E MATA, kai oko atu aka loa ki a koe a vaegā lagonaga sē ‵lei penā i a koe ko fia mate? Kafai ko oti, ko tena uiga e malamalama koe i lagonaga o Adriana. Ne logo‵mae a ia mai te manavase kae ne fanoanoa ‵ki kae mafaufau me ko seai sena aoga. Ne nofo mafatia faeloa a Adriana i taimi katoa.

Mafaufau aka foki ki se tagata Tiapani e igoa ki a Kaoru, telā ne tausi ne ia ana mātua kolā ko ma‵tua kae fakamasaki‵saki. “I te taimi tenā, ne fi‵ta ‵ki au mai te galuega,” e fai mai a ia. “I nisi taimi ko galo te fiakai, kae ko sē mafai o tō ‵lei taku moe i po. Ne kamata au o mafaufau me i te faka‵leiga ki oku fakalavelave ko te mate.”

Ne fai mai se tagata Naitilia e igoa ki a Ojebode, “Ne fanoanoa faeloa au kae iku atu ki te ‵tagi, telā ne ‵sala atu au ki auala ke na fakamate.” Fakafetai me ne seki faka‵mate a Ojebode, Kaoru, mo Adriana. Kae e lau i te fia selau o tino i tausaga katoa ne faka‵mate.

A te tokoukega o tino kolā e faka‵mate ne tāgata, tokoukega o latou e ‵mā foki ma fakamolemole atu mō se fesoasoani. Ne fai mai a Iesu me e manakogina ne tino ma‵saki se tokita. (Luka 5:31) Tela la, kafai koe mafatia, sa mā o ‵sala atu ki se fesoasoani. E tokouke a tino kolā ne logo‵mae i te loto mafatia ne iloa aka ne latou me i togafiti fakatokita e mafai o fesoasoani ki a latou ke kufaki. Ne maua katoa ne Ojebode, Kaoru, mo Adriana a te fesoasoani tenei mai tokita kae nei la ko gasolo o ‵lei kae ko mafai ne latou o kufaki.

E mafai o fakaaoga ne tokita a vailakau io me ko fesoasoani mai tokita ke mafai ne te tino masaki o fai ne fakama‵fuliga ki te auala e mafau‵fau ei latou ke mo a e loto mafatia. A latou kolā e logo‵mae e manakogina foki ne latou a te fesoasoani mai kāiga mo taugasoa. A te ‵toe taugasoa ‵lei o so se tino ko Ieova te Atua, telā e tuku mai ne ia te fesoasoani sili i tena Muna, ko te Tusi Tapu.

A tino loto mafatia e ma‵nako faeloa ki se faka‵leiga mō se taimi leva kae e ‵tau o tauloto latou ki te auala ke kufaki mai te faiga o fakamafuli‵fuliga ki olotou olaga. Kae kafai e logo‵mae koe i te loto mafatia, e mafai o olioli koe ki se olaga gali i aso mai mua e pelā mo Ojebode. E fai mai a ia, “E olioli eiloa au ki te fakataunuga o te Isaia 33:24, telā e ‵valo mai i ei te taimi telā ka seai eiloa se tino i te lalolagi ka fai aka penei ‘Au ko masaki.’” E pelā mo Ojebode, ke maua a fakamafanafanaga mai te tautoga a te Atua e uiga ki “se lalolagi fou,” telā se toe ai i ei se “‵mae.” (Fakaasiga 21:1, 4) E aofia i te folafolaga tenā a te fakaseaiga o logo‵maega o te mafaufau mo lagonaga. Ka ‵galo atu eiloa a ou lagonaga logo‵mae ki te se-gata-mai. A lagonaga logo‵mae ka “se toe manatua i te mafaufau, kae ka se toe ‵sae aka i [tou] loto.”—Isaia 65:17.