Te Tusi a Maleko 13:1-37
13 I tena fanoga ki tua mo te faletapu ne fai atu tena soko e tokotasi ki a ia: “Te Faiakoga, onoono aka la ki te ‵gali o fatu mo fale konei!”+
2 Kae ne fai atu a Iesu ki a ia: “E lavea ne koe te ‵lasi o fale konei? Ka seai eiloa se fatu e ‵toe i luga i te suā fatu kae e se ‵pei ki lalo.”+
3 I te taimi ne sagasaga ei a ia i luga i te Mauga o Olive kae lavea atu ne ia te faletapu, ne fesili atu a Petelu, Iakopo, Ioane mo Anitelea ki a ia:
4 “Fai mai aka ki a matou, ka ‵tupu mafea a mea konei, kae se a foki te fakailoga ka iloa ei a te gataga o mea katoa konei?”+
5 Tenā ne kamata ei a Iesu o fai atu ki a latou: “Fakaeteete ke mo a ma takitaki ‵se koutou ne se tino.+
6 E tokouke a tino ka o‵mai i toku igoa kae fai mai, ‘Au ko ia,’ kae ka takitaki ‵se ne latou a tino e tokouke.
7 E se gata i ei, kafai e ‵logo koutou i taua mo tala o taua, ke mo a ma ‵poi koutou; e ‵tau eiloa o ‵tupu a mea konei, kae e seki oko mai te gataga.+
8 “Me ka fai taua te suā atufenua ki te suā atufenua mo te suā malo ki te suā malo;+ ka isi ne mafuie i koga katoa; ka oko mai foki a oge meakai.+ A mea katoa konei ko te kamataga o puapuaga.+
9 “E pelā mo koutou, ke matapula‵pula koutou. Ka ave koutou ne tino ki fono fakamasino,+ kae ka ‵ta koutou i loto i sunako.+ Ka faka‵tu koutou i mua o kovana mo tupu ona ko au, ke fai mo molimau ki a latou.+
10 E ‵tau foki o talai muamua atu te tala ‵lei ki atufenua katoa.+
11 Kae i te taimi e ave ei ne latou a koutou ki te fono, sa manava‵se e uiga ki otou pati ka fai, kae ko so se pati e tuku atu ki a koutou i te itula tenā, faipati atu, me e se ko koutou e fai‵pati, kae ko te agaga tapu.+
12 E se gata i ei, ka tuku atu ne te tino a tena taina ke tamate, kae ka tuku atu foki ne se tamana a tena tama, kae ka ‵teke atu a tama‵liki ki olotou mātua kae tuku atu ke tamate.+
13 Kae ka takalia‵lia a tino katoa ki a koutou ona ko toku igoa.+ Kae ko te tino telā e kufaki ke oko ki te gataga+ ka sao eiloa.+
14 “Kae kafai ko lavea ne koutou a te mea fakatakalialia telā e māfua i ei te fakamaseiga+ e tu i te koga e se ‵tau o tu i ei (ke na malamalama la te tino faitau), tenā ko latou kolā e ‵nofo i Iuta ke na kamata o ‵tele ki luga i mauga.+
15 Ko te tagata i luga i te tuafale ke se fanaifo ki lalo io me fano ki loto o puke se mea mai i tena fale;
16 kae ko te tagata i te fatoaga ke se toe foki ki tua o puke tena gatu.
17 Kalofa eiloa i fāfine fai‵tama mo fāfine kolā koi faū olotou pepe māfai ko oko mai a aso konā!+
18 ‵Talo faeloa ko te mea ke se tupu a te mea tenā i te taimi o te tau ‵moko;
19 me i aso konā ko aso o te fakalavelave+ telā ne seki tupu aka eiloa talu mai te kamataga o mea ne faite ne te Atua ke oko atu eiloa ki te taimi tenā, kae ka se toe tupu eiloa se mea penā.+
20 A te tonuga loa, moi ne se fakamu‵tana a aso konā ne Ieova,* e seai eiloa se tino e sao. Kae ona ko tino filifilia kolā ne filifili ne ia, ka fakamu‵tana ei ne ia a aso konā.+
21 “Kae kafai foki e fai mai se tino ki a koutou, ‘Kiloke! Tenei a te Keliso,’ io me ‘Kiloke! A ia telā i ko,’ sa tali‵tonu ki ei.+
22 Me ka ‵sae mai a Keliso ‵loi mo pelofeta ‵loi+ kae ka fai ne latou a fakailoga mo mea fakaofoofogia i olotou taumafaiga ke takitaki ‵se a tino filifilia.
23 Tela la, ke fakaeteete koutou.+ Ko leva ne fai atu ne au a mea katoa konei ki a koutou.
24 “Kae i aso konā, mai tua o te fakalavelave tenā, ka pouli te la, kae ka se maina te masina,+
25 ka ta‵tela ifo a fetū mai te lagi, kae ka ga‵lulu a mea ma‵losi o te lagi.
26 Kae ka lavea atu ne latou a te Tama a te tagata+ e vau i kaumana mo tena ‵mana sili mo tena ‵malu.+
27 Kae ka uga atu ne ia agelu kae ka fakamaopoopo fakatasi mai ana tino filifilia mai feitu e fa* o te lalolagi, mai te mata e tasi o te lalolagi ke oko ki te suā mata o te lagi.+
28 “Ke tauloto ki te tala fakatusa tenei mai te lakau ko te mati: I te taimi eiloa e toe ola aka ei ana kaula kae ko kamata o ‵somo aka ana lau, ko iloa ei ne koutou me ko pili mai te tau ‵vela.+
29 E penā foki koutou, kafai ko lavea ne koutou a mea konei ko ‵tupu, ke iloa ne koutou me ko pili atu a ia ki otou mataloa.+
30 Au e fai ‵tonu atu ki a koutou me ka se palele atu te kautama tenei seiloga ke ‵tupu a mea katoa konei.+
31 Ka ‵galo atu a te lagi mo te lalolagi,+ kae ka se mafai o ‵galo aku muna.+
32 “E seai se tino e iloa ne ia te aso tenā io me ko te itula tenā, ke oko eiloa ki agelu i te lagi io me ko te Tama, e se iloa katoa ne latou, kae na ko te Tamana fua e iloa ne ia.+
33 Ke matapula‵pula kae ke mataala faeloa,+ me e se iloa ne koutou te taimi telā ko oti ne fuafuagina.+
34 E pelā eiloa me se tagata ne faimalaga ki se isi fenua kae tiakina tena fale kae tuku atu te pule ki ana pologa,+ ne tuku atu ki tino taki tokotasi olotou galuega, kae fakatonu atu ki te tino tausi mataloa ke tumau i te matapulapula.+
35 Tela la, ke tumau i te matapula‵pula, me e se iloa ne koutou te aso e vau ei te matai o te fale,+ me ko te fakaafiafi, io me ko te valuapo io me mai mua o te vaveao* io me ko te tafataeao ‵malu,+
36 me kafai e oko fakapoi mai a ia, ke se maua atu ne ia a koutou e ‵moe.+
37 Kae ko pati e fai atu ne au ki a koutou e fai atu ne au ki tino katoa: Ke tumau i te matapula‵pula.”+
