Tanielu 11:1-45
11 “E pelā mo au, i te tausaga muamua o te pulega a Taliu+ te tino Metai, ne tu aka au o fakamalosi kae puipui a ia.*
2 A te mea ka fai atu nei ne au ko te mea tonu:
“Kiloke! E toe tokotolu a tupu ka ‵tu aka mō Pelesia, kae ko te fa o tupu ka uke atu ana koloa i lō nisi tupu. Kae kafai ko malosi a ia e auala i ana koloa, ka fakaaoga ne ia a mea katoa ke taua atu ki te malo o Eleni.+
3 “Kae ka tu aka se tupu malosi kae pule+ atu ki malo e uke kae fai ne ia te mea e fiafia a ia ki ei.
4 Kae kafai ko oti ne tu aka a ia, ka maofa tena malo kae vaevae ki feitu e fa o te lagi,+ kae ka se vaevae o tuku atu ki ana fanau kae ka se fai pelā mo te malo ne pule a ia ki ei; me i tena malo ka unu kea‵tea kae tuku atu ki nisi tino i tafa o latou konei.
5 “Kae ko te tupu i te feitu ki saute ka gasolo aka o malosi, telā se tokotasi o ana pelenise; kae e tokotasi ka sili atu i a ia kae ka pule atu ki malo e uke, e sili atu i te pulega a te tino tenā.
6 “I se fia tausaga mai tua ifo, ka fai taugasoa lāua, kae ko te tama fafine a te tupu i te feitu ki saute ka vau ki te tupu i te feitu ki mātū ke fai se feagaiga fakatasi mo ia. Kae ka se fakatumau ne tou fafine a te malosi o tena kautau; kae ko te tupu ka se tu aka, io me ko tena kautau; kae ko tou fafine ka tuku atu, ko ia fakatasi mo latou kolā ne aumai ne latou a tou fafine, mo ia telā ne fanau mai ne ia tou fafine, mo ia telā ne fakamalosi ne ia tou fafine i taimi konā.
7 Kae ko te somo e tasi o aka o tou fafine ka tu aka i tena tulaga, kae ka vau a te tupu ki te kautau kae vau o taua ki te taoa o te tupu i te feitu ki mātū kae taua atu ki a latou kae manumalo.
8 Kae ka vau foki a te tupu ki Aikupito fakatasi mo olotou atua, olotou tupua fiti, olotou mea e manakogina* ne faite ki siliva mo aulo, mo olotou pagota. Ka tu ‵mao a ia mō ne nai tausaga mai i te tupu i te feitu ki mātū,
9 telā ka vau o taua mai ki te malo o te tupu i te feitu ki saute, kae ka toe foki ki tena fenua tonu.
10 “E pelā mo ana tama tāgata, ka fakatoka latou mō te taua kae fakamaopoopo ne latou se kautau lasi kae tokouke. Ka fanatu eiloa a te tupu i mua kae ‵fulu faka‵ma a mea e pelā eiloa me se lofiaga. Kae ka foki a ia, kae ka taua atu a ia ke oko eiloa ki tena taoa malosi.
11 “Kae ko te tupu i te feitu ki saute ka kaitaua malosi kae fanatu o taua atu ki ei, telā ko te tupu i te feitu ki mātū; kae ka fakamaopoopo ne ia se potukau lasi, kae ko te potukau tenā ka tuku atu ki lima o te tupu tenā.
12 Kae ka ave kea‵tea a te potukau tenā. Ka oko ki tena loto a te fia sili, kae ka fai ne ia te fia sefuluafe o tino ke pa‵kū; kae ka se fakaaoga ne ia a te malosi o tena tulaga.
13 “Kae ko te tupu i te feitu ki mātū ka foki mai kae fakamaopoopo ne ia se potukau e lasi atu i te potukau muamua; kae i te fakaotiga o taimi, mai tua o se fia tausaga, ka o‵mai eiloa a ia mo se kautau lasi fakatasi mo koloa e uke.
14 I taimi konā, e tokouke a tino ka ‵tu aka o taua atu ki te tupu i te feitu ki saute.
“Kae ko tino fakasaua* mai i tou fenua ka olo fakatasi mo latou ke taumafai o fakataunu ei se fakaasiga; kae ka pa‵kū eiloa latou.
15 “Kae ko te tupu i te feitu ki mātū ka vau kae fakatu aka ne ia se pā kae puke ne ia se fakai e ‵pui faka‵lei. Kae ko kautau a te tupu i te feitu ki saute ka se mafai o ‵tu, io me ko ana tāgata filifilia; kae ka seai se lotou malosi ke ‵tu aka latou.
16 A ia telā e vau o taua mai ki a ia ka fai ne ia te mea e manako a ia ki ei, kae ka seai se tino e tu atu i ana mua. Ka tu a ia i te laukele o te Fenua Gali,+ kae ka maua eiloa i tena lima a te malosi ke fakaseai atu a mea.
