Баш пәриштә Микаил ким?
Муқәддәс китаптики җавап
Бәзи динларда Микаилни «әвлия Микаил» дәпму атилиду. Бу исим «Худаға охшаш ким бар?» дегән мәнаға егә a (Даниял 12:1; Вәһий 12:7). Микаил өз исминиң мәнасиға мас һәрикәт қилип, Худаниң һөкүмранлиғини һимайә қилиду вә Униң дүшмәнлиригә қарши җан қилиду. Бу исим Әйса Мәсиһкә йәр йүзигә келишидин илгири берилгән вә у йәрдики хизмитини тамамлиғандин кейинму бу исимға егә болуп қалған. Мәсилән, Муса пәйғәмбәр өлгәндин кейин Микаил Шәйтан билән таллаш-тартиш қилған вә бир пәриштигә Худаниң хәвирини Даниял пәйғәмбәргә йәткүзүшкә ярдәм бәргән (Даниял 10:13, 21; Йәһуда 9).
Немә үчүн Әйса Мәсиһниң баш пәриштә Микаил дәп атилиши мәнтиқийгә уйғун екәнлигини көрүп чиқиң.
Микаил баш пәриштидур (Йәһуда 9). «Баш пәриштә» дегән сөз-ибарә Муқәддәс Язмиларниң пәқәт икки айитидә учрайду. Бу сөз-ибарә пәқәт бирла пәриштиниң бу нам-унванға егә екәнлигини көрситиду. Айәтләрдин биридә тирилдүрүлгән һәзрити Әйса «өзи асмандин... баш пәриштиниң авази... билән чүшиду» дейилгән (Салоникилиқларға 1-хәт 4:16). Һәзрити Әйса баш пәриштиниң авази билән асмандин чүшиду, чүнки у баш пәриштә Микаилниң өзидур.
Микаил пәриштиләр қошунини башқуриду. «Микаил вә униң пәриштилири әҗдиһаға [Шәйтанға]... қарши җәң қилди» (Вәһий 12:7). Микаил асманда чоң һоқуққа егә болғач, «баш шаһзадиләрдин бири» яки «чоң шаһзадә» дәп атилиду (Даниял 10:13, 21; 12:1). Бундақ нам-унванлар шуни көрситидуки, Муқәддәс китап тәтқиқатчиси Дэйвид Он ейтқандәк, Микаил «пәриштиләрниң қошуниниң баш командинидур».
Йәнә Муқәддәс китапта һәзрити Әйсаниңму пәриштиләр қошунини башқуруватқанлиғи тилға елиниду. У йәрдә: «Әйсаниң асмандин униң қудрәтлик пәриштилири билән аян болған вақтида... лавулдиған отта... интиқам алиду» (Салоникилиқларға 2-хәт 1:7, 8; Мәтта 16:27). «Асманға көтирилгәндин кейин Мәсиһ Пәрвәрдигарниң оң йенида олтарди вә униңға пәриштиләр, һакимийәтләр һәм күчләр бойсундурулди» (Петрусниң 1-хети 3:21, 22). Худа муқәддәс пәриштиләрни башқуруш үчүн икки команданни, йәни Әйсани һәм Микаилни таллиған болса, бу ғәлитә болуп көрүнгән болатти. Шуниң билән Әйса Мәсиһниң баш пәриштә Микаил дәп атилиши мәнтиқийгә уйғун.
Микаил һечқачан болуп бақмиған апәтлик бир дәвирдә мәйданға чиқиду (Даниял 12:1). Даниял китавида «мәйданға чиқиш» дегән сөз-ибарә адәттә падишаниң алаһидә ишларни қилмақчи екәнлигини тәсвирләш үчүн ишлитилгән (Даниял 11:2—4, 21). Язмиларда «Худаниң Сөзи» дәпму аталған Әйса Мәсиһ «Падишаларниң Падишаси» сүпитидә алаһидә бир ишни қилиду, йәни Худаниң барчә дүшмәнлирини йоқ қилиду вә Униң хәлқини һимайә қилиду (Вәһий 19:11—16). У буни дуния яритилғандин бу ян көрүлүп бақмиған дәһшәтлик балаю апәт вақтида әмәлгә ашуриду (Мәтта 24:21, 42).
a Муқәддәс китапта башқа шәхсләрниң бир нәччә исми болған. Мәсилән, Яқуп пәйғәмбәр (Исраил дәпму аталған), әлчи Петрус (Симун дәпму аталған) вә Әйсаниң шагирти Тадай (Йәһуда дәпму аталған) (Яритилиш 49:1, 2; Мәтта 10:2, 3; Марк 3:18; Әлчиләр 1:13).