“Aniwa Nsi Aniwa Ananmu”—Dɛn Na Saa Asɛm No Kyerɛ

BƆ

Nea Bible ka

Mmara a Onyankopɔn nam Mose so de maa tete ɔman Israel no, na asɛm a ɛne “aniwa nsi aniwa ananmu” no ka ho. Yesu nso faa saa asɛm no kae wɔ ne Bepɔw so Asɛnka no mu. (Mateo 5:38; Exodus 21:24, 25; Deuteronomium 19:21) Saa asɛm no, na ɛkyerɛ sɛ, wɔretwe ɔbɔnefo aso a, ɛsɛ sɛ n’asotwe no fata bɔne a wayɛ. a

Ɛyɛ bere a onipa bi hyɛ da yɛ biribi de pira obi foforo na na wɔde mmara yi yɛ adwuma. Mose Mmara no kaa sɛ, sɛ obi boapa di ne yɔnko bɔne a ɛnde: “Nea abu nsi nea abu ananmu, aniwa nsi aniwa ananmu, ɛse nsi ɛse ananmu. Dɛm a ɔmaa ne yɔnko dii no, wɔnyɛ no saa bi.”—Leviticus 24:20.

Dɛn nti na wɔhyɛe sɛ “aniwa nsi aniwa ananmu”?

“Aniwa nsi aniwa ananmu” mmara no, amma nnipa ankorankoro biara kwan sɛ wɔn ankasa ntua wɔn atamfo ka. Mmom ɛboaa atemmufo a na wɔapaw wɔn no ma wɔde asotwe a ɛfata mae, kyerɛ sɛ wɔamfa asotwe a ɛboro so amma, na saa ara nso na wɔangow asotwe no mu ammoro so.

Afei nso esiane saa mmara no nti, sɛ obi boapa yɛ n’adwene sɛ obepira ne yɔnko anaa ɔbɔ pɔw sɛ obedi ne yɔnko bɔne a, na obetu ne ho fo. Mmara no kyerɛkyerɛɛ mu sɛ “wɔn a wɔaka [kyerɛ sɛ wɔn a wohui sɛ wɔde Onyankopɔn mmara yi rebu atɛn] no bɛte na wɔasuro, na wɔrenyɛ bɔne a ɛte saa bio wɔ mo mu.”— Deuteronomium 19:20.

“Aniwa nsi aniwa ananmu.” Ɛsɛ sɛ Kristofo de saa mmara no yɛ adwuma anaa?

Dabi, Kristofo nhyɛ saa mmara no ase. Ná ɛka Mose Mmara a Yesu afɔrebɔ wu no de baa awiei no ho.—Romafo 10:4.

Nanso saa mmara no boa yɛn ma yehu Onyankopɔn adwene. Ɛkyerɛ yɛn sɛ atɛntrenee ho hia Onyankopɔn pa ara. (Dwom 89:14) Bio nso, ɛma yehu sɛnea Onyankopɔn bu atɛntrenee. Ɛne sɛ, ɛsɛ sɛ wɔtwe nnebɔneyɛfo aso “sɛnea ɛfata.”—Yeremia 30:11.

“Aniwa nsi aniwa ananmu” ho atosɛm

Atosɛm: “Aniwa nsi aniwa ananmu.” Ná saa mmara no ano yɛ hyew dodo.

Nokwasɛm: Mmara no amma obiara tumi sɛ ɔntwe abɔnefo aso yayaayaw. Nea edi kan no, sɛ obi yɛ bɔne a na wɔpaw atemmufo a wɔfata ma wɔhwehwɛ mu hwɛ nea ɛyɛe a asɛm no bae. Afei nso, wɔbɛhwɛ sɛ ɔbɔnefo no boapa na ɔyɛe anaasɛ wanhyɛ da. Ɛyɛ bere a wɔayɛ eyi nyinaa awie no ansa na wɔde asotwe a ɛfata ama no. (Exodus 21:28-30; Numeri 35:22-25) Yehu sɛ wɔde “aniwa nsi aniwa ananmu” mmara no mae sɛnea ɛbɛyɛ a wɔrentwe abɔnefo aso mmoro so. Afei nso, na ɛremma wongow abɔnefo asotwe mu dodo.

