Ki a Tito 1:1-16
1 Au ko Paulo, se pologa a te Atua kae se apositolo a Iesu Keliso e ‵tusa mo te fakatuanaki o tino filifilia a te Atua mo te iloaga tonu o te munatonu telā e fetaui mo te tapuaki fakamaoni ki te Atua
2 kae e fakavae ki luga i te fakamoemoega o te ola se-gata-mai,+ ko leva eiloa ne folafola mai ne te Atua, telā e se mafai o loi;+
3 kae i tena taimi tonu ne fakailoa mai ei ne ia a tena muna e auala i te talaiga telā ne tuku mai ki a au+ e ‵tusa mo te fakatonuga a te ‵tou Fakaola, ko te Atua;
4 ko tusi atu au ki a Tito, ko taku tama pele e ‵tusa mo te fakatuanaki telā e maua fakatasi ne tatou:
Ke i luga i a koe te alofa tauanoa mo te filemu mai te Atua te Tamana mo Keliso Iesu te ‵tou Fakaola.
5 Ne tuku ne au a koe i Keleta ko te mea ke fakatonutonu ne koe a mea sē ‵tonu kae ke ‵tofi aka a toeaina i fakai takitasi, e pelā mo taku fakatonuga ki a koe:
6 māfai e isi se tagata e saoloto mai i ‵losiga, e tokotasi tena avaga, e isi ne ana tama‵liki tali‵tonu kolā e se amio ma‵sei io me e fakalogoga‵ta.+
7 Me e pelā me se situati a te Atua, a te ovasia e ‵tau o saoloto mai i ‵losiga, e se fai tonu,+ e se kaitaua vave,+ e se konā sāle, e se amio fakasaua, e se kaimanako ke maua a mea i se auala sē tonu,
8 kae e uiga talimalo,+ e fiafia ki mea ‵lei, e ‵lei tena mafaufau,+ e amiotonu, e fakamaoni,+ e loto pulea,+
9 e puke ‵mau ki te muna fakamaoni* e uiga ki te auala e fai ei ana akoakoga,+ ko te mea ke mafai ne ia o fakamalosi atu e auala i ana akoakoga aoga*+ kae ke polopoloki+ a latou kolā e ‵teke atu ki ei.
10 Me e tokouke a tāgata fakalogoga‵ta, e fai‵pati ki mea sē aoga, e faka‵se tino, kae maise eiloa a tāgata kolā e taofi ‵mau ki te pilitome.+
11 Se mea ‵tau ke ‵pono olotou gutu, me ko tāgata konei e takitaki ‵se faeloa ne latou a kaukāiga katoa mai te akoako atu o mea e se ‵tau o akoako atu ke maua olotou mea i se auala sē tonu.
12 Ne fai mai se tino i a latou, ko te lotou pelofeta eiloa: “A tino Keleta e pati ‵loi faeloa, e fakama‵taku e pelā me ne manu fe‵kai, e ga‵fula kae paie.”
13 E tonu te molimau tenei. Ko te pogai eiloa tenei e ‵tau ei o tumau koe i te polopoloki ‵mafa atu o latou ko te mea ke mafai o ma‵losi latou i te fakatuanaki,
14 ke se ‵saga atu ki tala ‵kai faka-Iutaia mo fakatonuga a tāgata kolā e fulitua ki te munatonu.
15 E ‵ma a mea katoa ki tino kolā e ‵ma;+ kae ki a latou kolā e lai‵lai kae seai se fakatuanaki e seai se mea e ‵ma ki a latou, me ko lai‵lai olotou mafaufau mo olotou loto lagona.+
16 E folafola atu latou i mua o tino katoa me e iloa ne latou te Atua, kae e fakafiti ne latou a ia e auala i olotou galuega,+ me e fakatakalia‵lia kae fakalogoga‵ta latou kae e se fetaui latou mō so se galuega ‵lei.