DOMINICAN REPUBLIC
U Ve Munhu Wo Sungula La Nga Twiki Loyi A Amukeleke Ntiyiso
José Pérez
-
U VELEKIWE HI 1960
-
U KHUVURIWE HI 1982
-
MATIMU YAKWE HI KU KOMISA Loko a ha ri jaha, José u amukele ntiyiso hikwalaho ka rirhandzu leri vamakwerhu va n’wi kombiseke rona, hambileswi a ku ri hava ni un’we evandlheni loyi a a tiva ririmi ra mavoko.
LOKO ndza ha ri n’wana, ndzi sungule ku ka ndzi nga ha twi naswona ndzi dyondze ririmi ra mavoko exikolweni xa vanhu lava nga twiki. Loko ndzi ri ni malembe ya 11, ndzi sungule ku dyondza ntiyiso loko ndyangu wa Timbhoni lowu a hi akelane na wona wu ndzi rhamba eminhlanganweni ya vandlha. Hambileswi a ndzi nga va twi loko va vulavula, ndzi amukeriwe hi mandla mambirhi hiloko ndzi endla xiboho xo hambeta ndzi ya eminhlanganweni. Vo tala evandlheni a va ndzi rhamba leswaku ndzi ta dya na vona ni ku endla mintirho yin’wana.
Hi 1982 ndzi ve muhuweleri naswona endzhakunyana ka lembe rero ndzi khuvuriwile. Hi 1984 ndzi tekane na Eva loyi na yena a nga twiki. Hambileswi a hi nga ti twisisi kahle tidyondzo tin’wana ta Bibele, hi swi xiyile leswaku leyi i nhlengeletano ya Yehovha hikwalaho ka rirhandzu naswona hi tiphinile hi ku va evandlheni.—Yoh. 13:35.
Hi 1992 ku endliwe malunghiselelo ya leswaku vamakwerhu van’wana va dyondzisiwa Ririmi ra Mavoko ra le Amerika. Hi ku hatlisa vahuweleri lava va sungule ku lavisisa vanhu lava nga twiki ni ku va chumayela mahungu lamanene. Kutani hi 1994, ntirho wo chumayela vanhu lava tirhisaka ririmi ra mavoko wu andzile loko mpatswa lowu humaka ePuerto Rico wu vitaniwe erhavini leswaku wu ya dyondzisa vamakwerhu va 25 ririmi ra mavoko.
Endzhakunyana ka lembe rero, mina na Eva hi sungule ku ya eminhlanganweni ya ntlawa lowuntshwa wa ririmi ra mavoko lowa ha ku simekiwaka. Endzhaku ka loko hi sungule ku ya eminhlanganweni ya ririmi ra mavoko hi sungule ku ti twisisa hi ku helela tidyondzo ta Bibele to tanihi loko Sathana a pfukela vuhosi bya Yehovha tanihi mufumi wa vuako hinkwabyo swin’we ni ntirho wa Mfumo wa Mesiya exikongomelweni xa Xikwembu.
Hi December 1, 1995, ku simekiwe mavandlha ya Ririmi ra Mavoko ra le Amerika eSanto Domingo ni le Santiago. Hi August 2014, a ku ri ni mavandlha ya 26 ya ririmi ra mavoko ni mintlawa ya 18.
Mina na Eva hi dyondzise vana va hina vanharhu ririmi ra mavoko tanihi ririmi ra vona ra manana. N’wana wa hina lonkulu wa jaha, ku nga Éber, u pfuneta ku hundzuluxela ririmi ra mavoko erhavini ra le United States. Ndzi nandza wa vutirheli evandlheni naswona Eva i phayona ra nkarhi hinkwawo.
