Vandla ra Rihanyo ra Misava Hinkwayo ri gimete hileswaku ku hefemula musi lowu humaka eka tinjhini leti tirhaka hi dizele “swi veka vanhu ekhombyeni lerikulu ro khomiwa hi khensa ya mahahu” naswona swi nga ha vangela vanhu khensa ya thundela.

Vuluva ni timbewu leti omeke leti tshuburiweke emisaveni leyi nga ehansi ka lwandle swi kombisa leswaku khale swinene, misinya ya mincindzu ni yin’wana leyi kulaka etindhawini leti hisaka yi tshame yi va kona etiko-nkulu ra Antarctic. Vanhu vo tala va pfumela leswaku khale ka khaleni, a ku nga titimeli ngopfu hi xixika naswona a ku nga vi na gamboko eAntarctic nakambe maxelo eka tipholi a ma nga hambananga ngopfu ni ya le ka ikhweyita.

Xiviko lexi kandziyisiweke hi 2012 hi Huvo ya Vafundhisi va Makhatoliki ya le Ireland xi kombisa leswaku Makhatoliki lama endlaka tiphesente ta 87 lama vutisiweke swivutiso etikweni rero ma pfumela leswaku vafundhisi va fanele va pfumeleriwa ku teka vavasati; kasi lama endlaka tiphesente ta 77 ma pfumela leswaku vavasati va fanele va pfumeleriwa ku va vafundhisi.

Nkambisiso lowu endliweke eka maphilisi ya vuvabyi bya malariya wu kombise leswaku etindhawini tin’wana maphilisi wolawo hakanyingi a ma nga ri na matimba kumbe a ma ri ya vuxisi, kutani sweswo swi endle leswaku ma nga swi koti kahle ku byi tshungula kumbe ma tsandzeka hi ku helela. Ematikweni ya le Dzonga-vuxa bya Asia, maphilisi ya tiphesente ta 36 lama kamberiweke ku kumiwe leswaku a ma ri ya vuxisi swin’we ni ya tiphesente ta 20 ematikweni ya le dzongeni wa Sahara eAfrika.

Exikarhi ka April 2012, vatirhela-mfumo va tivise siku ro sungula leri nga hela ku nga dlayiwanga munhu eka malembe manharhu etikweni ra El Salvador. Leswi tiko leri ri teleke madzolonga lama fambisanaka ni swidzidziharisi, hi 2011 a ku dlayiwa vanhu va 69 eka 100 000 wa vona, ku nga nhlayo leyi tlakukeke swinene emisaveni.