17 Ka saga atu ana mata ke o‵mai tasi latou mo te malosi katoatoa o tena malo, kae ka fai se feagaiga mo ia; kae ka gasuesue a ia i se auala magoi. E uiga ki te tama fafine a fāfine, ka tuku atu ki tou tagata ke fakamasei ne ia tou fafine. Kae ko tou fafine ka se mafai o tu aka ki luga, kae ka se tumau tou fafine i te ‵kau fakatasi mo ia.
18 Ka saga atu a mata o tou tagata ki fenua i tafa o te tai kae puke a fenua e uke. Kae ka fakagata ne se takitaki kautau a te masiasi mai i tou tagata mō ia eiloa, ko te mea ke se toe ai se masiasi mai i a ia. Ka fai ne ia ke toe foki atu eiloa te masiasi ki tou tagata.
19 Tenā ka saga atu ei a mata o tou tagata ki te taoa malosi o tena fenua, kae ka siga kae pakū a ia, kae ka se maua eiloa a ia.
20 “Kae ka tu aka mai i tena tulaga a te tino ‵tae lafoga* telā ka fanatu i loto i te malo gali, kae ka fakaseai atu a ia i ne nai aso, kae e se fai penā ona ko te kaitaua io me i se taua.
21 “Kae mai konā ka tu aka i tena tulaga se tino e takalia‵lia ki ei a tino, kae ka se tuku atu ne latou te ‵malu o te malo ki a ia; kae ka vau a ia ki loto i te taimi e tokagamalie* ei a mea kae puke ne ia te malo i se auala takolekole.*
22 Kae ko te kautau o te lofiaga ka ‵tafe kea‵tea ona ko tou tagata, kae ka fakaseai atu latou; e penā foki eiloa mo te Takitaki+ o te feagaiga.+
23 Kae ona ko te lotou va fakataugasoa mo ia, ka tumau a ia i te faiga o mea ‵loi kae tu aka kae gasolo aka o malosi e auala i se tamā fenua.
24 I te taimi o te tokagamalie* ka vau a ia ki loto i toe koga ola ‵lei o te kogā fenua kae fai a mea kolā ne seki fai aka eiloa ne ana tupuga mo olotou tupuga. Ka tufa atu ne ia ki a latou a mea ne ‵fao ne ia mo mea ne maua i te taua mo koloa; kae ka fai ana togafiti ke taua atu ki koga ma‵losi, kae ka fai fua mō se vaitaimi.
25 “Kae ka fakatupu aka ne ia tena malosi mo tena loto toa* ke ‵teke atu ki te tupu i te feitu ki saute fakatasi mo se kautau lasi, kae ko te tupu i te feitu ki saute ka fakatoka mō te taua fakatasi mo se kautau lasi kae malosi ‵ki. Kae ka se tu eiloa a ia, me ka fai ne latou ne togafiti o ‵teke atu a ia.
26 Kae ko latou kolā e ‵kai ki ana meakai ‵gali ka fakatakavale ne latou a ia.
“E pelā mo tena kautau, ka ‵fulu faka‵ma* kea‵tea, kae e tokouke ka tamate.
27 “E pelā mo tupu e tokolua konei, ka ma‵nako eiloa lā loto o fai a te mea masei, kae ka saga‵saga lāua i se taipola e tasi o fakatau fai‵pati ki mea ‵loi. Kae ka seai se mea e iku manuia, me seki oko ki te taimi tonu o te gataga.+
28 “Kae ka foki a te tupu mai te feitu ki mātū ki tena fenua fakatasi mo koloa e uke ‵ki, kae ko tena loto ka ‵teke atu ki te feagaiga tapu. Ka fai eiloa ne ia te mea tenā kae foki ki tena fenua.
29 “I te taimi tonu ka foki mai a ia kae vau o taua atu ki te tupu i te feitu ki saute. Kae ka ‵kese eiloa te taimi nei mo taimi mua,
30 me i vakamutu o Kitimo+ ka o‵mai o taua atu ki a ia, kae ka fakamalalo ei a ia.
“Ka foki a ia kae laulau atu a pati fakamasei* ki te feagaiga tapu+ kae gasuesue o fai te mea tenā; kae ka foki a ia kae ka saga tonu atu ki a latou kolā ko tiaki ne latou te feagaiga tapu.
31 Kae ka ‵tu aka a kautau mai i a ia; kae ka fai fakamasei ne latou te koga tapuaki,+ te taoa malosi, kae ave kea‵tea te taulaga e ‵tau o ofo atu i aso takitasi.+
“Kae ka tuku atu ne latou i te koga tonu a te mea fakatakalialia telā e māfua i ei te fakamaseiga.+
32 “Kae ka ‵taki atu ne ia a latou kolā e fai mea matagā o ‵teke te feagaiga, ke oko atu latou ki te aposetasi e auala i pati takolekole.* Kae ko tino kolā e iloa ne latou te lotou Atua ka manumalo kae gasue‵sue eiloa i se auala magoi.
