Алыс шын Бурган — бүгү чүвени чаяаган Чаяакчы-дыр. Ооң эгези турбаан, төнчүзү-даа турбас (Ырлар 89:3). Библияда бижиттинген буянныг медээни Бурган биске дамчыткан (1 Тимофейге 1:11). Биске чуртталганы Бурган хайырлаан болганда, чүгле Аңаа чүдүүр ужурлуг бис.(Номчуптуңар: Ажыдыышкын 4:11.)

 Бурганны кым-даа кажан-даа көрүп көрбээн, чүге дээрге Ол каракка көзүлбес Сүлде. Сүлде дээрге бистиинден оранчок бедик чуртталганың хевири-дир (Иоанн 1:18; 4:24). Бурганны көөрү болдунмас-даа болза, чаяалгаларны топтап көрүп тургаш, Ооң дугайында билип ап болур. Чижээ, чимистер биле чечектерниң чүзүн-баазыны Чаяакчының ынакшылы биле мерген угаанын ажыдып турар. А эгээртинмес Октаргай Ооң күчү-күжүн херечилеп турар. (Номчуптуңар: Римчилерге 1:20.)

 Библияны номчуп тургаш, Бурганның дугайында хөйнү билип ап болур. Ында Бурганның чүү чүвеге ынак, ынак эвезин, Ооң кижилерге хамаарылгазы кандыызын база аңгы-аңгы байдалдарда канчаар алдынарын бижип каан. (Номчуптуңар: Ырлар 102:7—10.)

 Иисус мынча дээн: «Дээрде Адавыс! Сээң адың алдаржызын!» (Матфей 6:9). Бурганның ат-дужаалдары хөй, ынчалза-даа Ол чүгле чаңгыс аттыг. Дыл бүрүзүнде Ооң адын аңгы-аңгы кылдыр адаар. Тыва дылда «Иегова» деп адаар. (Номчуптуңар: Ырлар 82:19.) *

 Библияның дыка хөй очулгаларындан Бурганның адын ап каапкаш, Дээрги азы Бурган деп ат-дужаалдар-биле солаан. А Библияның оригиналында Бурганның ады 7000 хире катап таваржып турар. Улусту Бурганның дугайында өөредирде,  Иисус Ооң адын үргүлчү ажыглаар чораан. (Номчуптуңар: Иоанн 17:26.)

 «Бурганның ады бар бе?» деп видеороликти көрүңер.

 Амгы үеде делегейде ажыг-шүжүг, озал-ондак дыка хөй. Оон алырга, Бурган биске ынак эвес база бисти тоовас дээни ол бе? Чамдык улус Бурган хилинчек-човалаңны бисти шенээр дээш, чорудуп турар дээр. Ынчалза-даа ол шын эвес. (Номчуптуңар: Иаков 1:13.)

 Иегова кижини хостуг эргелиг кылдыр чаяаган. Ол бисти роботтар кылдыр чаяаваан, ол дээш Бурганга өөрүп четтирер бис. Аңаа бараалгаар дээш, хостуг эргевисти ажыглап болур бис (Иисус 24:15). Ынчалза-даа дыка хөй улус өске орукту шилип ап, өскелерге каржы-бакты кылып турар. Ынчангаш делегейде хилинчек-човалаң ынча хөй. Иеговага ол бүгү чөптүг эвес чорукту көөрү аарышкылыг. (Номчуптуңар: Эге дөс 6:5, 6.)

 Иегова биске ынак. Ол бисти чуртталгага өөрүп чоруурувусту күзеп турар. Бүгү каржы-бакты, каржы херектер үүлгедип чоруур улусту удавас Бурган чок кылыр. Иегованың хилинчек-човалаңны түр када чөпшээреп турарының шыңгыы чылдагааны бар. Кандыг? Ооң дугайында 8-ки кичээлден билип алыр бис. (Номчуптуңар: 2 Пётр 2:9; 3:7, 13.)

 Иегова бистиң-биле найыралдажып алырын күзеп турар. Бис Ооң-биле мөргүл таварыштыр чугаалажып тургаш чоокшулажып болур бис. Ол кижи бүрүзүнге сонуургалдыг (Ырлар 64:3; 144:18). Иегова өршээринге белен. Чамдыкта бир-ле чүве болдунмайн баар-даа болза, Ооң сеткилин өөртүр дээш кызып турарывысты Иегова эскерип турар. Тергиин эвес-даа болзувусса, Бурган-биле чоок хамаарылгалыг бооп болурувусту бо бүгү чүүл көргүзүп турар. (Номчуптуңар: Ырлар 102:12—14; Иаков 4:8.)

 Иегова биске чуртталганы белекке берген болганда, кымдан-даа артык Аңаа ынак болуру чугула (Марк 12:30). Бурганга ынакшылын илередир дизе, Ооң дугайында билип алырын уламчылап, Ооң айтыышкыннарын сагыыр болза эки. Ынчаар Иеговага чоокшулап болур силер. (Номчуптуңар: 1 Тимофейге 2:4; 1 Иоанн 5:3.)