Ee. Yesuusi, “Hargganchchatussippe attin, payyatuyyo aakime koshshenna” yaagido wode, bana kaalliyaageeti akkamettanawu koyana danddayiyoogaa bessiis. (Maatiyoosa 9:12) Geeshsha Maxaafay akkamuwaabaa yootiya maxaafa gidana xayikkokka, Xoossaa ufayssana koyiya asawu kaaleto gidiya maaraa yootees.

Kaallidi deˈiyaagan nena oychcha

 1. Tawu imettana akkamoy aybakko eridanaa? Geeshsha Maxaafay nuuni ‘ubbabaa ammaniyoogaappe’ ammanttiya qofaa demmana koshshiyoogaa yootees.—Leemiso 14:15.

 2. Issi akkamuwaara gayttidaagan kuuyanaappe kase hara dottoreta zoriyaa oychchana danddayiyaanaa? Ne hanotay hirggissiyaaba gidikko “daro zoriyaageeti” yootiyoobay maaddana danddayees.—Leemiso 15:22.

 3. He akkamoy Geeshsha Maxaafay ‘suuttaappe’ haakkanaadan yootiyo azazuwaa kanttanaadan oottii?—Oosuwaa 15:20.

 4. Mirmmaray woy akkamoy iita ayyaanaa oosuwaara gayttidabee? Geeshsha Maxaafay ‘bitiyoogaappe [iita ayyaanaa oosuwaappe]’ haakkanaadan yootees. (Galaatiyaa 5:19-21) Akkamoy iita ayyaana oosuwaara gayttidabaakkonne eranawu, kaallidi deˈiya oyshata qoppa:

•   Aakimee iita ayyaana oosuwaa oottii?

•   He akkamoy xoossata woy shareechchota hanqqettissido gishshawu harggidabadan qoppiyoogan imettiya akkamoo?

•   Xaliyaa giigissiyo wode woy akkammiyo wode, yarshshiyoobi, kaayiyoobi woy hara iita ayyaana oosoy oosettii?

 5. Ta payyatettawu bessiyaagaappe aaruwaa hirggiyaanaa? Geeshsha Maxaafay, “Asai ubbai intte ashkketettaa [suure qoppiyoogaa] ero” yaagees. (Piliphphisiyuusa 4:5) Suure qoppiyoogee ayyaanaabaa mala ‘loˈˈobaa’ woykko keehi koshshiyaabaa akeekanawu maaddees.—Piliphphisiyuusa 1:10; Maatiyoosa 5:3.