33 Kae ko tino o te fenua kolā e ‵loto te lotou malamalama+ ka fai ne latou ke malamalama a tino e tokouke. Kae ka fai ei latou ke pa‵kū e auala i te pelu mo te ulaga o te afi, e auala i te puke fakapagota mo te ‵faoga o mea, mō ne nai aso.
34 Kae kafai ko fai latou ke pa‵kū, ka tuku atu ki a latou se tamā fesoasoani; kae e tokouke ka ‵kau fakatasi mo latou e auala i faipatiga takolekole.*
35 Kae ko nisi o latou kolā e malamalama ka fai ke pa‵kū, ko te mea ke fai se tofotofoga ona ko latou kae ke fai se faka‵māga mo te faka‵kenaga+ ke oko eiloa ki te taimi o te gataga; me e seki oko mai te taimi tonu ne filifili aka.
36 “Ka fai eiloa ne te tupu a te mea e manako a ia ki ei, kae ka fakamaluga aka ne ia a ia eiloa kae faka‵malu a ia mai i luga o nisi atua; kae ka faipati ne ia a mea fakaofoofogia o ‵teke atu ki te Atua o atua.+ Kae ka manuia eiloa a ia ke oko ki te taimi e palele atu ei te fakasalaga; me i te mea telā ko oti ne fakaiku aka ka taunu eiloa.
37 Ka seai se āva e fakaasi atu ne ia ki te Atua o ana tupuga; io me fakaasi atu ne ia te āva ki manakoga o fāfine io me ko so se isi atua, kae ka fakamaluga aka ne ia a ia eiloa i luga o tino katoa.
38 I lō te fai penā,* ka avatu ne ia a vikiga ki te atua o taoa ma‵losi; ka ‵viki atu a ia ki se atua telā e seki iloa ne ana tupuga e auala i aulo mo siliva mo fatu tāua mo mea e manakogina.*
39 Ka gasuesue eiloa a ia o taua atu i se auala magoi ki toe taoa ma‵losi eiloa, fakatasi mo se* atua fakaa‵tea. Ka faka‵malu malosi ne ia a latou kolā e fakaaloalo* atu ki a ia, kae ka fai ne ia latou ke pule atu ki mea e uke; kae ka vaevae aka ne ia te laukele ke maua ne tupe mai i ei.
40 “I te taimi o te gataga ka kau atu a te tupu i te feitu ki saute ki te fakatau ‵tekega* o lāua eiloa, kae ko te tupu i te feitu ki mātū ka taua atu fakatasi mo kaliota mo tāgata faka‵tele solofanua mo vaka e uke; kae ka ulu atu a ia ki loto i atufenua kae ‵fulu faka‵ma ne ia e pelā eiloa me se lofiaga.
41 Ka ulu atu foki a ia ki loto i te Fenua Gali,+ kae uke a atufenua ka pa‵kū. Kae konei a latou kolā ka ‵sao mai i ana lima: Etoma mo Moapi mo te vaega tāua o tino Amoni.
42 Kae ka tumau a ia i te fakaoko atu o ana lima o ‵teke a atufenua; kae e pelā mo te fenua ko Aikupito, ka se sao eiloa a ia.
43 Kae ka pule atu a ia ki koloa ‵funa ko aulo mo siliva kae penā foki ki luga i mea e manakogina* katoa o Aikupito. Kae ko tino Lipia mo tino Aitiope ka tau‵tali atu i ana kalafaga.*
44 “Kae ka manavase a ia ona ko lipoti mai i te feitu ki saegala mo te feitu ki mātū, kae ka fanatu a ia mo te kaitaua lasi o ‵ta valevale a tino kae tuku atu a tino e tokouke ke tamate.
45 Kae ka ‵toki ne ia ana faleie fakatupu* i te va o te tai lasi mo te mauga tapu o te Fenua Gali;+ kae ka vau a ia i te auala eiloa tenā ke oko ki tena ikuga, kae ka seai se tino e fesoasoani atu ki a ia.
Fakamatalaga mai lalo
^ Io me “fai pelā me se taoa ki a ia.”
^ Io me “tāua.”
^ Io me “tama tāgata a tino kai‵soa.”
^ E mafai foki o fakasino atu a te mea tenei ki se tino telā e fakamau ne ia a igoa o tāgata o te kautau.
^ Io me “faitogafiti.”
^ Io me kāti, “e aunoa mo se fakailoaga.”
^ Io me kāti “e aunoa mo se fakailoaga.”
^ Epelu, “loto.”
^ Io me “lofia.”
^ Io me “fakaoko atu tena kaitaua.”
^ Io me “pati tavae; sē ‵tonu.”
^ Io me “pati tavae; sē ‵tonu.”
^ Io me “i tena tulaga.”
^ Io me “tāua.”
^ Io me “e auala i se fesoasoani o se.”
^ Io me kāti, “ki so se tino e iloa ne ia.”
^ Io me “ka ‵loka fakatasi lā sau.”
^ Io me “tāua.”
^ Io me “tau‵tali atu i a ia.”
^ Io me “‵lasi.”
