Vhurifhi Vhu Bvaho Congo (Kinshasa)

Murunzini Wa Thavha Ya Mulilo

MUSI ḓuvha ḽi tshi ṱavha ḓoroboni ya Goma, lutombo lu mbo ḓi vha lutswuku. Thavha ya Nyiragongo yo nakesaho vhukuma, ndi iṅwe ya thavhandubi dzine dza nga kha ḓi thuthuba tshifhinga tshiṅwe na tshiṅwe nahone ndi tshithu tsha u thoma tshine wa tshi vhona ḓuvha ḽiṅwe na ḽiṅwe. Dindini ḽo aṱamaho hu dzula hu na ḓitsi. Vhusiku ḽeneḽi ḓitsi ḽi vhonala ḽi ḽitswuku nga nṱhani ha lurofhe lu fhisaho lu re dindini ḽeneḽo.

Nga Luswahili yeneyo thavha i vhidzwa Mulima ya Moto—Thavha Ya Mulilo. Muthuthubo muhulwane ngei Nyiragongo wo fhedzisela u vha hone nga 2002. Vhunzhi ha vhahura vhashu na khonani dzashu vha henefha Goma vho xelelwa nga zwithu zwavho zwoṱhe. Huṅwe fhethu he nṋe na munna wanga ra vha ri tshi huwelela hone, ro vha ri tshi tshimbila lurofheni lwo omaho nahone zwenezwo zwo vha zwi songo ḓowelea. Vhathu vha henefho vho fhambana vhukuma na tombo ḽo itwaho nga lurofhe lwa thavha ya mulilo. Ndi vhathu vho vhofholowaho, vhane vha vha na mbilu dzavhuḓi dzine dza ita uri vha kone u ṱanganedza mafhungo maḓifha e ra vha ḓisela one. Zwenezwo zwi ita uri u shuma murunzini wa Thavha ya Mulilo zwi takadze vhukuma.

Ndi Mugivhela nga matsheloni nahone ndo lavhelela nga maṱo matswuku u ya vhuḓinḓani. Nṋe na munna wanga, khathihi na dziṅwe khonani dze dza ri dalela na vhaṅwe vharumiwa, ri ḓo fhedza ḓuvha ḽoṱhe ri tshi khou huwelela gammbani ya dzitshavhi ngei Mugunga vhukovhela ha ḓorobo. Vhunzhi ha vhathu vha re henefho gammbani vho shavha mahayani avho nga nṱhani ha dzinndwa.

Ro paka khandiso dza Bivhili dza Lufura, Luswahili, na Lurwanda kha ṱhiraka. Zwino ri a ṱuwa-ha. Musi ri tshi khou tshimbila badani ya Route Sake yo itaho magombi-kombi, ḓorobo i mbo ḓi thoma u vhonala zwavhuḓi. Vhaṱhannga vha vha vho no thoma u sukumedza chukudu dzavho dzi re na mihwalo minzhi (zwithuthuthu zwa u hwala mihwalo zwo itwaho nga mabulannga.) Vhafumakadzi vho kanyelaho malabi a mivhala yo dombelaho vha tshimbila matungo a bada vho hwala mabuto nṱha ha ṱhoho. Thekhisi dza zwithuthuthu dzi endedza vhathu vha yaho mushumoni na makete. Fhaḽa na fhaḽa hu na nnḓu dzo fhaṱwaho nga matanda o swifhalaho dzi re na mutalo wa lutombo.

Ro swika Holoni ya Muvhuso ya Ndosho u itela u ṱangana na dziṅwe Ṱhanzi dza Yehova dzine dza ḓo ṱuwa na riṋe u huwelela gammbani ya dzitshavhi. Ndo kwamea musi ndi tshi vhona vhaswa, dzitshilikadzi, zwisiwana na vha si na mutakalo wavhuḓi. Vhunzhi havho vho vha vha tshi shengela, fhedzi vho khwinisa vhutshilo havho nga u khetha u tevhela maitele a Bivhili. Mbiluni dzavho  hu duga mafulufhedziso a Bivhili nahone vha fhisetshela u a vhudza vhaṅwe. Nga murahu ha muṱangano mupfufhi we ra eletshedzwa uri ri nga shumisa hani ndimana dza Bivhili u itela u ṱuṱuwedza vhathu vhane ra ṱangana navho, roṱhe vha 130 ro ṱuwa nga zwibisana zwiṱanu na veni.

