E tali‵tonu eiloa a tino e tokouke me i amioga ‵lei ko te auala ke maua ei se olaga gali i aso mai mua. E taumafai latou o fakaasi atu te āva, ati aka a uiga ‵lei, fai ke iloa olotou tulaga i te fenua, kae fakatumau se loto lagona ‵lei. “Ne talitonu faeloa au me kafai e fakamaoni au,” ko pati a Linh, se fafine i Vietnam, “ka toe maua ne au a fakamanuiaga.”

E fakamalosi aka a nisi tino ne olotou talitonuga fakalotu ke fai a mea ‵lei. Ne fai mai a Hsu-Yun, telā e nofo i Taiwan, “Ne akoako mai ki a au me i faifaiga ‵lei a se tino i te taimi koi ola ei, ka fakaiku aka ei me ka maua ne ia se olaga manuia ki te se-gata-mai io me ka logo‵mae a ia māfai ko mate.”

Se mea tonu me kafai e fai ne tatou a mea ‵lei ki nisi tino, e maua ne tatou a mea aoga e uke. Kae ne iloa ne tino e tokouke kolā ne taumafai mo te fakamaoni ke fai a mea ‵lei ki nisi tino, me i te faiga penā ne seki iku atu faeloa ki mea ne fakamoe‵moe latou ki ei. “Ne fakamaoni aka eiloa ne au me i tino kolā e fai mea ‵lei e se toe maua faeloa ne latou a fakamanuiaga,” ko pati a se fafine e igoa ki a Shiu Ping, telā e nofo i Hong Kong. “E taumafai malosi au o tausi ki toku kāiga kae fai foki a mea ‵lei. Ne seki manuia toku olaga avaga kae ne tiaki ne taku avaga a māua mo taku tama.”

Ko oti ne lavea ne tino e tokouke me ne seki mafai ne lotu o fai ke tai ‵lei atu a tino. “Ne aofia au i se potukau fakalotu kae ne fai au mo fai te lotou takitaki talavou,” ko pati a Etsuko, se fafine e nofo i Tiapani. “Ne poi au ke lavea atu a amioga fai valevale, te fia fai tofi, mo te fakaaoga ‵se o tupe ne tino i taku lotu.”

Ne seki fia‵fia a nisi tino kolā e fakamaoni ki lotu māfai ne seki toe taui atu olotou faifaiga ‵lei. Konā eiloa a lagonaga o Van, se fafine mai i Vietnam. “I aso katoa, e ‵togi ne au a fuagalakau, pulalakau, mo mea‵kai kae ofo atu ki fatafaitaulaga o oku tupuga kolā ko ‵mate mo te fakamoemoega ke maua ne au fakamanuiaga i aso mai mua,” ko ana pati. “Faitalia a mea ‵lei katoa ne fai ne au mo faifaiga fakalotu ne fai ne au i tausaga e uke, ne masaki malosi taku avaga. Kae ne mate foliki taku tama fafine telā ne akoga i te suā fenua.”

Kafai e se mafai o maua se olaga gali i aso mai mua mai te fai fua mo fai se tino ‵lei, kae se a la? Ke tali te fesili tenei, e ‵tau o maua ne tatou se tusi e fakatalitonugina—telā e maua i ei a fakamatalaga kolā e mafai o tali aka ei ‵tou fesili kae fakaasi mai te auala ki se olaga gali i aso mai mua. E maua ne tatou i fea se tusi penā?