PLANTI taim Jehova i kolim em yet olsem wanpela wasman bilong sipsip. Long rot bilong Baibel, em i tok: “Mi yet mi painim ol sipsip bilong mi na kisim bek ol na lukautim ol gut.”​—Esekiel 34:11, 12.

Ol sipsip bilong Jehova i husat? Ol sipsip bilong Jehova em ol man i laikim em na lotuim em. Baibel i tok: “Yumi daunim het na lotu long em. Bikpela i bin wokim yumi. Orait yumi go klostu long em na brukim skru. Em yet i God bilong yumi. Em yet i save lukautim yumi manmeri bilong en olsem ol sipsip, na em i save givim kaikai long yumi.” (Song 95:6, 7) Olsem ol sipsip tru, ol man i lotuim Jehova i redi long bihainim tok bilong Wasman bilong ol. Olsem wanem? Ol man i lotuim Jehova i gutpela olgeta? Nogat. Sampela taim ol wokman bilong God i olsem “ol sipsip bilong en i go nabaut,” ‘ol sipsip i lus pinis,’ na “olsem ol sipsip i lus nabaut.”  (Esekiel 34:12; Matyu 15:24; 1 Pita 2:25) Maski i olsem, taim wanpela man i lusim Jehova, oltaim em i tingim olsem dispela man bai kam bek gen long Em.

Olsem wanem? Yu pilim olsem Jehova i stap yet olsem Wasman bilong yu? Olsem wanem Jehova i kamapim olsem em i Wasman bilong yumi long nau? I gat 3-pela rot em i mekim olsem:

Em i givim ol samting bilong strongim bilip bilong yumi. Jehova i tok: “Na bai ol i stap long ol maunten bilong Israel na kaikai gutpela gras. . . . Na bai mi bringim ol long gutpela ples bilong kisim malolo.” (Esekiel 34:14, 15) Oltaim Jehova i tingim lain bilong em na givim ol samting ol i nidim bilong strongim bilip bilong ol. Yu inap long tingim wanpela atikol, wanpela tok, o wanpela vidio em yu laikim tru tok bilong en? Olsem wanem? Dispela i strongim bilip bilong yu olsem Jehova i tingim tru yumi olgeta wan wan?

Em i helpim na lukautim yumi. Jehova i tok promis olsem: “Sapos sampela sipsip i go nabaut, bai mi bringim ol i kam bek. Na sapos sampela i kisim bagarap na ol i gat sua, orait bai mi pasim ol sua. Na sapos sampela i gat sik, orait bai mi mekim sik bilong ol i orait gen.” (Esekiel 34:16) Jehova i save helpim ol man i nogat strong na ol man em bel hevi i daunim ol. Em i save helpim lain bilong em long kisim bel isi taim ol man i mekim ol i bel hevi, sampela taim em ol wanbilip bilong ol. Na tu, Em i save kisim bek ol man husat i lusim em na ol man i gat kranki tingting long ol yet.

Em i tingim tru yumi. Jehova i tok: “Bai mi go painim ol na kisim bek ol long olgeta hap ol i bin go long en. Sapos sampela sipsip i lus, bai mi go painim ol na kisim bek ol.” (Esekiel 34: 11, 12, 16) Long tingting bilong Jehova, taim wanpela sipsip i lus dispela i no makim olsem em bai i no inap kam bek long Em, nogat. Taim God i lukim wanpela sipsip i lus, em i save painim em. Na taim em i painim pinis dispela sipsip, em i save amamas. (Matyu 18:12-14) God i tingim ol man i lotuim em na i tok: “Yupela i olsem ol sipsip bilong mi na yupela i stap long graun bilong mi yet na mi save givim kaikai long yupela.” (Esekiel 34:31) Yupela olgeta i wanpela bilong dispela lain sipsip.

Bilong wanem Jehova i painim yu na singautim yu long go bek long em? Em i mekim olsem, long wanem, em i laik bai yu stap amamas. Em i tok promis olsem lain bilong em bai kisim ol blesing wankain olsem “ren i kam daun long dispela graun.” (Esekiel 34:26) Yu inap bilipim dispela tok promis, long wanem, yu lukim pinis truim bilong en.

Tingim amamas yu kisim long namba 1 taim yu kisim save long Jehova. Yu pilim olsem wanem taim yu kisim save long nem bilong God na laik bilong Em long ol man? Yu tingim amamas yu kisim taim yu bung wantaim ol wanbilip Kristen long taim bilong ol kibung? Olsem wanem? Taim yu autim tok long wanpela husat i gat laik long harim tok, bel bilong yu i stap isi na yu amamas tru taim yu go bek long haus?

Yu inap long kisim gen dispela amamas. Ol wokman bilong God long bipo i bin beten long God olsem: “Bikpela, yu bin givim baksait long mipela na yu belhat moa yet long mipela. Tasol mipela i laik kam bek long yu, olsem na yu mas bringim mipela i kam bek. Na yu ken mekim mipela i stap gut olsem bipo.” (Krai 5:21, 22) Jehova i bekim beten bilong ol, na ol manmeri bilong em i amamas long go bek na lotuim em. (Nehemia 8:17) Jehova bai mekim wankain pasin long yu.

Maski i olsem, i hatwok long i go bek long Jehova. Tingim sampela hevi yu mas winim bilong i go bek long Jehova, na olsem wanem yu inap karim ol dispela hevi.