Ua taui roa te oraraa o te mau utuafare i te mau fenua o te pae tooa o te râ i te mau matahiti i mairi. Na mua ˈˈe, e haapao te mau tamarii i te aratairaa a to ratou na metua. I roto râ i te tahi mau utuafare i teie nei, e au ra na te tamarii e faatere. A hiˈo na i to muri nei mau tupuraa.

• I te fare toa, ua rave mai hoê tamaiti e maha matahiti i te tahi hauti. No te ore e faatia i to ˈna hinaaro, parau atura te mama: “Mea rahi ê na ta oe mau hauti.” Aita i maoro, ua taa te mama e ere na ˈna te parau hopea. Taparu atura te tamaiti e ua na ô: “Hinaaro vau!” I te mea ua matau oia i te faariri, ua taiâ te mama e ua faatia i to ˈna hinaaro.

• A paraparau ai te papa e te tahi taata, tâpû atura ta ˈna tamahine e pae matahiti i ta ˈna parau ma te na ô: “Fiu roa vau, mai hoˈi anaˈe i te fare!” Tuu aˈera te papa ia ˈna i raro e ua pahono ma te mǎrû: “Heru na maa taime iti.”

• Ua parau faahou James, 12 matahiti, ua tamaˈihia o ˈna e te orometua. Aita te papa i riri ia ˈna, i te orometua râ. Na ô atura oia: “Mai tera noa hoa o ˈna i nia ia oe. E haere au e faaite i te faatere haapiiraa!”

E ere anei tera te tupu nei? Te faaite ra te reira te vai ra te fifi i roto i te mau utuafare ua faatia hanoa te metua i te hinaaro o te tamarii. Aita atoa i vaiiho ia ratou ia amo i te utua o to ratou haerea ino. Ia au i te tahi buka, “pinepinehia te ite ua vaiiho te mau metua na te tamarii e faatere. Na mua ˈˈe râ, mea papu no te tamarii e ere roa ˈtu na ratou e faatere.”—The Narcissism Epidemic.

 E rave rahi metua e tutava ra i te haapii i ta ratou tamarii ia rave i te mea maitai. Eita noa ratou e horoa i te hiˈoraa, e aˈo atoa râ ma te here e ma te papu ia titauhia. Ia au i te buka i faahitihia ˈtu na, e ere mai tera te manaˈo o te rahiraa i teie mahana. E ere ïa i te mea ohie no te mau metua o te farii ra mea faufaa ia aˈo i te tamarii.

No te aha i tae roa ˈi i tera faito? Teihea ˈtura te aˈo a te metua i teie mahana?

Ua parau vetahi mea paruparu te mau metua i tera paeau mai 1960 mai. I tera mau matahiti, i faaitoito na te feia îite i te mau metua ia haere mǎrû noa i nia i ta ratou tamarii. Ua parau teie feia: “Ia riro outou ei hoa eiaha râ ei faatere.” “Mea maitai aˈe ia haapopou, eiaha râ ia aˈo.” “Eiaha ia tamaˈi ia rave oia i te mea ino, a tapea noa mai i te maitai ta ˈna e rave ra.” Aita te feia îite i horoa i te manaˈo tano ia haapopou e ia aˈo. Ua turai râ ratou ia manaˈo ua aˈo-anaˈe-hia, e fifi te tamarii e e nehenehe atoa oia e inoino i to ˈna na metua i muri aˈe.

Aita i maoro, ua haafaufaa te feia îite i te mau maitai ia ore te tamarii ia taiâ. Mai te mea ra, ua ite-taue-hia ia ratou te ravea no te riro ei metua maitai na roto i teie mau parau: Ia mauruuru to tamarii i to ˈna huru. Mea faufaa iho â ia ore te tamarii ia taiâ, ua faarahi roa râ te feia îite i to ratou parauraa i te metua: “Eiaha e faahiti i te parau aita, oia atoa mea ino” e “A parau noa i ta outou tamarii mea taa ê roa oia e e nehenehe o ˈna e rave i te mau mea atoa ta ˈna e hinaaro.” E au ra e, mea faufaa aˈe ia manaˈo te tamarii mea maitai oia i te riro ei taata maitai.

I te pae hopea, ua parau vetahi ua turai tera huru feruriraa i te tamarii ia manaˈo o ratou te mea faufaa aˈe. Mai te huru, e tia ia vetahi ê ia faatia i to ratou hinaaro. Ia au i te tahi buka, aita atoa te reira i tauturu i te tamarii ia ineine i te farii e hape iho â o ˈna e e nehenehe ta vetahi ê e parau  atu. (Generation Me) Teie te parau a te tahi papa faahitihia i roto i tera buka: “Aita te mauruuru e itehia ra i te vahi raveraa ohipa. . . . Aita anaˈe oe i rave maitai i ta oe ohipa, eita te paoti e parau mai: ‘Ua au roa vau te û o te papie ta oe i maiti!’ Mai te peu mai tera to tatou huru i nia i te tamarii, aita roa tatou i tauturu ia ˈna.”

I te roaraa o te mau matahiti, e pinepine, ua faaite te huru faatereraa a te mau metua ua tauiui noa te manaˈo o te taata. Teie ta te orometua haapii Ronald Morrish i papai: “Ua taui noa te huru aˈoraa ia au i te manaˈo o te taata.” a Mai ta te Bibilia i parau, mea ohie no te mau metua “ia aueue noa i te mataˈi ra, i tera parau, i tera parau.”—Ephesia 4:14.

Aita ïa te mau tamarii i maitai mai i te manaˈo o te rahiraa no nia i te aˈo i teie mahana. Aita te reira i tauturu i te mau metua ia aˈo atu. Ua ere atoa hoi te mau tamarii i te aratairaa no te rave i te mau faaotiraa maitatai e no te faaruru i te mau fifi o te oraraa.

Eaha te ravea maitai aˈe no te aˈo?