LOKO José a ri ni malembe ya 11 u rhurhele eSanto Domingo, laha a a tirha ku hatimisa tintangu ni ku xavisa tiayisi ni malamula leswaku a kota ku tihanyisa. Loko se a ri jaha, a a dume hi ku va mutirhi loyi a gingiritekaka swinene. Endzhakunyana ka malembe, buti wakwe, loyi a a ri Mbhoni ya Yehovha, u n’wi kombele leswaku a n’wi langutela yindlu yakwe. José u vone buku leyi nge U Nga Hanya Hi Masiku aParadeyisini eMisaveni yi ri etafuleni leri nga ekamareni ro dyela eka rona naswona u hete vusiku hinkwabyo a ri karhi a yi hlaya. U xiye leswaku a a kume nchumu lowu endleke leswaku a hanya vutomi lebyi nga ni xikongomelo.

Eka mahelo-vhiki lama landzeleke, José u ye eHolweni ya Mfumo leyi nga ekusuhi kutani a tivitana Mbhoni ya Yehovha. U byele vamakwerhu leswaku u dyondze leswaku u fanele a ya eminhlanganweni ni ku chumayela mahungu lamanene. U tlhele a va byela leswaku hikwalaho ko hlaya buku leyi nge Hanya Hi Masiku, u dyondze swilo leswi Vakreste va nga fanelangiki va swi endla naswona u va tiyisekise leswaku a a nga endli ni xin’we xa  swona. Endzhakunyana ka masiku ya 15, José u ve muhuweleri. U khuvuriwe endzhaku ka tin’hweti ta tsevu, loko a ri ni malembe ya 21.

Leswi xiyimiso xa ntirho xa José a xi kotlana ni xa minhlangano, u tshike ntirho kutani a kuma wun’wana lowu a wu n’wi holela kotara ya mali leyi a a yi hola. Sweswi xiyimiso xakwe a xi n’wi pfumelela ku va kona eminhlanganweni ni ku va phayona ra nkarhi hinkwawo. Kambe endzhakunyana ka loko a tekile naswona a ri ni vana va majaha vambirhi, u boheke ku tshika vuphayona.

José a a tiyimisele ku dyondzisa vana vakwe ntiyiso ku sukela loko va ha ri tincece. Kutani, loko nsati wakwe, Josefina, a ri ni tin’hweti tinharhu a tike n’wana wa vona wa mativula, ku nga Noé, José a a yi hlayela ehenhla buku leyi nge Buku Yanga Ya Timhaka Ta Bibele, a ri ni ntshembo wa leswaku n’wana wakwe a a ta swi twa a ri ekhwirini. Loko Noé a velekiwa, José se a a n’wi hlayele buku hinkwayo. U endle leswi fanaka eka n’wana wa vona wa vumbirhi Neftalí.

Hi ku famba ka nkarhi, José u ve mininjhere lonkulu wa bindzu laha a a hola muholo lowu a wu wu tlula ka khume muholo lowu a wu hola eka ntirho wakwe wo sungula. Hambiswiritano, hi 2008, loko xifanyetana xakwe xi ri ni malembe ya khume kasi lexin’wana xi ri ni 13, u tshike ku va mininjhere kutani a sungula ku tlhela a va phayona ra nkarhi hinkwawo—sweswi u phayona ni nsati wakwe swin’we ni vana va vona. Leswi muholo wakwe wu hungutiweke swinene, ndyangu hinkwawo wa tirhisana leswaku wu hunguta mali leyi wu yi tirhisaka. Hi vumune bya vona va fambisa tidyondzo ta Bibele ta kwalomu ka 30 n’hweti ni n’hweti. Yesu wa hi tiyisekisa leswaku loko hi rhangisa Mfumo, Yehovha u ta hi katekisa. (Mat. 6:33) José ni ndyangu wakwe va xi tshemba xitshembiso lexi naswona va swi vonile leswaku Yehovha u hetisisa leswi a swi vulaka.