kukazya kuti mbwamasimpe.”

•   Awalo Sir Frederic Kenyon syaazibwene mumalembe aakaindi aa Bbaibbele uulemekwa wakaamba kuti umwi “ulakonzya kunyamuna Bbaibbele akwaamba cakusinizya kuti ujisi Jwi lya Leza akuti ndyakasimpe kalo katakacincwa kuzwa kaindi.”

•   Basikukkopolola Bbaibbele ba Juda alimwi a Banakristo bakaabikkilizya amakani aamba zyakulubizya kwabantu ba Leza. c (Myeelwe 20:12; 2 Samuele 11:​2-4; Bagalatiya 2:​11-​14). Alimwi bakaabikkilizya aalo makani aamba ba Juda mbobakali kusotoka milawo ya Leza alimwi aakutalika kutobela njiisyo zyakubeja. (Hosea 4:2; Malaki 2:​8, 9; Matayo 23:​8, 9; 1 Johane 5:​21). Kwiinda mukukkopolola makani aaya kweelana ambwaakalembedwe, basikukkopolola bakatondezya kuti bakali kusyomeka alimwi akulemeka Jwi lya Leza lisetekene.

•   Mbwaanga Bbaibbele lyakasololelwa aa Leza, nkokuti wakabikkila maano kuti lilembwe munzila iiluzi? d (Isaya 40:8; 1 Petro 1:​24, 25) Alimwi makanze aakwe akali aakuti ligwasye bantu bakapona kaindi andiswe notupona mazuba aano. Masimpe ngakuti “zintu zyoonse izyakalembwa kaindi zyakalembelwa kutuyiisya, kutegwa kwiinda mukuliyumya kwesu alimwi akwiinda muluumbulizyo lwamu Magwalo tube abulangizi.”​—Baroma 15:4.

•   Jesu alimwi abasikwiiya bakwe bakazubulula majwi kuzwa mu Magwalo aa Chihebrayo kakunyina kulibilika kuti izyakalembwa tiizyakaluzi.​—Luka 4:​16-​21; Milimo 17:​1-3.