GRAUN I PULAP LONG HEVI
1 Lukautim Helt Bilong Yu
WAI EM BIKPELA SAMTING
Wanpela hevi o disasta i kamap inap bagarapim helt bilong ol manmeri o i bagarapim ol long narapela rot.
-
Ol hevi i putim presa long ol manmeri, na taim hevi i stap longpela taim dispela inap mekim na isi long ol i kisim sik.
-
Ol hevi inap putim presa long ol haus sik na ol i no inap lukautim gut ol sikman bikos i gat planti sikman na ol i sot long marasin.
-
Ol hevi inap givim hatwok long ol manmeri long baim ol samting ol i nidim, kain olsem ol kaikai na ol marasin samting.
Samting Yu Mas Save
-
Bikpela sik na pasin bilong tingting planti inap mekim na yu no skelim gut ol samting, na dispela bai mekim na yu no lukautim gut helt bilong yu. Olsem na sik bilong yu inap kamap bikpela moa.
-
Sapos yu no stretim sik bilong yu hariap em inap go bikpela, na yu inap lusim laip bilong yu.
-
Sapos yu stap helti, yu bai mekim ol gutpela disisen long laip bilong yu maski i gat hevi i stap.
-
Maski yu gat wanem kain sindaun, yu inap mekim ol samting bilong lukautim helt bilong yu.
Samting Yu Ken Mekim Nau
Sapos inap, man i gat savetingting i save skelim ol hevi we inap kamap na mekim ol samting bilong abrusim ol. Yu mas mekim olsem long helt bilong yu. Planti taim yu inap daunim sik long rot bilong lukautim gut yu yet na klinim gut haus bilong yu. Pasin bilong lukautim helt bilong yu i gutpela moa winim pasin bilong kisim marasin.
“Mipela i lukautim gut mipela yet na mekim ol samting bambai haus bilong mipela i stap klin, olsem na mipela i no tromoi bikpela mani long go lukim dokta na baim marasin.”—Andreas. *
^ Mipela i senisim sampela nem long dispela magasin.
Ating Yu Bai Laikim Tu
KIRAP!
Rot Bilong Daunim Presa
Skelim sampela gutpela stiatok we inap helpim yu long karim hevi bilong presa na yu inap daunim tu.