Atosɛm: “Aniwa nsi aniwa ananmu.” Saa mmara no maa nkurɔfo yɛɛ ade tuaa afoforo ka bere nyinaa.

Nokwasɛm: Mose Mmara no ankasa kaa sɛ: “Wo yɔnko yɛ biribi tia wo a, ntua no so ka, na nnya wo nkurɔfo mma ho menasepɔw.” (Leviticus 19:18) Yehu sɛ Mmara no anka sɛ, sɛ obi yɛ wo biribi a tua no so ka, na mmom ɛhyɛɛ nkurɔfo nkuran sɛ wɔmfa wɔn ho nto Onyankopɔn so. Ɛsan kyerɛe sɛ mmara a na wɔahyehyɛ a wɔde twe abɔnefo aso no, wonhu sɛ ɛbɛboa wɔn.—Deuteronomium 32:35.

Yesu teɛɛ adwene bi a na akyea

Yesu hui sɛ na ebinom akyea “aniwa nsi aniwa ananmu” mmara no. Ɔteɛɛ wɔn adwene bere a ɔkaa sɛ: “Motee sɛ wɔkae sɛ, ‘Aniwa nsi aniwa ananmu na ɛse nsi ɛse ananmu.’ Nanso, mise mo sɛ: Mo ne ɔbɔnefo nnni asi; mmom obiara a ɔbɛbɔ w’aso nifa mu no, dan biako no nso ma no.”—Mateo 5:38, 39.

Hyɛ no nsow sɛ Yesu kaa sɛ “motee sɛ wɔkae sɛ.” Ɛda adi sɛ Yudafo nyamesom mpanyimfo bi a na wɔkyerɛkyerɛ sɛ obi yɛ wo bɔne a yɛ no bi tua ka na na ɔreka wɔn ho asɛm. Bible ho ɔbenfo Adam Clarke kaa sɛ: “Ɛbɛyɛ sɛ mmara [aniwa nsi aniwa ananmu] no nti, Yudafo no . . . nyaa adwene sɛ, sɛ obi nya ne yɔnko ho menasepɔw a, entia mmara. Afei nso entia mmara sɛ obi yɛ wo ade a, wobɛyɛ no bi atua ka.” Esiane sɛ nyamesom mpanyimfo no hyɛɛ nkurɔfo nkuran sɛ obi yɛ wɔn ade a wɔnyɛ no bi ntua ka nti, wosii Onyankopɔn Mmara no ti ase.—Marko 7:13.

Yesu de, osii so dua sɛ ɔdɔ pa ara na Onyankopɔn Mmara no gyina so. Ɔkaa sɛ: “‘Dɔ Yehowa wo Nyankopɔn . . .’ Eyi ne ahyɛde a ɛyɛ kɛse sen ne nyinaa ne nea edi kan. Nea ɛto so abien a ɛte sɛ ɛno ne sɛ, ‘Dɔ wo yɔnko sɛ wo ho.’ Ahyɛde abien yi so na Mmara no nyinaa . . . sɛn.” (Mateo 22:37-40) Yesu kyerɛkyerɛe sɛ ɔdɔ na ɛbɛma yɛahu n’akyidifo anokwafo. Wanka sɛ obi yɛ yɛn bɔne a yɛnyɛ no bi ntua ka.—Yohane 13:34, 35.

a Saa nnyinasosɛm a ɛfa atemmu ho yi, ɛtɔ da a wɔfrɛ no lex talionis wɔ Latin kasa mu. Aman bi a na ɛwɔ hɔ tete nso, wubehu nnyinasosɛm koro yi ara wɔ wɔn mmara mu.