Long yia 33 C.E., Jisas i dai, em i kirap bek na i go antap long heven. Bihain long sampela haptaim, Jisas i kisim namba long mekim wok bos olsem King. (Daniel 7:13, 14) Long bihain, Jisas bai mekim wok olsem King na em bai bringim bel isi i kam long olgeta hap bilong graun na ol man bai i no stap rabis moa.—Ritim Song 72:7, 8, 13.

Jisas bai mekim planti gutpela samting olsem King bilong bosim olgeta manmeri. Em bai yusim strong Papa i givim em long mekim ol man i kamap gutpela olgeta. Ol bai stap amamas long graun na ol bai i no go lapun na dai.—Ritim Jon 5:26-29; 1 Korin 15:25, 26.

Long nau, Jisas i go pas long stiaim ol disaipel tru bilong em long mekim wok autim tok long olgeta hap bilong graun. Ol i save go long haus bilong ol man na soim ol tok Baibel i mekim long Kingdom Bilong God. Jisas i tok em bai wok yet long sapotim wok bilong ol disaipel bilong em i go inap long taim Kingdom Bilong God i pinisim ol gavman bilong graun.—Ritim Matyu 24:14; 28:19, 20.

Long rot bilong kongrigesen Kristen tru, Jisas i wok long stiaim ol man long rot bilong kisim gutpela sindaun. Em bai wok yet long stiaim lain bilong em long abrusim bagarap bilong pasin bilong dispela graun na i go insait long nupela taim em God i tok promis long en.—Ritim 2 Pita 3:7, 13; Revelesen 7:17.