KOYRO SINTTAN DEˈIYA HUUPHE YOHUWAA
Geeshsha Maxaafay Musennan Attiis
PAACCIYABAA: Geeshsha Maxaafaa koyro xaafidaageetinne duuqqidaageeti Pappiiresiyanne Calaa goˈettidosona. * (2 Ximootiyoosa 4:13) He miishshati Geeshsha Maxaafaa duussay hirggissanaadan waati oottidonaa?
Pappiiresee pooshettees, booxxees, eesuwan hitees. Beni wode Gibxxebaa xannaˈiya Richard Parkkiseninne Stefen Kurikee “Issi achcha pappiiresee wurssettan musida golanne sophphe kiyees” goosona. “Minjjidosan issi xaattay buuqqana woykko irxxan wooqqananne eceriyan woykko moogidosan ollattan meetettana danddayee.” Beetti simmin daro pooˈuwanne irxxaa ekkanaadan oottido pappiireseti eesuwan moorettidosona.
Calay pappiiresiyappe gamˈˈees, shin ikka oyqettay moorettikko woykko daro hoˈˈoy, irxxay woy pooˈoy deˈiyosan wottikko moorettees. * Calaakka paalliya qeeri doˈati dosoosona. Hegaa gishshawu, Everyday Writing in the Graeco-Roman East, giyo maxaafay beni wode xaafettidabati “dumma qaadaanappe attin musennan attiyo higgee baawa” gees. Geeshsha Maxaafay musidaba gidiyakko, A giddon deˈiya kiitaykka aara hayqqanashin attiis.
GEESHSHA MAXAAFAY WAANI ATTIDEE? Geeshsha Maxaafan doomettan deˈiya ichchashu maxaafata xeelliyaagan issi issi kawoy ‘ha higgiyaa duuqqidi bawu ekkanaadan’ Ayhudatu higgee wolqqanttees. (Zaarettido Wogaa 17:18) Hegaa bollikka, duuquwan erettida hiillanchchati cora koppiya kessido gishshawu koyro xeetu layttan K.K. heeran kushiyan xaafettida Geeshsha Maxaafaa kifileti Israaˈeela biitta ubban deˈiya Ayhuda woosa keettatun, haray atto haahuwan deˈiya Maqidooniyaara ubban deˈoosona! (Luqaasa 4:16, 17; Oosuwaa 17:11) Issi issi keehi ceeggida kushiyan xaafettida Geeshsha Maxaafaa kifileti ha wodiya gakkanawu waani deˈidonaa.
Maxine Abbaa Xaatta Maxaafata geetettiya kushiyan xaafettida Geeshsha Maxaafaa kifileti urqqaappe merettida xaarotu giddon yeggidi mela heeran gonggolo giddon wottin xeetu layttata deˈidosona
‘Ayhudatussi Geeshsha Maxaafaa kifileta oyqqida xaattaa xaaruwan woykko otuwan yeggidi minjjiyo meezee deˈiyoogaa’ Ooratta Maachchaa eranchchay Filip W. Komfort yootees. Kiristtaanetikka he meeziyaa aggibookkona. Hegaappe denddidaagan, issi issi beni wode kushiyan xaafettida amarida Geeshsha Maxaafaa xuufeti urqqaappe merettida xaarotu giddon, xuntta kifiletun, qassikka gonggolotu giddooninne keehi mela sohotun beettidosona.
WURSSETTA AYFIYA: Kushiyan xaafettida shaˈan qoodettiya Geeshsha Maxaafaa kifileti, ubba issoti issoti 2,000 layttappe daruwaa gamˈˈidaageeti ha wodiyan deˈoosona. Hegaa keena adussa layttaa gamˈˈida hegaa keena cora kifileti deˈiyo hara xuufee baawa.
^ MENT. 3 Pappiiresee haatta xaphon mokkiya pappiires giyo mittaappe merettiya xaafiyo miishsha. Calay qassi mehiyaa galbbaappe merettees.
^ MENT. 5 Leemisuwawu, paramay deˈiyo Amarkkaa Laˈˈatettaa Awaajjoy calan xaafettiis. Ha wodiyan 250ppe guuxxiya layttay aadhdhi simmin, sholollidi nabbabanawu coo beettiyo xekkan deˈees.