MATAUPU 51
E Fakafiafia Pefea ne Koe a Ieova i te Auala e Faipati ei Koe?
I te faitega ne Ieova a tatou, ne tuku mai ne ia se meaalofa gali—ko te faipati. E mata, e tāua ki a ia a te auala e fakaaoga ne tatou a te meaalofa tenā? E tāua ‵ki ki a ia! (Faitau te Iakopo 1:26.) Tela la, e fakaaoga pefea ne tatou a te ‵tou atamai i te faipati i se auala telā e fakafiafia atu ki a Ieova?
1. E ‵tau o fakaaoga pefea ne tatou a te meaalofa ko te faipati?
E fai mai te Tusi Tapu ki a tatou ke “tumau i te fakamalosi atu te suā tino ki te suā tino.” (1 Tesalonia 5:11) E mata, e isi ne tino e iloa ne koe e ma‵nako ki fakamalosiga? Ne a au mea e mafai o fai ke fakamafanafana atu ki a latou? Fakatalitonu atu me e fakatāua ne koe latou. Kāti e mafai o fai atu ne koe a pogai e fiafia ei koe ki a latou. E mata, e isi se tusi faitau e mafai o fakamalosi atu ki se tino e iloa ne koe? E uke ‵ki a tusi fai‵tau e mafai o filifili aka ne koe. Ke masaua foki la, me i te auala e fai ei au pati, e mafai o fakamalosi aka ei a nisi tino i se auala lasi ‵ki. Tela la, taumafai faeloa o faipati atu i se auala atafai kae agamalu.—Faataoto 15:1.
2. Ne a vaegā pati e ‵tau o ‵kalo keatea tatou mai i ei?
E fai mai te Tusi Tapu: “Ke seai ne pati ma‵sei e ‵to mai i otou gutu.” (Faitau te Efeso 4:29.) Ko tena uiga, e se ‵tau o fakaaoga ne tatou a pati ma‵sei io me ko pati sē ‵tau mo pati ‵mafa kolā e mafai o fakalogo‵mae ei a te suā tino. E ‵tau foki o ‵kalo keatea tatou mai te gutu fatufatu mo te fakamasei tino.—Faitau te Faataoto 16:28.
3. Ne a mea ka fesoasoani mai ke fai‵pati atu tatou i se auala fakamalosi loto?
E masani o fakaasi mai i mea e fai‵pati tatou ki ei a mea i ‵tou loto mo mea e ‵mafa i ‵tou mafaufau. (Luka 6:45) Tela la, e ‵tau o fakamasani tatou ke ‵saga faeloa ki mea ‵lei—ko mea kolā e amio‵tonu, e ‵ma, e alofagina, kae e uke ana tavaega. (Filipi 4:8) Ke ‵saga tonu atu ki mea konei, e ‵tau o filifili faka‵lei ‵tou fakafiafiaga mo taugasoa. (Faataoto 13:20) E aoga foki ke mafau‵fau faka‵lei muamua a koi tuai o fai‵pati atu. Mafaufau ki te auala ka pokotia ei a nisi tino i au pati. E fai mai te Tusi Tapu: “A pati e fai mo te sē mafaufau e ‵pau mo te ‵suki o se pelu, kae ko te gutu o te tino poto se faka‵leiga.”—Faataoto 12:18.
KELI MALOSI IFO
Fakamasani o faipati i se auala telā e fakafiafia atu ki a Ieova kae fakamalosi ei a nisi tino.
4. Pule faka‵lei atu ki au pati
I nisi taimi, e fai ne tatou katoa a pati kolā e sala‵mō fakamuli tatou i ei. (Iakopo 3:2) Faitau te Kalatia 5:22, 23, ko sau‵tala ei ki fesili konei:
-
Ne a uiga e mafai o ‵talo koe ki ei kolā e fesoasoani atu ke pule faka‵lei koe ki au pati? Ka aoga pefea ki a koe a uiga konei?
Faitau te 1 Kolinito 15:33, ko sau‵tala ei ki fesili konei:
-
E ‵fuli pefea koe ne ou taugasoa mo fakafiafiaga i te auala e faipati atu ei koe?
Faitau te Failauga 3:1, 7, ko sau‵tala ei ki te fesili tenei:
-
Ko te taimi fea e ‵lei ei ke nofo filemu koe io me faka‵tali ke faipati atu i te taimi tonu?
5. Ke faipati atu ki mea ‵lei e uiga ki nisi tino
E ‵kalo keatea pefea tatou mai te faiatuga o pati fakalogo‵mae kae se ‵lei? Pei te VITIO, ko sau‵tala ei ki fesili konei.
-
I te vitio, kaia ne manako ei a te taina tenei ke ‵fuli a te auala e faipati ei a ia e uiga ki nisi tino?
-
Ne a ‵fuliga ne fai ne ia?
Faitau te Failauga 7:16, ko sau‵tala ei ki te fesili tenei:
-
Ne a mea e ‵tau o masaua ne tatou māfai ko tofotofogina ke faipati sē ‵lei e uiga ki se tino?
Faitau te Failauga 7:21, 22, ko sau‵tala ei ki te fesili tenei:
-
E fesoasoani atu pefea a fuaiupu konei ke mo a ma kaitaua vave koe māfai ko faipati sē ‵lei se tino e uiga ki a koe?
6. Faipati atu mo te atafai ki ou kāiga
E manako a Ieova ke fai‵pati tatou ki ‵tou kāiga i se auala atafai kae alofa. Pei te VITIO, ko sau‵tala ei ki te fesili tenei.
-
Ne a mea ka fesoasoani atu ke faipati atu mo te atafai ki ou kāiga?
Faitau te Efeso 4:31, 32, ko sau‵tala ei ki te fesili tenei:
-
Ne a vaegā pati e ati aka ei se kāiga?
Ne fakaasi mai ne Ieova ana lagonaga e uiga ki tena Tama, ko Iesu. Faitau te Mataio 17:5, ko sau‵tala ei ki te fesili tenei:
-
E fakaakoako atu pefea koe ki a Ieova i te auala e faipati atu ei koe ki ou kāiga?
MEA E FAI MAI NE NISI TINO: “E pule loa au i aku pati e fia fai. Faitalia atu a nisi tino māfai e se fia‵fia ki ei.”
-
E lotomalie koe ki ei? Kaia?
MANATU AOGA
E mafai o fesoasoani io me fakalogo‵mae atu a pati. E ‵tau mo tatou o mafau‵fau faka‵lei ki ‵tou pati ka fai, te taimi mo te auala ke fai atu ei.
Fesili
-
Ne a nisi auala e mafai o fakaaoga ne koe te atamai i te faipati ke fesoasoani atu ki nisi tino?
-
Ne a vaegā pati e manako koe o ‵kalo keatea mai i ei?
-
Ne a mea ka fesoasoani mai ke fai‵pati atu faeloa tatou i se auala atafai kae fakamalosi loto?
NISI FAKAMATALAGA
Ne a mea ka fesoasoani mai ke fai‵pati atu tatou i se auala fakamalosi loto?
Tauloto ki auala ke ‵kalo keatea mai te gutu pati masei.
“E Mata, a te Pati Masei se Mea Matagā Eiloa?” (Mataupu i te neti)
Onoono ki auala ke ‵kalo keatea mai te malei ko te gutu fatufatu.
Faitau ki te auala ne fesoasoani atu a Ieova ki se tagata telā ne taumafai o fakagata tena gutu pati masei.