ATTHU anceene aakhalana moonelo woovirikana voohimya sa okumi ni okhwa. Akina anuupuwela wira nuumala okhwa anirowa okhalaka akumi olumwenku mukina, woonasa wene ni mukhalelo mukina wa okumi wala opuro mukina. Akina anuupuwela wira yakhwa vale anirowa oyariwa vasya ni erutthu ekina olumwenku mukina. Nave akina anuupuwela wira okhwa ti omala wa itthu sotheene.

Waaniheryasa mookhalana sookupali sanyu voohimya sa mwaha ola, moovarihana ni mahuweliwo anyu wala emusi eyariwe anyu. Okhala wira miyuupuwelo voohimya sa okhwa sinnivirikana, niireke ookhala mutthu wala opuro woororomeleya nikhanle ahu oophwanya waakhuliwa wa nikoho nlo nooxankiha?

Mwa iyaakha sinceene, ahooleli a itiini anniixuttiha wira mutthu nuumala okhwa yookhala etthu enivikaniha okhala ekumi. Atthu a itiini sinceene ntoko maKristau, maHindu, aYuda, Amaka ni itiini sikina, anikupali wira mutthu ookhalana munepa wala erooho ehinikhwa, yeeyo enivikaniha okhala ekumi nuumala mutthu okhwa. Atthu aneettela etiini ya eBudista anikupali wira mutthu onniyariwa ni okhwa ikwaha sinceene, nto mwaha wa yeeyo, ikuru sa mutthu owo sinnimwiiriha ophiya okathi wootepexa ohakalaliha, oniitthaniwa Nirvana.

Sowiixuttiha iyo, soowiiriha atthu anceene okupaliki wira okhwa onlikana ni mukhora oniroiha olumwenku mukina. Atthu awo anoona wira okhwa etthu ya ephattu, ni wira Muluku onipattunxe wira nikhweeke. Masi Biibiliya oniixuttiha exeeni voohimya sa mwaha ola? Xontte musome mwaha onittharelana. Waakhuliwa waya onimoosivelani.