“A māua ne avaga mo Sophia * mō tausaga e silia atu mo te 39 ke oko eiloa ki te taimi ne galo atu ei tena ola i se masaki leva ne pokotia i ei tou fafine. Ne uke ‵ki eiloa a fesoasoani ne maua ne au mai taugasoa, kae ne tumau eiloa au i te fakalavelave malosi i aku galuega fai. Kae i se tausaga e tasi, ne logo‵mae malosi eiloa au. Ne mafuli‵fuli eiloa oku lagonaga i taimi katoa, kae ne mafaufau au me ko se mafai o pule faka‵lei atu au ki ei. Ke oko foki ki te taimi nei, toeitiiti ko kātoa te tolu tausaga talu mai te taimi ne galo atu ei tou fafine, e oko mai faeloa ki a au i nisi taimi a lagonaga logo‵mae.”—Kostas.

E mata, a koe se tokotasi telā ko oti ne galo atu sou tino pele? Kafai e penā loa, e ‵pau eiloa ou lagonaga mo Kostas. E mafai o fakamāfua malosi aka ne te galo atu o se avaga, kāiga io me se taugasoa pele a te manavase io me ko te logo‵mae o te loto. Ne fakatalitonu mai ne tino ‵poto kolā e suke‵suke ne latou te logo‵mae telā e māfua mai i te fanoanoa a te ‵tonu o te manatu tenā. E fai mai se mataupu e tasi ne ‵lomi i te tusi ko The American Journal of Psychiatry me i te “mate ko te ‵toe mea fakalogo‵mae eiloa ki te tokoukega, me e mafau‵fau latou me ko ‵galo atu eiloa olotou tino pele ki te se-gata-mai.” E mafai eiloa ne se tino telā e fakafesagai atu ki te logo‵mae tenei o mafaufau penei: ‘E pefea te leva e nofo ei au mo lagonaga penei? E mata, ka toe mafai o maua ne au te fiafia? E mafai pefea o maua ne au a fakamafanafanaga?’

Ka maua eiloa a tali ki fesili konā i te lōmiga tenei o te Ala Mai! I te suā mataupu, ka sau‵tala eiloa ki mea e mafai o fakafesagai atu koe ki ei māfai ne fatoā galo atu sou tino pele. Ka fakamatala faka‵lei mai i nisi mataupu konei mai tua a auala e mafai o fesoasoani atu ke fakafeoloolo aka i ei a te lasi o tou fanoanoa.

E fakamoe‵moe eiloa matou me ka fakamafanafana atu kae ka aoga eiloa ki so se tino a mataupu konei e ‵soko mai e uiga ki so se tino telā e logo‵mae i te fanoanoa.