Nga murahu ha hafu ya awara, ro mbo ḓi swika gammbani ya dzitshavhi. Henefho lurofheni lwo omaho ho athiwa madennde maṱuku matshena manzhi-manzhi. Vhukati ha gammba hu na muduba wa mabunga na fhethu ha u kuvhela. Ho ḓala vhathu—vha khou kuvha, u bika, u swarula ṋawa, na u swiela phanḓa ha madennde avho.

Ro ṱangana na muṅwe munna ane a pfi Papa Jacques, ane a ṱhogomela tshiṅwe tshipiḓa tsha gammba. O vha a tshi vhilaedziswa nga u alusa vhana vhawe zwifhingani zwino zwi konḓaho. O takala vhukuma musi ri tshi mu siela bugu Mbudziso Dzine Vhaswa Vha Dzi Vhudzisa—Phindulo Dzi Shumaho nahone o ri u ḓo takalela u i vhala na u kuvhanganya vhathu nga zwigwada zwiṱuku u itela u vha vhudza zwine a khou zwi guda.

Phanḓanyana ro ṱangana na muṅwe mufumakadzi ane a pfi Mama Beatrice. O vhudzisa uri ndi ngani Mudzimu a tshi tendela tshengelo. O vha a tshi humbula uri Mudzimu u khou mu ṱarafa. Munna wawe o vhulahwa nndwani, ṅwananyana wawe ndi mubebi a re eṱhe ane a khou konḓelwa nga u alusa ṅwana wawe gammbani, nahone murwa wawe o dzhiiwa nga khani miṅwedzini i si gathi yo fhiraho. Ha ḓivhi hune a vha hone.

Vhuṱungu ha Mama Beatrice vhu nkhumbudza nḓila ye Yobo a ḓipfa ngayo musi a tshi pfa mafhungo a khaulaho mbilu. Ro mu sumbedza uri ndi ngani ri tshi shengela nahone ra mu khwaṱhisedza uri ha khou shengela nga nṱhani ha uri Mudzimu u khou mu ṱarafa. (Yobo 34:10-12; Yakobo 1:14, 15) Ro dovha ra mu sumbedza tshanduko dzine dza ḓo ḓiswa nga Mudzimu hu si kale kha ḽifhasi nga Muvhuso wawe. Musi ri tshi amba nae o mbo ḓi thoma u ṅwethuwa nahone o ri o ḓiimisela u bvela phanḓa a tshi guda Bivhili na u humbela thuso kha Mudzimu.

Muṅwe na muṅwe washu o takalela ḽeneḽo ḓuvha, nahone roṱhe ro zwi vhona uri Yehova o ri thusa vhukuma uri ri kone u ṋea vhathu vhe ra ṱangana navho fulufhelo na u vha khuthadza. Musi ri tshi ṱuwa vhathu vha henefho vho ri imisela zwanḓa vho fara zwibammbiri, dzimagazini na dzibugu.

Musi ri nḓilani ya u ya hayani ro wana tshibuli tsha u elekanya nga zwe ra zwi tshenzhela. Ndo takala vhukuma nge nda vha na ḓuvha ḽavhuḓi nga u rali! Ndi humbula nḓila ye Papa Jacques a vha o takala ngayo, nḓila ye Mama Beatrice a ṅwethuwa ngayo, na nḓila ye muṅwe mukegulu a nkhaḓa ngayo o khwaṱhisa tshanḓa a tshi sokou ṅwethuwa a sa ambi tshithu. Ndi dovha nda humbula nga ha vhaswa vhe vha vhudzisa mbudziso dzo dziaho dzi fhiraho miṅwaha yavho. Ndi a khoḓa u konḓelela ha vhathu vhane vha kona u ṅwethuwa na u sea hu sa londwi uri vha khou shengela.

Kha ḽeneḽi shango ri vhona vhuḓidini ha vhaṅwe vhathu vhanzhi vhane vha khou lingedza u thusa vhathu vha shengelaho. Ndi ndugelo vhukuma u shumisa Bivhili u itela u sumbedza vhathu tshipiringululi tsha thaidzo dzavho. Ndi ḓipfa ndo takala vhukuma u ṱanganela kha mushumo muhulwanesa wa u thusa vhathu nga lwa muya.