Baibolo likuyowoya yayi kuti munthu waliyose wali na mungelo wake uyo wakumuvikilira. Ndipouli, Yesu wakati: “Woneseskani kuti muleke kuyuyura yumoza wa ŵachoko aŵa [ŵasambiri ŵa Khristu], pakuti nkhumuphalirani kuti nyengo zose ŵangelo ŵawo kuchanya ŵakulaŵiska chisko cha Adada awo ŵali kuchanya.” (Mateyu 18:10) Apa Yesu wakang’anamuranga kuti ŵangelo ŵakukondwa chomene na mulimo wa msambiri wake waliyose. Ntheura, Ŵakhristu ŵaunenesko ŵakuŵikira dala yayi umoyo wawo pangozi na kughanaghana kuti ŵangelo ŵaŵavikilirenge.

Kasi fundo iyi yikulongora kuti ŵangelo ŵakovwira yayi ŵanthu? Yayi. (Salimo 91:11) Vili nthena chifukwa ŵanji ŵakuŵa na chigomezgo chose kuti Chiuta wangutuma mungelo kuti waŵavikilire na kuŵalongozga. Yumoza wawo ni Kenneth uyo tamuzunura mu nkhani yakwamba. Tingamususka yayi, panji wakuneneska. Kanandi Ŵakaboni ŵa Yehova ŵakukhorwa kuti Yehova wakuŵawovwira kwizira mwa ŵangelo para ŵakupharazga. Kweni pakuti tikuŵawona yayi, tingamanya makora yayi umo Chiuta wakuchitira na ŵangelo aŵa pakutovwira pa vigaŵa vyakupambanapambana. Ndipouli, nkhwananga yayi kuwonga Chiuta Wankhongono zose chifukwa cha umo wakutovwilira.—Ŵakolose 3:15; Yakobe 1:17, 18.