“Ia topa mâua i roto i te fifi, e faaite ta ˈu vahine i to ˈna na metua. I muri iho, e niuniu mai to ˈna papa no te horoa mai i te tahi ravea. Eita vau e mauruuru!”—James. a

“E pinepine te metua vahine o ta ˈu tane i te parau: ‘E mihi noa vau i ta ˈu tamaiti!’ Ia faataa oia mea piri roa raua na mua ˈˈe, e faahapa vau ia ˈu i te faaipoiporaa ia ˈna e te haamauiuiraa i to ˈna mama!”—Natasha.

E nafea ia ore te taairaa e na metua hoovai ia riro ei fifi i roto i te faaipoiporaa?

E riro na hoa faaipoipo ei utuafare apî. Te parau ra te Bibilia, i te faaipoiporaa “e faarue ai te taata i tana metua tane e tana metua vahine a ati atu ai i tana vahine.” Tera atoa te tupu no te vahine faaipoipo. Te na ô ra te Bibilia, e riro raua toopiti “ei hoê” e ei utuafare apî.—Mataio 19:5.

To oe hoa faaipoipo na mua. E taata tauturu i te feia faaipoipo o John M. Gottman. Ua papai oia: “Te tahi ohipa faufaa ia rave te tane e te vahine faaipoipo, o te tâuˈaraa i to te tahi e te tahi manaˈo. E ere i te mea ohie ia na reira noa no te mea na mua ˈˈe i matau na raua i te fariu i te metua.” b

E ere i te mea ohie no te metua ia farii. Te faataa ra te tahi tane apî: “Na mua ˈˈe i te faaipoiporaa, e haapao noa ta ˈu vahine i te manaˈo o to ˈna na metua. I muri aˈe râ, ua taa i te metua vahine e ere faahou to ˈna manaˈo te haapaohia na mua. E ere i te mea ohie no ˈna ia farii.”

E ere atoa i te mea ohie no na hoa faaipoipo. Teie ta James faahitihia i te haamataraa i parau: “Eita oe e maiti i to metua hoovai mai te hoa. Mai te huru, ua parauhia mai, ‘Ua hinaaro oe aore ra aita, e piti hoa apî to oe.’ Noa ˈtu to ratou huru i nia ia oe, e fetii tera!”

Ia fifi orua no te taairaa e te metua hoovai, a haa amui no te faaafaro i te reira. A haapao i te aˈoraa Bibilia ia ‘imi i te hau, e ia aruaru atu.’—Salamo 34:14.

Ia tauturuhia orua ia na reira, e hiˈopoa anaˈe te tahi mau tupuraa. I roto i te mau parau e faaitehia, e nehenehe na hoa faaipoipo e piti e manaˈo mai tera. E tauturu atu te mau aratairaa ia faaafaro e rave rahi fifi te nehenehe e tupu e te metua hoovai.

E hinaaro ta oe vahine ia maitai to taairaa e to ˈna mama. No oe râ, e ere i te mea ohie.

A tamata na: A aparau e to vahine no nia i tera fifi e a farii i te rave i te haapaeraa. E ere to manaˈo i to ˈna metua vahine i te mea faufaa aˈe. A feruri râ, eaha ta oe e rave no to hoa faaipoipo, te taata ta oe i euhe i te here. A aparau no te ite hoê aore ra piti ravea ia maitai to taairaa e to metua vahine hoovai e muri iho, a haa ia au i te reira. Ia ite to hoa faaipoipo i ta oe mau tutavaraa, eita e ore e faatura ˈtu â oia ia oe.—Aratairaa Bibilia: Korinetia 1, 10:24.

Te na ô ra ta oe tane mea tâuˈa aˈe na oe i to metua ia ˈna.

A tamata na: A tauaparau e ta oe tane e a tutava i te taa i to ˈna manaˈo. Eiaha iho â o ˈna ia inoino ia faatura oe i to metua. (Maseli 23:22) E titauhia râ ia haapapu o ˈna ta oe e haapao na mua, e ere râ to oe na metua. Ia faaite ta oe mau parau e haaraa i te reira e tia ˈi. Ua papu anaˈe i to tane i te reira, eita oia e manaˈo e haafifi to oe na metua i to orua taairaa.—Aratairaa Bibilia: Ephesia 5:33.

E ani ta oe vahine i te tauturu i to ˈna na metua, eiaha râ ia oe.

A tamata na: A aparau e ta oe vahine e a faaoti amui i te mau otia e titauhia ia haapao. Eiaha oe ia etaeta roa. Mea ino anei ia faaite hoê haapeapearaa i te metua i te tahi taime? Eaha te tupuraa mea maitai paha ia na reira? Ia hoê to orua manaˈo no nia i te mau otia tano e tia ia haapao, eita te reira e riro ei fifi.—Aratairaa Bibilia: Philipi 4:5.